Read Imbabura Highland Quichua EZEQUIEL 21 Bible Online

EZEQUIEL 21 - Imbabura Highland Quichua bible

EZEQUIEL 21

¹Mandaj Diosca cai shimicunatami, cashna nishpa villahuarca:

²“Huañuna aichayu runa. Jerusalenman ricushpa, dioscunapaj huasicunata llaquichinata, ninandapacha villai. Shinallata Israel llactata llaquichinata ñuca villashcatapash villai:

³Israel llactataca, cashna ningui: Mandaj Jatun Diosca, cashnami nin: ‘Ricui, ñucaca canhuanga fiñarishcami cani. Shinamandami, espadata alichinamanda ñuca espadata llujchishpaca, imatapash cashcatapacha rurajtapash, ñucata na manllajtapash huañuchisha.

⁴Cambi causajcunataca, imatapash cashcatapacha rurajtapash, ñucata na manllajtapashmi huañuchisha. Shinamandami ñuca espadataca, causaita tucui charijcunata huañuchingapaj, paita alicachinamanda llujchisha. Urai ladomanda callarishpa, jahua lado llactacamanmi huañuchinga.

⁵Shinamandami causaita tucui charijcunaca, Mandaj Dios ñucallata, espadata alichinamanda llujchishcata yachanga. Chai espadataca, napacha cutinga alichishachu’ ninmi ningui.

⁶Huañuna aichayu runa. Cambaj cinturastapash llapirishpa, tucui shungu llaquirishpa, aij nishpa huacayari. Jatun llaquihuan paicunapaj ñaupajpi aij nishpa huacayari.

⁷Chashna huacajujpi: ‘¿Imashpata aij nishpa huacajungui?’ nishpa tapujpica, cashna ningui: ‘Tucuicunapaj shungumi, ña huañugrijunshna tucunga. Tucuicunapaj maquimi, huañujunshna tucunga. Tucuicunapaj yuyaipimi, ninanda llaquiringa. Tucuicunapaj cungurimi, yacushna chujchunga nishpa villashcata uyashpami huacajuni’ ningui. Chai llaquica, ñamari chayamunga. Chaica pactangapachami nishpa villai” nihuarcami Mandaj Jatun Diosca.

⁸Mandaj Diosca cai shimicunatami, cashna nishpa villahuarca:

⁹“Huañuna aichayu runa, cashna nishpa villai: Mandaj Jatun Diosca, cashnami nin: ‘Espadaca, filoyachishcalla, punchallaguta ali fichashcallami tiajun.

¹⁰Cungata muchungapajmi, filoyachishcalla tiajun. Huañuchijushpa punchalla ricuringapajmi, punchallaguta ali fichashcalla tiajun. ¿Chashnata ricushpatachu cushijushunchi? Ñuca churi mandana varataca, imapash caspitashnami na ricunayachirca.

¹¹Chai espadata charijungapajmi, punchallaguta ali fichachun curca. Huañuchij runaman cungapajmi, filoyachishpa punchallaguta, ali fichashcalla tiajun.

¹²Huañuna aichayu runalla, ninanda caparishpa huacayari. Chai espadaca, ñuca agllashcacunapaj jahuapi, Israel llactata tucui mandajcunapaj jahuapimi llaquichinga. Chai mandajcunapash, ñuca agllashcacunandi tandanajushcami, espadahuan huañuchi tucunajunga. Shinamanda, cambaj racu changata chugririyari.

¹³Ali filoyashca cajta, ricushcallami tiajun. Chai espadaca, mandana varatapash na ricunayachijpica, ¿imata tucunga? Chai varapashmi chinganga. Mandaj Jatun Dios ñucami, chashna nini.

¹⁴Huañuna aichayu runa. Huañuchij espadaca fiñarishpami, ishcaicaman, quimsacaman llaquichinga nishpa, maquita huactarishpa villayari. Chai espadami, huashaman yalijta tujsishpa ashtacacunata huañuchinga.

¹⁵Gentecunapaj shungupica, ninanda shaijushcashna tucuchun, jatun llaquicunapash ashtahuan mirachunmi, chai manllachij espadataca, tucui paicunapaj pungucunapi churarcani. ¡Aij, cungapi fitijpi punchapamba ricuringapaca, ña alichishcallami tiajun!

¹⁶Lluqui ladoman cuchuilla, ali ladomambash chugrichilla. Maijan ladoman cuyurishpapash, chashna ruranguilla.

¹⁷Ñucapash maquita huactarishpami, ñuca fiñarishcamandaca samasha. Mandaj Dios ñucami, chashna nini ninmi’ nishpa villai” nihuarcami.

¹⁸Mandaj Diosca cai shimicunatami, cashna nishpa villahuarca:

¹⁹“Huañuna aichayu runa. Babilonia llactata jatun mandajpaj espada maita shamuchumbash, ishcai ñanda rurangui. Shuj llactamandallata, ishcai ñanda llujchingui. Shinallata chai ishcai ñan callaricunapica, maijan puebloman rinata ricuchijujtapash churangui.

²⁰Shinallata amonitacuna causanajuj Rabá shuti puebloman, Judá llactapi tiaj muyundi pircashca Jerusalén puebloman, maijan ñanda chai espada shamunata ricuchijujtapash churangui.

²¹Babilonia llactata jatun mandajca tapushpa yachangapajmi, ñan cruzarijuj ishcai ñan callarijuj esquinacunapi shayarirca. Paica, flechacunata cuyuchishpa, paipaj yanga dioscunata tapushpa, yana shungupi ricushpami, maita rinataca yacharca.

²²Pai chashna tapushpa yachajpica, paipaj ali lado maquiman Jerusalén ladomanmi ricuchirca. Chaica, macanajuita callarichinata, huañuchishpa callarichinata, macanajuipaj ninanda caparinata, pungu ladocunapi ariete nishcacunata shayachinata, alpacunata mundunanata, muyundi torrecunata shayachinatami ricuchirca.

²³Jerusalenbi causajcunataca, ari nichishpami juramentuchirca. Shina cashpapash llullatara yachashcashnami canga. Ashtahuangarin paica, paicuna nalita ruranajushcata yariajlla cashpami, prezu japinga” nihuarcami.

²⁴Chaimandami Mandaj Jatun Diosca, cashna nin: “Canguna llullashcata ricuchishpa, canguna tucui imatalla rurashpapash, juchatalla ruranajushcata ricuchishpami, canguna nalita rurashcataca cutin yarichihuanguichi. Chashna rurashpa yarichishcamandami, paipaj maquipi churai tucunguichi.

²⁵Israel llactata mandajlla. Canga, ñucata yangapi churaj, na manllaj runami cangui. Shinamandami canda llaquichina punllapash, ña pactamushca. Can jatun nalita rurajushcamanda tucuchina punllami, ña pactamushca” ninmi.

²⁶Mandaj Jatun Diosca, cashnatapashmi nin: “Umapi churajuna tiara nishcatapash, coronatapashmi surcuna cangui. Na ashtahuan chashnallata catinguichu. Yangallacunaca jatunyachi tucushca cachun. Ali nishcacunaca, pingaichi tucushca cachun.

²⁷Cutin llaquichishpa, cutin llaquichishpa, cutin llaquichishpami tucuchisha. Mandanata japingapaj shamugrijuj pai shamungacamanllami, chashna llaquicunaca tianga. Pai shamujpica, paipaj maquipimi churasha.

²⁸Huañuna aichayu runa, cashna nishpa villai: Mandaj Jatun Diosca, ammonitacuna imalla tucunamanda nalicachishpa rimai tucunamandaca, cashnami nin: ‘Cangunata cungata muchushpa huañuchingapajmi, espadaca alichinamanda llujchishca tiajun. Espadaca, tucuchingapajmi punchallaguta ali fichashcalla tiajun.

²⁹Canguna ima tucunataca, yangatami llullashpa villanajun. Yachanimi nishpami llullashpalla villanajun. Huañuchi tucunapacha nishcacunapaj cungapi, espadata ña churashcalla cachunmi, chashna villanajun. Paicunata huañuchinaca, paicuna nalita rurashcamanda tucuchi tucuna punllacunapimi pactamunga.

³⁰Chai espadataca, ¿alichinapi cutin alichishallachu? Canguna viñashca pushtupi, maipi causashca llactapillatami imashna causashcata ricushpa llaquichisha.

³¹Ñuca ninanda fiñarishcataca, cangunapaj jahuapi talinshnami cachamusha. Nina rupajunshna ñuca fiñarishcataca, cangunapaj jahuapimi urai cachamusha. Cangunataca, ninanda llaquichishpa tucuchinata alipacha yachajushca, manllanayai runacunamanmi cusha.

³²Cangunaca, rupana jupashnami canguichi. Cai llactapica, cangunapaj yahuarhuan jundami canga. Cangunamandaca, imata yarinallapash na tiangachu’ nishpa villai. Mandaj Dios ñucami, chashna nini” nircami.