Read Imbabura Highland Quichua EZEQUIEL 29 Bible Online

EZEQUIEL 29 - Imbabura Highland Quichua bible

EZEQUIEL 29

¹Chunga huata chunga quilla, chai quillapaj chunga ishcai punllapimi, Mandaj Diosca cai shimicunata cashna nishpa villahuarca:

²“Huañuna aichayu runa. Egipto llactata jatun mandaj Faraonda fiñashpa ricushpa, paitapash, tucui Egipto llactatapash, ñuca llaquichinata villai.

³Canga, cashna nishpa villai: Mandaj Jatun Diosca, cashnami nin: ‘Egipto llactata jatun mandaj Faraonlla ricui, ñucami canhuanga fiñarishca cani. Canga, dragón shuti jatun animal, pai causajuj jatun yacucunapi sirijunshnami cangui. Canga: Nilo shuti jatun yacuca ñucapajmi, ñucami rurarcani nircanguimi.

⁴Shinamandami ñucaca, garfio nishca jirrucunata, cambaj quijadascunapi churachisha. Cambaj jatun yacucunapi tiaj pijicunataca, cambaj escamapimi llutasha. Candaca, cambaj chai jatun yacu chaupicunamandami llujchisha. Chashna llujchijpimi, cambaj jatun yacucunamanda pijicunaca, cambaj escamapi llutarishpa tucuilla llujshinga.

⁵Shina llujchishpami candapash, cambaj jatun yacucunamanda tucuilla pijicunatapash, jichushca pambapi saquisha. Yanga, chushaj pambapimi urmangui. Candaca, pipash na tandachishpa japingachu. Candaca, cai pachapi tiaj millai animalcuna, jahuata rij alasyu animalcuna micunajuchunmi curcani.

⁶Shina rurajpimi, Egiptopi tucui causajcunaca ñucataca, Mandaj Dios cajta yachanajunga. Paicunaca israelcunapaca, sucus taunashnami carca.

⁷Canga, maquihuan tacarijpillatami, faquirishpa paicunapaj rigrata tucuilla faquircangui. Cambi taunarijpillata faquirishpami, paicunapaj tucuilla huasha tulluta faquircangui’ ninmi nishpa villai” nihuarcami.

⁸Shinamandami Mandaj Jatun Diosca, cashna nijurca: “Ricui, canda llaquichingapajmi espadata apamuni. Chaihuanmi, cambi causaj runacunata, animalcunatapash tucuchisha.

⁹Egipto llactaca llaquinayaita tucuchi tucushca, jichushcami quedanga. Shina rurajpimi ñucataca, Mandaj Dios cajta yachanajunga. Canga: ‘Nilo shuti jatun yacuca ñucapajmi, ñucami rurarcani’ nircanguimi.

¹⁰Ricui, shinamandami canhuambash, cambi tiaj jatun yacucunahuambash, ninanda fiñarini. Egipto llactataca, Migdol pueblomanda callarishpa, Sevene shuti pueblocaman, Etiopía llacta linderocamanmi, llaquinayaita tucuchi tucushcata, jichushca, chulunlla pambata saquisha.

¹¹Chai llactataca runacunapash, animalcunallapash na yalingachu. Chuscu chunga huatacamanmi, chaipica pipash na causanga.

¹²Egipto llactataca, shuj llactacunata llaquinayaita tucuchishcashnallatami, chulunlla llactata saquisha. Chaipi tiaj pueblocunatapash, shuj pueblocunata tucuchishcashnallatami tucuchisha. Chuscu chunga huatacamanmi, jichushca siringa. Egiptopi causajcunataca, shuj llacta puracunamanmi, tucui llactacunaman caita chaita cachasha” nijurcami.

¹³Mandaj Jatun Diosca, cashnami nijurca: “Shuj gentecuna causanajuj purapi caita chaita cachai tucushpa causanajuj Egipto llacta runacunataca, chuscu chunga huata jipami tandachisha.

¹⁴Egiptomanda prezu apai tucushcacunata cutin tigrachimushpaca, paicuna huacharishca Patros shuti llactamanllatami pushasha. Chaipica, paicunaca na ricunayachi tucushca llactami canga.

¹⁵Mandajuj shuj llactacunahuan chimbapurajpica, yangalla llactami canga. Shuj llactacunata llaquichingapaca, ima horapash na ashtahuan jatari ushangachu. Ashtahuangarin ñucami paicunataca, shuj llactacunata ama cutin mandashpa chari ushachun, huaquindalla saquisha.

¹⁶Chaimandami israelcunaca, paicuna ayudachunga na ashtahuan shuyanajunga. Paicunata catishpa shinlli tucushpa, juchata cutin ruranataca na yarinajungachu. Chaimandami ñucataca, Mandaj Jatun Dios cajta yachanajunga” nijurcami.

¹⁷Ishcai chunga sucta huatapaj punda quilla callari punllami, cashna tucurca: Mandaj Diosca, cai shimicunatami cashna nishpa villahuarca:

¹⁸“Huañuna aichayu runa. Babilonia llactata jatun mandaj Nabucodonosor runaca, Tiro shuti pueblota mishangapajmi, paipaj soldadocunataca shinllitapacha macanajuchirca. Chaimandami paicunaca, ajchacunapash lluchurishca, huashacunapash chugrishca quedashca. Tiro shuti pueblota llaquichishpa ayudashcamandaca paipash, paipaj soldadocunapash imatallapash na japircachu.

¹⁹Chaimandami Mandaj Jatun Dios ñucallata, cashna nini: Ricui, Egipto llactataca, ñucami Babilonia llactata jatun mandaj Nabucodonosor runaman cuni. Paimi, chai llactapi imalla tiajtapash, macanajushpa imatalla quichumushcacunatapash tandachishpa japinga. Chai tucuita japishpami, paipaj soldadocunaman cunga.

²⁰Paipaj soldadocunahuan Tiro pueblota llaquichishpa, shinlli ruranata rurashcamandami, Egipto llactataca curcani. Paicunaca, ñucatami servinajurca. Mandaj Jatun Dios ñucallatami, shina nini.

²¹Chai huatacunami, israelcunapaj ushaitaca cutin retoñachisha. Ezequiel, cambaj shimipi ñuca rimachijpimi, paicunapaj chaupipi villangui. Chaita ricushpami ñucataca, Mandaj Dios cajta yachanajunga” nihuarcami.