Read Imbabura Highland Quichua EZEQUIEL 22 Bible Online

EZEQUIEL 22 - Imbabura Highland Quichua bible

EZEQUIEL 22

¹Mandaj Diosca cai shimicunatami, cashna nishpa villahuarca:

²“Huañuna aichayu runa. Paicuna imatalla rurashcataca, ¿nachu can ricuchina cangui? Yahuarta jichaj runacuna causanajuj pueblopi tucui millanayaicunata rurashcataca, ¿nachu can ricuchishpa villana cangui?

³Paicunataca, cashna ningui: Mandaj Jatun Diosca, cashnami nin: ‘Paipaj chaupipillata yahuarta jichaj pueblolla. ¡Llaquichi tucuna horas chayamuchunmi, yanga dioscunata rurashpa mapayashcanguichi!

⁴Cangunallata yahuarta jichashcamandami, juchayu tucushcanguichi. Cangunapaj yanga dioscunahuanllatami mapayashcanguichi. Chashna rurashpami, cangunapaj punllataca quichijiyachircanguichi. Chaimandami, canguna tucurina huatapash ñapash chayamushca. Cangunataca, nalicachishpa rimai tucunajuchunmi, shuj llactacunaman curcani. Shuj llactapi causajcuna na cazushpa asinajuchumbashmi curcani.

⁵Candaca, mapayashca ni tucushpa, ninanda musparishpa pandanajujta ricushpami, cambaj ladolla causajcunapash, carupi causajcunapash asinajunga.

⁶Ricuichi, Israel llactata mandajcunaca, paicuna imashna ushaita charishcahuanmi, huañuchishpa yahuarta jichangapaj shinlli tucunajun.

⁷Cambi causajcunaca, paicunapaj taitata, mamatapashmi yangapi churanajurca. Caru llactamanda shamuj runatapash, cambaj chaupipillatami ninandapacha llaquichinajurca. Cambi causajcunaca, taita mama illaj huahuacuna, sapalla mamagucuna, imatalla charishcacunatapashmi quichunajurca.

⁸Ñucapajlla huasicunatapash yangapimi churarcanguichi. Samana ñuca punllacunatapashmi mapayachircanguichi.

⁹Huañuchishpa yahuarta jichangapaj, yangata juchachijcunapashmi, cambica tiarca. Cambi causajcunaca, lomacunapi tiaj altar ladocunapi micushpami, cambaj chaupipillata jatun nalita ruranajurca.

¹⁰Cambi causajcunaca, quiquin taitapaj huarmihuanllatami huainayanajurca. Quilla nanai pactajpi mapayashca huarmitapashmi, cambi causajcunaca ninandapacha llaquichinajurca.

¹¹Tucuicunallatami, shujpaj huarmihuan millanayaicunata ruranajurca. Paicunapaj jachundallata huainayashpami, jatun nalita rurashpa mapayanajurca. Cambi causajcunaca, taitamandalla panitapashmi, munai na munai huaglichinajurca.

¹²Cambi causajcunaca, huañuchishpa yahuarta jichangapajmi, culquita japinajurca. Culquita mañachishpa mirashcatapashmi japinajurca. Chai mama culqui mirashcamandapash, ashtahuan yalishpami japinajurca. Cambi causajcunaca, cumbacunatallata ninandapacha llaquichishpami shuhuanajurca. ñucatapashmi cunganajurca. Mandaj Jatun Dios ñucami, chashna nini.

¹³Ricuichi, charijyanatalla munashpami llaquichinajurca. Huañuchirishpami, cambaj chaupipi yahuarta jichanajurca. Chaimandami paicunata llaquichingapaca, maquita huactarircani.

¹⁴¿Cambaj shunguca, imatapash na manllashpa shinllichu canga? ¿Ñuca llaquichijui punllacunapica, cambaj maquica, ushaita charingachu? Mandaj Dios ñucami, chashna nini. Chaitaca pactachishapachami.

¹⁵Cangunataca, shuj llactacunamanmi, caita chaita cachasha. Cai pachapica, chajchushpami cachasha. Shinami cangunamandaca, cangunapaj mapataca tucuchisha.

¹⁶Cangunallatami, shuj llactacunapi causajcunapaj ricuipica, na ricunayaicuna tucunguichi. Shina cashpami ñucataca, Mandaj Dios cajta yachanguichi’ ninmi ningui” nishpami villahuarca.

¹⁷Mandaj Diosca cai shimicunatami, cashna nishpa villahuarca:

¹⁸“Huañuna aichayu runa. Israelcunaca, ñucapaca culquimanda llujshishca mapashnami tucurca. Jorno ucupi churashca bronceshna, estañoshna, jirrushna, plomoshna, culquishnami, tucui paicunaca tucurca. Culquimanda llujchishca mapashnami tigrarca.

¹⁹Shina cajpimi Mandaj Jatun Dios ñucaca, cashna nini: Tucui cangunami, culquimanda llujchishca mapashna tigrashcanguichi. Ricuichi, chaimandami cangunataca Jerusalén chaupipi tandachisha.

²⁰Culquita, bronceta, jirruta, plomota, estañota tandachishpami, jornopi churashpa, ninata japichishpa yacuyachin. Ninandapacha fiñarishpaca, chashnallatami cangunatapash chai pueblopillata tandachishpa, ninanda fiñarishpa yacuyachinshna tucuchisha.

²¹Ñucami, cangunata tandachishpa, ñuca ninanda fiñarishca ninata cangunapaj jahuapi fucushpa japichisha. Chai nina ucupimi, tucuicuna yacuyanguichi.

²²Imashnami jorno ucupi culquita yacuyachin, chashnallatami cangunapash chai ninapi yacuyachi tucunguichi. Shina rurajpimi Mandaj Dios ñuca, ninanda fiñashcata cangunapaj jahuapi talinshna llaquita cachamushcata yachanguichi” nihuarcami.

²³Mandaj Diosca cai shimicunatami, cashna nishpa villahuarca:

²⁴“Huañuna aichayu runa. Israel llactataca, cashna ningui: ‘Canga, mapa illaj llactaca na canguichu. Ñuca ninandapacha fiñarishpa llaquichijui punllapica, tamiahuan mutiyachishcapash na canguichu’ ningui.

²⁵Chai llacta chaupipica, león huacashpa shuj animalta japinshnami, villajcunapash shujlla yuyai tucunajurca. Gentecunata langanshna huañuchishpami, jazindacunatapash, imatalla charishcacunatapash quichunajurca. Chai llacta chaupipica, sapalla huarmicunallami miranajurca.

²⁶Paicunapaj curacunapash, ñuca mandashcata na cazushpami, ñucapajlla huasicunatapash mapayachinajurca. Imata ñucapajlla shicanyachishcatapash, imalla na ñucapaj shicanyachishcatapash, imalla mapa cajta, imalla na mapa cajtapash na shicanyachircachu. Samana ñuca punllacunataca, ñavita ladoman churashpami anchurinajurca. Chaimandami ñucapash, paicunapaj chaupipica, yangapi churai tucurcani.

²⁷Paicunata mandajcunapash, chai llacta chaupipica, animalcunata japij atujcunashnami, gentecunata huañuchishpa tucuchingapaj yahuarta jichanajun. Imatapash japingapajllami, chashna huañuchinajun.

²⁸Paicunaman villajcunapash, yacu turuhuanlla pircashcata quilpanshnami, yangacunata villashpa, yachanimi nishpa llullacunata cashna ninajurca: ‘Mandaj Jatun Diosmi cashna nin’ ninajurcami. Mandaj Dios ñucaca, paicunataca imatapash na nircanichu.

²⁹Cai llactapi causanajuj gentecunaca, llaquichishpa charishpami, shuhuashpa causanajurca. Llaquita apajujtapash, imagupash illajtapash ninandapachami llaquichinajurca. Shuj llactamanda shamujtapash, yangamandami llaquichinajurca.

³⁰Cai llactata ama llaquichingapaj nishpami, ñuca ñaupajpi pata t'unirishcapi jarcashpa shayarichun, Israel puracunamanda shuj runata mascarcani. Chaita ruraj runataca, na tarircanichu.

³¹Shinamandami ñuca ninanda fiñashcataca, paicunapaj jahuapi talinshna cachamurcani. Nina japirinshna ninanda fiñarishpami, paicunataca tucuchircani. Paicunapaj mapa causaimandaca, paicunatallatami llaquichircani” ninmi Mandaj Jatun Diosca.