Read Imbabura Highland Quichua EZEQUIEL 20 Bible Online

EZEQUIEL 20 - Imbabura Highland Quichua bible

EZEQUIEL 20

¹Canchis huatapaj, picha quilla chunga punllapimi, cashna tucurca: Israelcunata mandaj huaquin rucucunaca, Mandaj Diosta tapungapaj shamushpami, ñuca ñaupajpi tiarinajurca.

²Chaipimi Mandaj Diosca, cai shimicunata cashna nishpa villahuarca:

³“Huañuna aichayu runa. Israelcunata mandaj rucucunaman, cashna nishpa villai: Mandaj Jatun Diosca, cashnami nin: ‘Cangunaca, ¿ñucata tapungapajchu shamunguichi? Ñucaca causajunipachami. Canguna tapushcataca, na tigrachishachu’ ninmi Mandaj Jatun Diosca.

⁴Huañuna aichayu runa. Paicuna imatalla rurashcataca, ¿can ricuchingapaj munanguichu? Chaita ricuchingapaj munashpaca, paicunapaj taitacuna jatun millanayaicunata rurashcacunatara rijsichishpa,

⁵cashna ningui: Mandaj Jatun Diosca, cashnami nin: ‘Israelcunata agllai punllallatami, Jacobopaj huasi ucu puracunaman juramentungapaj, ñuca maquita alsarcani. Paicuna Egipto llactapi cajpillatami, paicunaman rijsirishpa, ñuca maquita alsashpa: Ñucaca, cangunata Mandaj Taita Diosmi cani nishpa juramenturcani.

⁶Ñuca maquita alsashpa juramentui punllapica, Egipto llactamanda llujchishpami lechepash, balun mishquipash ashtacapacha tiaj llactatami carasha nishpa juramentushca llactaman pushasha. Chai llactaca, tucui llactacunata yali juyailla llactagumi’ nircanimi.

⁷Cashnatapashmi nircani: ‘Chai millanayai yanga dioscunataca, tucuicunallata cangunapaj ñaupajmanda llujchishpa shitaichi. Egiptopi tiaj yanga dioscunahuanga, na mapayanachu canguichi. Ñucami, cangunata Mandaj Taita Dios cani’ nircanimi.

⁸Ashtahuangarin paicunaca, ñucata fiñashpami, na cazungapaj munanajurca. Chai millanayai, yanga dioscunata, paicunapaj ñaupajmanda anchuchingapaca, tucuicunallata na munanajurca. Egiptopi tiaj yanga dioscunatapash, na saquinajurcachu. Chaimandami cashna nircani: ‘Ñuca ninanda fiñarishpami, Egipto llacta chaupipillata llaquichisha nishca pactachunga, ñuca ninanda fiñarishcataca, paicunapaj jahuapimi talinshna cachamusha’ nircanimi.

⁹Shina nishca cashpapash, shuj llactacunapi causajcunapaj ñaupajpi, ñuca shuti ama nalicachi tucushca cachunmi, na llaquichircani. Chai llacta chaupicunapimi, paicunaca causanajurca. Chai llactacunapi causajcunapaj ñaupajpi rijsishca tucushpami israelcunataca, Egipto llactamanda llujchimurcani.

¹⁰Paicunata Egipto llactamanda llujchishpaca, jichushca pambamanmi pusharcani.

¹¹Chaipimi, pactachinajuchun ñuca cushca shimicunata curcani. Imata rurachun ñuca mandashcacunatapashmi rijsichircani. Chaicunata pactachishpami, runaca causanga.

¹²Ñucahuan, paicunahuan imatapash pactachij cashcata ricuchij cachunmi, samana ñuca punllacunataca curcani. Ñucapajlla cachunga, Mandaj Dios ñucallata shicanyachin cashcata yachachumbashmi curcani.

¹³Ashtahuangarin israelcunaca jichushca pambapimi, ñucataca fiñashpa jariyanajurca. Pactachinajuchun ñuca cushca shimicunatapash, na cazurcachu. Imata rurachun ñuca mandashcacunatapash, yangapimi churanajurca. Chaicunata pactachij runallami causanga nishpami villarcani. Samana ñuca punllacunatapash, yangapipachami churanajurca. Chaimandami paicunataca: ‘Ñuca ninanda fiñarishcata paicunapaj jahuapi talinshna cachamushpa, jichushca pambapillata tucuchisha’ nircani.

¹⁴Ashtahuangarin shuj llacta runacuna ricushpa, ñuca shutita ama nalicachi tucushca cachunmi, na llaquichircani. Paicunataca, chai gentecuna ricujtami llujchimurcani.

¹⁵Shinallata jichushca pambapipashmi, maquita alsashpa cashna nishpa juramenturcani: ‘Lechepash, balun mishquipash, ashtacapacha tiaj llactaman, tucuita yali juyailla llactaman na pushashachu’ nircanimi.

¹⁶Paicunallatami, imata rurachun ñuca mandashcacunataca cunganajurca. Pactachinajuchun ñuca cushca shimicunatapash, na cazunajurcachu. Samana ñuca punllacunatapash yangapi churashpami, paicunapaj yanga dioscunatara yariaj causanajurca.

¹⁷Chashnacuna cajpipash ñuca ñaupajmanda quishpichishpa, na huañuchishpami, jichushca pambapipash na tucuchircani.

¹⁸Ashtahuangarin paicunapaj huahuacunamambash, jichushca pambapillatami cashna nircani: ‘Cangunapaj taitacuna yachachishcashnaca, na purinachu canguichi. Paicuna mandashcacunatapash, na pactachinachu canguichi. Paicunapaj yanga dioscunahuambash, na mapayanachu canguichi.

¹⁹Ñucami, cangunata Mandaj Taita Dios cani. Cangunaca, pactachinajuchun ñuca cushca shimicunapi nishcashna causaichi, ñuca mandashcacunata cazushpa, chaita ruraichi.

²⁰Samana ñuca punllacunataca ñucahuan, cangunahuan ari nishcata pactachij cashcata ricuchij cachunmi, shicanyachina canguichi. Shina rurashpami ñucataca, cangunata Mandaj Taita Dios cajta yachanguichi’ nircanimi.

²¹Ashtahuangarin paicunapaj huahuacunapashmi, ñucata na cazunajurca. Pactachinajuchun ñuca cushca shimicunapi nishcashnaca, na causanajurcachu. Imata rurachun ñuca cushca shimicunata pactachingapaca, na cazunajurcachu. ‘Mandashcacunata pactachij runami causanga’ nircanimi. Samana ñuca punllacunatapash, yangapimi churanajurca. Chaimandami: ‘Ñuca ninanda fiñarishcataca, paicunapaj jahuapi talinshna cachamusha. Ñuca fiñarishcataca, jichushca pambapi paicunata llaquichishpa pactachingapajmi, chashna cachamusha’ nircani.

²²Ashtahuangarin, shuj llactapi causajcuna ricushpa ñuca shutita ama nalicachishpa rimanajuchunmi, paicunataca na llaquichircani. Paicunataca, chai gentecuna ricujtami llujchimurcani.

²³Shinallata jichushca pambapillatami, paicunataca tucui cai pachapi tiaj llactacunaman chajchushpa, caita chaita cachasha nishpa, maquita alsashpa juramenturcani.

²⁴Paicunaca, imata rurachun ñuca mandashcacunataca na pactachinajurcachu. Ashtahuangarin pactachinajuchun ñuca cushcapi nishcatapashmi cunganajurca. Samana ñuca punllacunatapash, yangapi churashpami, paicunapaj taitacunapaj yanga dioscunatara ricurianajurca.

²⁵Chaimandami ñucapash, nalita mandajuj shimicunata paicunaman curcani. Chai mandashcacunata rurashpaca, na causai ushachunmi curcani.

²⁶Tucui punda churicunata, chai dioscunaman carashpa rupachinajujpimi, paicuna imatalla ñucaman caranacunatapash mapayachircani. Ñucaca, paicunata llaquichishpa, Mandaj Dios cajta rijsichingapajmi, chashna rurarcani.

²⁷Huañuna aichayu runa. Chashna cashcamanda israelcunaman, cashna nishpa villai: Mandaj Jatun Diosca, cashnami nin: ‘Cangunapaj taitacunaca, ñucata rimashpa pingaichishca jahuapashmi, ñucataca nalicachinajurca.

²⁸Cangunaman carashapachami nishpa, ñuca maquita alsashpa juramentushca llactamanmi pushamurcani. Chai llactaman pushamujpica, chaipi tiaj jatun lomacunata, fanga junda quirucunata ricushpami, chaipi animalcunata carashpa huañuchinajurca. Ñuca na ricunayachishcatami, chaicunapica cunajurca. Shinallata mishquilla ashnajuj inciensotapash, chaipimi cushnichinajurca. Chaipimi, talina vinotapash talinajurca’ ninmi nishpa villai.

²⁹Chaita ricushpami, ñucaca: ‘Lomacunapi tiaj altarcunaca, ¿ima cajpita ringuichi?’ nishpa tapurcani. Chai altarcunaca, cunan punllacamanmi Bama[1] shutihuan tiajun.

³⁰Shina cashcamanda israelcunataca, cashna ningui: Mandaj Jatun Diosca, cashnami nin: ‘Cangunapash, cangunapaj taitacunashnallatami nalita rurashpa mapayarcanguichi. Millanayai dioscunata catishpami huainayarcanguichi.

³¹Cangunaca, imatalla caranacunatapash carashpa, cangunapaj churicunatapash cangunapaj tucui yanga dioscunaman carashpa rupachishpami, cunangaman ninanda mapayashca causanguichi. Israelcunalla, ¿chashna cajpitachu canguna tapujpica tigrachishalla? Ñucaca causajunipachami, canguna tapushcataca napacha tigrachishachu’ ninmi Mandaj Jatun Diosca ningui.

³²Canguna yarishcashnaca, na cangachu. Cangunaca, cashnami ninajunguichi: ‘Shuj llactacunapi causajcunashna cashunchi. Cai pachapi causanajuj caishuj gentecunashna caspita, rumita servishpa causashunchi’ ninguichimi.

³³Mandaj Jatun Dios ñucaca causajunipachami. Ñucami, cashna nini: Shinlli maquihuan, rigrata chutashpami, ñuca fiñarishcata talinshna cachamushpa, cangunataca mandasha.

³⁴Gentecunapaj chaupimanda llujchimushpami, shuj llactacunapi caipi chaipi causanajujtami shinlli maquihuan, ñuca rigrata chutashpa, ñuca fiñarishcata talinshna cachamushpa tandachimusha.

³⁵Jichushca pambapishna causanajuj gentecunapajman pushashpami, cangunahuanga ñavi ñavi chimbapurashun.

³⁶Imashnami Egipto llactapi tiaj jichushca pambapi cangunapaj taitacunahuan chimbapurarcani, chashnallatami cangunahuambash chimbapurasha. Mandaj Jatun Dios ñucami, chashna nini.

³⁷Cangunataca, varahuan cuentashpami yalichisha. Ñucahuan ari ninajushcata, aliguta pactachishpa causachunmi churasha.

³⁸Canguna puramandaca, ñucata na cazujcunatapash, jariyajcunatapashmi shicanyachisha. Shuj llactapi causanajujpipashmi llujchimusha. Ashtahuangarin paicunaca, Israel llactaman na yaicungachu. Shina rurajpimi ñucataca, Mandaj Dios cajta yachanguichi.

³⁹Israelcunalla, cangunata Mandaj Jatun Dios ñucallatami, cashna nini: Canguna ñucata na cazungapaj munashpaca, cangunapaj yanga dioscunata catishpa, tucuicuna servishpa causaichilla. Ashtahuangarin jucha illaj ñuca shutitaca, imata carashcacunahuambash, cangunapaj yanga dioscunahuambash, na ashtahuan yangapi churanachu canguichi.

⁴⁰Mandaj Jatun Dios ñucallatami, cashna nini: Ashtahuangarin Israel llactapi tiaj ñucapajlla urcupi, jatun urcupimi, tucui israelcunaca ñucata servinajunga. Chai llactapica, tucui paicunatami servinajunga. Chapimi, paicunataca chasquisha. Chaipimi, ñucaman imatalla caranacunata carachumbash, punda fucushca granocunata carachumbash, ñucapajlla cachun tucui shicanyachishcacunata carachumbash mañasha.

⁴¹Gentecunapaj chaupimanda llujchimushpa, shuj llactacunapi caipi chaipi causanajushcamanda cangunata tandachimushca jipaca, mishquillagu ashnajuj inciensotashnami chasquisha. Cangunahuan alita rurashcamandami, shuj llactacunapi causajcunapaj ñaupajpica, jucha illaj ricurisha.

⁴²Israel llactaman pushamujpimi, ñucataca Mandaj Dios cajta yachanguichi. Chai llactatami, cangunapaj ñaupa taitacunaman carashapachami nishpa, ñuca maquita alsashpa juramenturcani.

⁴³Chai llactapi cashpami, canguna imashna causanajushcata imata rurashpa mapayashcatapash yaringuichi. Shinamandami, canguna rurashca tucui juchacunataca, cangunallata millanayachinguichi.

⁴⁴Israelcunalla, ñucaca ñuca shutita juyaimanda, canguna nali causanajushcamandapash, jatun nalita ruranajushcamandapash llaquichina cashcashnaca, na llaquichijpimi ñucataca, Mandaj Dios cajta yachanguichi” ninmi Mandaj Jatun Diosca.

⁴⁵Mandaj Diosca, cai shimicunatami cashna nishpa villahuarca:

⁴⁶“Huañuna aichayu runa. Cambaj ñavihuan urai ladoman ricushpa, Neguev pambapi tiaj bosqueta llaquichinata villai.

⁴⁷Neguev pambapi tiaj bosquetaca, cashna ningui: Mandaj Diospaj shimita uyaichi. Mandaj Jatun Diosca, cashnami nin: ‘Ricui, ñucami cambica ninata japichini. Chai ninami, cambi tiaj verde quirucunatapash, chaquishca quirucunatapash, tucuilla rupachishpa chingachinga. Chai ninaca, napacha huañungachu, ashtahuangarin ura ladomanda, jahua ladomanda ricunajuj tucui gentecunapaj ñavitami rupachinga.

⁴⁸Mandaj Dios ñucallata, chai ninata japichishcataca, tucuicunami ricunajunga. Chai ninaca, napacha huañungachu’ nishpa villai” nihuarcami.

⁴⁹Shina nijpimi ñucaca, cashna nircani: “¡Aij, Mandaj Jatun Dioslla! Paicunaca, ñucataca cashnami ninajun: ‘Cai runaca, chimbapurana parlocunatallami parlan’ ninajunmi” nircanimi.