Read Imbabura Highland Quichua EZEQUIEL 30 Bible Online

EZEQUIEL 30 - Imbabura Highland Quichua bible

EZEQUIEL 30

¹Mandaj Diosca, cai shimicunatami cashna nishpa villahuarca:

²“Huañuna aichayu runa. Ñuca ima nishcata, cashna nishpa villai: Mandaj Jatun Diosca, cashnami nin: ‘Ninanda llaquirishpa huacaichiyari. Chai punllapica, ¡aij imachari tucunguichi!

³Chai punllami ña pactamujun. Mandaj Dios llaquichina punllami, ña chayamujun. Chai punllapica, fuyu jundashca punllami canga, llactacunata llaquichina punllami canga.

⁴Espadami, Egiptoman shamunga. Espadahuan chugrichi tucushpa Egiptopi urmanajujpimi, Etiopía llactapi causajcunaca manllarinajunga. Paicuna imatalla charishcacunatapash apashpami, huasicunataca ucu callari rumicaman tucuchinga.

⁵Chai punllapica Etiopía, Fut, Lud shuti llactacunapi causajcunapash, tucui Arabia llactapi, Libia llactapi causajcunapash, paihuan tandanajushca llactacunapi causajcunapashmi, paicunahuanllata espadahuan huañuchi tucunajunga’ ninmi nishpa villai” nihuarcami.

⁶Mandaj Diosca, cashnami nijurca: “Egipto llactata ayudashpa shinllichij runacunapashmi, huañushpa urmanga. Jariyashpa mandaj Egipto llactaca, Migdol shuti pueblomanda callarishpa Sevene shuti pueblocamanmi, chaipi causajcunaca espadahuan huañuchi tucunga. Mandaj Jatun Dios ñucami, chashna nini.

⁷Egipto llactaca, shuj llactacunashnallata llaquinayaitami tucuchi tucunga. Chaipi tiaj pueblocunapash, shuj pueblocunashnallatami jichushca pambacuna quedanga.

⁸Egiptopi ninata japichishpa, paita tucui ayudajcunandi tucuchijta ricushpami ñucataca, Mandaj Dios cajta yachanajunga.

⁹Chai huatacunapica, shuj villajcunami imatapash na manllashpa causajuj Etiopía llactata manllachingapaj, ñuca ñaupajmanda llujshishpa, jatun barcocunapi rinajunga. Egipto llactata llaquichijpi manllarishcashnallatami, ninanda manllarinajunga. Ricuichi, chai punllapash ñami pactamujun” nijurcami.

¹⁰Mandaj Jatun Diosca, cashnami nijurca: “Egiptopi imatalla charishcacunataca, Babilonia llactata jatun mandaj Nabucodonosor runapaj maquipi churashpami tucuchisha.

¹¹Chai llactata tucuchingapaca paitapash, paipaj gentecunatapash, chai llactacunapi causaj ninan shinlli soldadocunatapashmi pushamusha. Paicunapaj espadacunata alichinamanda llujchishpami, Egiptopi causajcunata huañuchishpa, chai llactapica huañushcacunahuan jundachinga.

¹²Jatun yacucunatapashmi chaquichisha. Chai llactataca, nalita ruraj runacunamanmi cusha. Chai llactataca, chaipi tucui imalla tiajcunandimi, caru llactamanda shamujcuna tucuchinajuchun cusha. Cai shimicunataca, Mandaj Diosmi chashna nin” nijurcami.

¹³Mandaj Jatun Diosca, cashnami nijurca: “Egipto llactapi tiaj imamambash rijchaj dioscunatapash, Menfis shuti pueblopi tiaj yanga dioscunatapashmi tucuchisha. Egipto llactata mandajca, na ashtahuan tiangachu. Egipto llactapica, ninan manllaitami churasha.

¹⁴Patros shuti llactatapashmi, llaquinayaita tucuchisha. Zoán shuti pueblopica, ninatami japichisha. Tebas shuti pueblopi causajcunatapashmi ninanda llaquichisha.

¹⁵Shinallata jatun pircahuan jarcashca Egipto llactapaj Sin nishca pueblopipashmi, ñuca ninanda fiñarishcata talinshna cachamusha. Tebas shuti pueblopi causanajuj ashtaca gentecunatapashmi tucuchisha.

¹⁶Egiptopica, ninatami japichisha. Sin nishca puebloca, manllanayaitami nanachinga. Tebas shuti puebloca, ñutui tucushcami canga. Menfis shuti pueblotaca, ninan llaquicuna japijungallami.

¹⁷Avén shuti, Pibeset shuti pueblocunapi causanajuj, chairalla viñai huambracunaca, espadahuan huañuchi tucushpami urmanajunga. Huarmicunaca, prezumi apai tucunajunga.

¹⁸Egipto llacta ninan ushaihuan mandajushcata llaquichijpimi, Tafnes shuti pueblopica punllapash tutayanga. Chaipimi, pai jariyashpa mandajushcapash tucuringa. Chai llactapica, yana yana tutami quilpanga. Muyundi uchilla llactacunapi causajcunaca, prezumi apai tucunajunga.

¹⁹Egipto llactataca llaquichishapachami. Shina rurajpimi ñucataca, Mandaj Dios cajta yachanajunga” nijurcami.

²⁰Chunga shuj huatapaj callari quilla canchis punllapimi, cashna tucurca: Chaipimi Mandaj Diosca, cai shimicunata cashna nishpa villahuarca:

²¹“Huañuna aichayu runa. Egipto llactata jatun mandaj Faraonbaj rigrataca faquircanimi. Ricui, chai rigrataca, na jambicunata churashpa, na huatachishcachu. Chai rigra ali tucushpa, espadata shinllita charichumbash, na jacuchishpa chumbihuan huatachishcachu.

²²Chaimandami Mandaj Jatun Dios ñucallata, cashnatapash nini: Egipto llactata jatun mandaj Faraonhuan fiñarishcami, caipi cani. Chaimandami paipaj ali rigratapash, faquishca rigratapash ashtahuan faquisha. Shinami, maquipi charijuj espadataca cacharichisha.

²³Egiptopi causajcunataca, shuj llacta puracunamanmi tucui llactacunaman, caita chaita cachasha.

²⁴Babilonia llactata jatun mandajpaj rigrataca shinllichishpami, ñuca espadata paipaj maquipi churasha. Ashtahuangarin Faraonbaj rigrataca ñucami faquisha. Shina faquijpimi, chugrichi tucushpa ña huañugrijunshna aij nishpa, chai mandajpaj ñaupajpi ninanda huacajunga.

²⁵Babilonia llactata jatun mandajpaj rigrata shinllichishpami, Faraonbaj rigrataca ushai illajta saquisha. Babilonia llactata jatun mandajpaj maquipimi, ñuca espadata churasha. Paimi, Egipto llactaman maquita chutashpa llaquichijunga. Chaita ricushpami ñucataca, Mandaj Dios cajta yachanajunga.

²⁶Egiptopi causajcunataca, shuj llacta puracunamanmi tucui llactacunaman, caita chaita cachasha. Chaita ricushpami ñucataca, Mandaj Dios cajta yachanajunga” nihuarcami.