Read Imbabura Highland Quichua EZEQUIEL 25 Bible Online

EZEQUIEL 25 - Imbabura Highland Quichua bible

EZEQUIEL 25

¹Mandaj Diosca, cai shimicunatami cashna nishpa villahuarca:

²“Huañuna aichayu runa. Amonitacunata ricushpa, paicunata llaquichinata villagri.

³Amonitacunataca, cashna ningui: Mandaj Jatun Dios rimashcata uyaichi. Mandaj Jatun Diosca, cashnami nin: ‘Cangunaca, ñucapajlla huasita yangapi churashcatapash, Israel llactata llaquinayaita tucuchishcatapash, Judá llactapi causajcuna prezu apai tucushcatapash: ¡Alita chashna tucurca! nishpami cushijurcanguichi.

⁴Chaimandami cangunataca, indi llujshimuj ladopi causajcuna japichun cushpa saquisha. Cangunapaj llactapica corralcunata, carpacunatami shayachinajunga. Canguna tarpushca granocunatapash paicunami micunga, lechetapash paicunami ufianajunga.

⁵Rabá shuti pueblotaca, camellocuna causachunmi saquisha. Amón llactataca, llamacunata michina pambatami rurasha. Shina rurajpimi ñucataca, Mandaj Dios cajta yachanguichi’ ninmi nishpa villangui” nihuarcami.

⁶Mandaj Jatun Diosca, cashnatapashmi nijurca: “Israel llactataca, tucui alma ninandapacha nalicachishpami, maquita huactarishpa, chaquihuan tushurishpa ninanda cushijurcanguichi.

⁷Ricui, shina rurashcamandami, ñuca maquita chutashpa cangunatapash llaquichisha. Shinallata canguna imata charishcatapash quichushpa apachunmi, shuj llactacunapi causajcunapaj maquipi churasha. Cangunataca, shuj gentecunapaj chaupipi causanajujpipash huañuchishpami, shuj llacta chaupicunapi causanajujpipash tucuchisha. Shina tucuchijpimi ñucataca, Mandaj Dios cajta yachanguichi” nijurcami.

⁸Mandaj Jatun Diosca, cashnami nirca: “Moab shuti, Seir shuti llactacunapi causajcunaca, cashnami ninajurca: ‘Ricuichi, Judá llactapica, tucui shuj llactacunashnallatami causanajun’ ninajurcami.

⁹Ricuichi, chaimandami ñucapash, Moab shuti llacta linderocunataca, pueblocunamanda callarishpa pascasha. Lindero ladollapi tiaj paicunapaj pueblocunamanda callarishpaca, paicuna munashca Bet-jesimot, Baal-meón, Quiriataim shuti pueblocunacamanmi pascasha.

¹⁰Indi llujshimuj ladoman causajcunataca, amonitacunahuan macanajuna yuyaitami cusha. Paicunapaj cachunmi, paicunaman cusha. Amonitacunataca, shuj llacta puracunapica, yaritapash ama yarinajuchunmi, chashna rurasha.

¹¹Moab shuti llactapipash, ninandami llaquichisha. Shina rurajpimi ñucataca, Mandaj Dios cajta yachanajunga” nircami.

¹²Mandaj Jatun Diosca, cashnami nirca: “Edom shuti llactapi causajcunaca, paicunata llaquichishcamandami Judá llactapi causajcunataca, imashna llaquichishnallata llaquichinajurca. Paicunataca, imashna llaquichishcashnallata llaquichishpami, yapapacha nalita ruranajurca.

¹³Chashna cashcamandami, Mandaj Jatun Dios ñucaca, cashna nini: Ñucapash ñuca maquita chutashpami, Edom shuti llactataca llaquichisha. Chai llactapica, runacunatapash, animalcunatapash huañuchishpami, llaquinayaita tucuchishpa saquisha. Temán shuti llactamanda callarishpaca, Dedán shuti llactacunacamanmi espadapi huañunajunga.

¹⁴Paicuna llaquichishcashnallata llaquichingapajmi, Edom shuti llactapi causajcunataca, ñuca agllashca israelcunapaj maquipi churasha. Paicunami, Edom shuti llactapi causajcunataca, ñuca ninanda fiñarishpa llaquichingapaj munashcashnallata llaquichinajunga. Shina rurajpimi, ñucataca imashna llaquichishcashnallata llaquichij cajtaca yachanajunga” nijurcami Mandaj Jatun Diosca.

¹⁵Mandaj Jatun Diosca, cashnami nirca: “Filisteocunaca, punda fiñanajushcata na cungashpami, llaquichinata yariajlla causanajurca. Chaimandami imashna llaquishcashnallata, ninanda fiñarishpa tucuchinajurca.

¹⁶Chashna rurashcamandami Mandaj Dios ñucaca, cashna nini: Ricuichi, filisteocunataca ñuca maquita chutashpa llaquichishpami, cereteocunatapash huañuchisha. Shinallata mama cucha manñapi huaquin puchushcacunatapashmi tucuchisha.

¹⁷Paicunataca, nalita ruranamanda jarcashpa rimashpami, ninandapacha fiñarishpa paicuna llaquichishcashnallata llaquichisha. Imashna llaquichishcashnallata llaquichijpimi ñucataca, Mandaj Dios cajta yachanajunga” nircami.