Read Imbabura Highland Quichua EZEQUIEL 24 Bible Online

EZEQUIEL 24 - Imbabura Highland Quichua bible

EZEQUIEL 24

¹Iscun huata chunga quillapaj chunga punllapimi, Mandaj Diosca cai shimicunata cashna nishpa villahuarca:

²“Huañuna aichayu runa, cunan ima punlla cajta escribi. Cunan punllapillatami, Babilonia llactata jatun mandajca, Jerusalenda llaquichingapaj chaupipi churarca.

³Chai na cazuj runacunataca, chimbapurashpa yachachina parlohuan cashna yachachi: Mandaj Jatun Diosca, cashnami nin: ‘Mangata tulpapi shayachishpa, chaipica yacuta churai.

⁴Chai jipaca, aicha fitishcata tandachishpa, tucui ali aichatalla churangui. Changa aichata, huasha lomo aichata churangui. Tullucunatapash, alitalla agllashpa jundachingui.

⁵Chaipaca, ashtahuan ali llamata agllashpa japingui. Chai jipaca, tullucunata ucuman churashpa, ali timbungacaman rupachingui. Chai mangapica, tullucunatapash alipacha yanungui’ ninmi.

⁶Mandaj Jatun Diosca, cashnatapashmi nin: ‘Huañuchishpalla causaj pueblolla, ¡aij imachari tucungui! Cai puebloca, jirrumbrashca mangashnami tucushca. Chaitaca, na anchuchi ushashcachu. Chai aichacunataca, suerteta na rurashpallata, asha asha llujchilla.

⁷Cai pueblo chaupipica, paicunapaj yahuarllami tian. Chai yahuartaca, llambu rumi jahuapimi jichashca. Chai yahuartaca, ñutu alpa quilpachunllapash, na alpa jahuapi jichashcachu.

⁸Paicuna imashna llaquichishcashnallata randi llaquichingapaj, ninanda fiñarishpami ama quilpai ushachun, paicunapaj yahuartaca shinlli rumi jahuapi churasha’ ninmi nishpa yachachi” nishpami villahuarcami.

⁹Shinamandami Mandaj Jatun Diosca, cashnatapash nihuarca: “Huañuchishpa yahuarta jichaj pueblolla, ¡aij imachari tucungui! Ñucapash, candaca ashtaca yamdata tandachishpami rupachisha.

¹⁰Ashtaca yamdata churashpa rupachishpami, chai aichataca apiyashpa tucurishpa sanguyangacaman yanusha. Tullucunapashmi rupashpa tucuringa.

¹¹Chai chushaj mangataca, ninayashpa manga ucupash rupachun, chaipi tiaj mapapash rupachun, jirrumbrashcapash rupashpa tucurichunmi, ninayashca carbón jahuapi churasha.

¹²Jirrumbrashcata llujchingapaj munashpapash, yangallatami shaijurca. Chaica, ninapillami rupashpa tucuringa.

¹³Canga, nalita rurana munaihuanlla purishpa mapayashcamandaca, llaquita apanami cangui. Cambaj mapata ñuca fichangapaj munajpipash, canga napacha saquingapaj munarcanguichu. Canda llaquichishpa, ñuca ninanda fiñarishcata yalichingacaman, napacha mapa illaj canguichu.

¹⁴Mandaj Dios ñuca villashcataca pactachishapachami. Chai llaquica shamungapachami. Tigrashpapash na ricushachu, llaquitallapash na llaquishachu. Can imatalla rurashpa causashcashnallatami, ricushpa llaquichinajunga” ninmi Mandaj Jatun Diosca.

¹⁵Mandaj Diosca cai shimicunatami, cashna nishpa villahuarca:

¹⁶“Huañuna aichayu runa. Ricui, can cushijushpa charishca huarmitaca, cungashcapimi causaita quichusha. Paimandaca, ama yarishpa yarishpa huacanguichu, cambaj viquitapash ama jichanguichu.

¹⁷Shungu ucupilla llaquiringui. Huañushcamandaca, yana churajunatapash ama churajunguichu. Ashtahuangarin umapica, turbante nishcata churajungui. Chaquipipash, chaquipi churajunata churajungui, ñavitapash ama fachahuan quilparinguichu. Huañuipi yanushca micunatapash, ama micunguichu” nihuarcami.

¹⁸Chaitami tutamandaca, gentecunaman villarcani. Chishipaca, ñapash ñuca huarmica huañurcallami. Cayandi tutamandaca, Dios mandashcashnallatami rurarcani.

¹⁹Chaita ricushpami, gentecunaca: “Caita can chashna rurashcacunaca, ñucanchiman imata ricuchij cashcataca, ¿nachu villagringui?” ninajurca.

²⁰Shina nijpimi, cashna nijurcani: “Mandaj Diosca cai shimicunatami, cashna nishpa villahuarca:

²¹‘Tucui israelcunata, cashna ningui: Mandaj Jatun Diosca, cashnami nin: Ricuichi, canguna ushaita charishpa jariyana, cangunapaj ñavihuan ricushpa munana, cangunapaj shungupi cushijuna, ñuca huasitaca yangapimi churasha. Shinallata canguna saquishca cangunapaj churicunapash, ushicunapash espadapimi huañunga.

²²Cangunapash, ñuca imashna rurashcashnallatami, rurana canguichi. Cangunapaj ñavitaca, na fachahuan quilparinachu canguichi. Huañuipi gentecuna micuj micunatapash, na micunachu canguichi.

²³Umapica turbante nishcata, chaquipica chaquipi churajunacunatami churajuna canguichi. Yarishpa yarishpapash, na huacanachu canguichi. Ashtahuangarin canguna nalita rurashcamandami, tucuchi tucunguichi. Shinallata caishuj, chaishujmi aij ninajunguichi.

²⁴Ezequielmi, imatapash rurashpa cangunaman ricuchinga. Pai imashna rurashcatami, cangunapash tucuita rurana canguichi. Shina tucujpimi ñucataca, Mandaj Jatun Dios cajta yachanguichi’ ninmi ningui.

²⁵Huañuna aichayu runa. Shuj punllami, paicuna jariyashpa cushijushca, paicunapaj ñavihuan ricushpa cushijushca, paicunapaj shungupi munashca, paicuna pacajuna shinlli torretaca urmachisha. Shinallata paicunapaj churicunatapash, ushicunatapashmi tucuchisha.

²⁶Shina llaquichijui punllapimi, huañunamanda shuj quishpirishpa, ima tucushcata canman villangapaj shamunga.

²⁷Chai punllami cambaj shimica, huañunamanda pacajushpa shamuj chai runahuan rimangapaj pascaringa. Chaipimi parlangui, na ashtahuan upa tucunguichu. Canmi paicunapaca, shuj ricuchina cangui. Chaimandami ñucataca, Mandaj Dios cajta yachanajunga nishpami villahuarca” nijurcanimi.