Read Imbabura Highland Quichua EZEQUIEL 26 Bible Online

EZEQUIEL 26 - Imbabura Highland Quichua bible

EZEQUIEL 26

¹Chunga shuj huata, callari quillapaj punda punllapimi, cashna tucurca: Mandaj Diosca, chaipimi cai shimicunata cashna nishpa villahuarca:

²“Huañuna aichayu runa. Tiro shuti puebloca, Jerusalenda fiñashpami, cashna nijurca: ‘Jajai, llactacunapaj pungushna llactaca, tucuchi tucushcami. Shinamandami ñucapajmanllata tigramurca. Ñucaca, gentecunahuan jundami casha, paica jichui tucushcami canga. Alita chashna tucurca’ nijurcami.

³Shinamandami Mandaj Jatun Dios ñucaca, cashna nini: Tiro shuti pueblolla, ricui ñucaca canhuan fiñarishcami cani. Imashnami mama cuchaca, yacuta ninanda jatarichin, chashnallatami ñucapash ashtaca llactacunata vichai pushamusha.

⁴Paicunami, Tiro shuti pueblo pircacunatapash ñutunajunga, torrecunatapashmi shitanajunga. Chaitami, ñutu alpacaman fichashpa, jaca llambu rumitashna saquisha.

⁵Mama cucha chaupipipash, linllicunata chaquichina pambami tucunga. Mandaj Jatun Dios ñucami, chashna nini. Shuj llactacunamanda shamujcunami, imalla tiajcunatapash quichushpa apanajunga.

⁶Pambapi causajcunaca, espadapimi huañunajunga. Chaita ricushpami ñucataca, Mandaj Dios cajta yachanajunga” nijurcami.

⁷Mandaj Jatun Diosca, cashnatapashmi nin: “Ricui, Tiro shuti pueblota llaquichinajuchunmi jahua ladomandaca, Babilonia llactata jatun mandaj Nabucodonosor shuti runata pushamusha. Paica, jatun mandajcunatapash jatun mandajmi. Paica, ashtaca caballocunahuan, carretacunahuan, caballopi tiarij soldadocunahuan, ashtaca runacunahuanmi shamunga.

⁸Paicunami, pambapi causajcunataca, espadahuan huañuchinajunga. Canda llaquichingapaca, torrecunatami muyundipi shayachinajunga. Baluarte nishcacunahuan, jarcarina escudohuan shinllipacha shayarishpami macanajunajunga.

⁹Canda fiñashpami, cambaj jatun pircacunata urmachingapaca, ariete nishcacunata shayachinajunga. Cambaj torrecunatapash, jachacunahuanmi tucuchinajunga.

¹⁰Paicunapaj ashtaca caballocunahuan shamunajushcamandami, cangunataca ñutu alpalla quilpanga. Paicunapaj caballocunapash, carretacunapaj ruedacunapash culunlla shamunajujpimi, muyundi cambaj pircacunapash chujchunga. Tucuchi tucushca pueblopi pirca utujurishcata yaicunshna, cambaj pungucunata yaicujpimi, chashna tucunga.

¹¹Caballocunaca, paicunapaj sillucunahuan tucui ñangunata sarushpami purinajunga. Cambaj gentecunataca, espadahuanmi huañuchinajunga. Shinllitapacha shayachishca cambaj pilarcunapash, alpamanmi urmanajunga.

¹²Can imatalla charishcacunatapash shuhuashpami, cambaj jatunacunatapash quichushpa apanajunga. Pircacunatapash tucuillata urmachishpami, cambaj juyailla huasicunatapash tucuchinajunga. Can charishca rumicunatapash, caspicunatapash, ñutu alpatapash yacu chaupipimi shitanajunga.

¹³Cambi caparishpa candanacunatapash tucuchishami. Shinallata cítara nishcacunata tocashcapash, na ashtahuan uyaringachu.

¹⁴Candaca, jaca llambu rumitashnami saquisha. Canga, linllicunata chaquichina pambami tucungui. Candaca, ima horallapash cutinga na shayachingachu. Mandaj Dios ñucami, chashna nini” ninmi Mandaj Jatun Diosca.

¹⁵Mandaj Jatun Diosca, Tiro shuti pueblotaca cashnatapashmi nijurca: “Mama cucha manñapi causajcunaca, culunlla can urmajpica, ¿nachu chujchunajunga? Chugrichi tucushpa caparinajujpi, cambaj chaupipi causajcunata ninanda huañuchinajujpica, ¿nachu chujchunajunga?

¹⁶Chai jatun llaquita uyashpaca, mama cucha manñapi causajcunata jatun mandajcunapash, paicuna mandashpa tiajujmanda uriajushpami, jahualla churajushcata anchuchishpa, bordashca churajunacunatapash llujchishpa lluchulla tucunajunga. Ninanda manllarishpami, alpapilla tiarinajunga. Can chashna tucushcata ricushpami, punllandi ninanda manllarishpa ricunman quedanajunga.

¹⁷Canmandaca, yarishpa yarishpa huacashpami, cashna ninajunga: ‘¿Imashnata canga tucurircangui? Canga, mama cucha muyundi pueblocunapi causanajuj runacunahuan jundamari carcangui. Alicachi tucushca pueblomari carcangui. Mama cucha muyundipica, canllamari ninan shinlli causarcangui. Cambash, cambi causajcunapashmari, cangunapaj tucuilla muyundipi manllachishpa causarcanguichi’ ninajungami.

¹⁸Cunanga, can urmajui punllapica, yacu chaupipi tiaj llactacunapash chujchungami. Can tucurijpica, mama cucha chaupicunapi tiaj alpacunapash manllaringami” nijurcami.

¹⁹Mandaj Jatun Diosca, cashnatapashmi nirca: “Candaca, pipash na causanajuj llactacunatashnami, llaquinayaita shitashcata saquisha. Manllanayai ucu ucu yacutami llujchimushpa, cambajman cachamusha. Chai ashtaca yacumi, candaca quilpanga.

²⁰Pambana utujuman urai rijcunahuanmi, candapash urai richun saquisha. Ñaupa huatacunamanda gentecunahuanmi, urai richun saquisha. Ñaupa punllacunapi jichushca pambacunata saquishcashnami, pambana utujuman urai rijcunahuanga, cai pacha ucucunapi churasha. Shina rurajpimi, cambica pipash cutinga na causanga. Chashna rurashpami, runacuna causanajuj cai pachapica, ninanda cushichisha.

²¹Candaca, jatun manllarinatami rurasha, canga na ashtahuan causanguichu. Candaca mascashpapash, napacha cutinga tarinajungachu” nircami Mandaj Jatun Diosca.