Read Imbabura Highland Quichua EZEQUIEL 2 Bible Online

EZEQUIEL 2 - Imbabura Highland Quichua bible

EZEQUIEL 2

¹Cashnami nihuarca: “Huañuna aichayu runa, jatarishpa shayari. Canhuanmi parlangapaj munani” nihuarcami.

²Shina nishca jipami, Diospaj Espirituca ñuca shunguman shamushpa, shinllitapacha shayachihuarca. Chaipimi, ñucaman parlajta uyarcani.

³Cashnatapashmi nihuarca: “Huañuna aichayu runa. Ñucami candaca, israelcunapajman cachani. Paicunaca, ñucata na cazushpami jariyanajurca. Paicunapash, paicunapaj taitacunapash, cunan punllacunacamanmi na cazushpa causanajun.

⁴Ñucami, candaca fiña ñavi, shinlli shungu runacunapajman cachajuni. ‘Mandaj Jatun Diosca, cashnami nin’ nishpa, paicunaman villangui.

⁵Paicunaca napash uyangapaj munangachu. Na cazuj miraicuna cashcamanda na uyanayachishpaca, paicuna purapi ñucamanda shuj villaj tiashcataca, tucui causaipimi yachanga.

⁶Huañuna aichayu runa, paicunataca ama manllanguichu. Paicuna rimajpipash, ama manllanguichu. Zarza casha yura chaupicunapi cashpapash, shuj casha chaupicunapi cashpapash, alacrangunapaj chaupipi causajushpapash, ama manllanguichu. Paicuna rimajpipash, paicunapaj ñaupajpi cashpapash na manllanachu cangui. Paicunaca na cazujcunami.

⁷Paicuna uyachun, ama uyachumbash ñuca shimicunataca villajunguilla. Paicunaca, yapa na cazujcunami.

⁸Huañuna aichayu runa, ashtahuangarin canga ñuca ima nishcata uyahuai. Cambash, chai na cazujcunashnaca ama caichu. Ñuca imata carashcatapash, shimita pascashpa micuilla” nihuarcami.

⁹Shina nishpaca, ñuca ñaupajman maquita ñapash chutamujtami ricurcani. Chai maquipica, carapi escribishpa pillushcatami charijurca.

¹⁰Chai carataca, ñuca ñaupajpimi pascarca. Chaipica ñaupajmambash, huashamambash escribishcami carca. Chaipica, yarishpa yarishpa huacana shimicunata, llaquihuan cashpa candanacunata, aij nishca shimicunatami escribishca carca.