Read Imbabura Highland Quichua EZEQUIEL 31 Bible Online

EZEQUIEL 31 - Imbabura Highland Quichua bible

EZEQUIEL 31

¹Chunga shuj huatapaj quimsa quilla punda punllapimi, cashna tucurca: Mandaj Diosca cai shimicunatami, cashna nishpa villahuarca:

²“Huañuna aichayu runa. Egipto llactata jatun mandaj Faraondapash, paipaj gentecunatapash cashna ningui: ‘Can ninan ushaita charishcataca, ¿pihuanda chimbapurarircangui?

³Ricui, Asiria llactaca, Líbano llactapi tiaj juyailla malqui junda jatun cedro quirushnami carca. Malquicuna junda tucushpa, jatun jatunda viñashcashnami carca. Chai quiru umapash, ashtaca malqui chaupicunapimi carca.

⁴Paitaca, yacucunami viñachirca. Manllanayai ucu ucu yacucunami jatunyachirca. Paipaj jatun yacucunaca, paipaj chaqui muyunditami urai rinajurca. Chai pambapi tiaj tucui shuj quirucunamambashmi cachajurca.

⁵Chaimandami, pambapi tiaj tucui quirucunamandaca, ashtahuan yali jatunlla viñarca. Paipaj malquicunapash, ninandami mirarca. Ashtaca yacu tiashcamandami, paipaj malquicunaca ashtahuan jatunda viñarca.

⁶Paipaj malquicunapimi, jahuata rij alasyu tucui animalcunapash, tazinda ruranajurca. Chai quiru malqui ucupica, pambapi causaj tucui animalcunami huachanajurca. Chai quirupaj llandupica, ashtaca llactacunapashmi causanajurca.

⁷Paipaj sapicuna ashtaca yacu manñapi cashcamandami, jatun malquicuna tucushpa, ninanda viñashpa juyailla tucurca.

⁸Chai quirutaca, Taita Diospaj huertapi tiaj cedro quirucunapash, na yali jatunllu carca. Haya nishca quiru malquicunapash, na paipaj malquicunashna carcachu. Castaño nishca quirucunapash, na paishna malquisapa carcachu. Taita Diospaj huertapica, maijan quirupash na paishna juyaillaguca tiarcachu.

⁹Paipaj ashtaca malquicunahuanmi juyaillaguta rurarcani. Chaimandami, Taita Diospaj Edén shuti huertapi tiaj tucui quirucunaca, ñuca chashna cashcaiman yashpa ricunajurca’ ningui” nihuarcami.

¹⁰Chaimandami Mandaj Jatun Diosca, cashna nijurca: “Paica, tucuicunata yali jatunda viñashcamanda, malqui junda cashcamanda, chaupipi jatun ñavita charishcamandami, paipaj shungupica ninanda jariyajurca.

¹¹Chaimandami paitaca, shuj llactacunapi causanajuj ninan ushaita charijcunaman cusha. Paicunaca, pai nalita rurashcashnallata llaquichingapachami. Paitaca, ñucami shitashpa saquircani.

¹²Paitaca, caru llactamanda shamujcunami tucuchinajunga. Shuj llactacunapi causanajuj ninan ushaita charijcunami, paitaca urmachinajunga. Shinamandami, tucui paipaj malqui fangacunaca urcu jahuacunapi, pugru pambacunapi, tucui llactacunapi tiaj jatun larca yacucunapi urmashpa faquirijunga. Shinallata chai quiru ucupi llandushpa causanajuj shuj llactacunamanda, gentecunapashmi, paitalla saquishpa rinajunga.

¹³Chai quiru urmashca jahuapimi, jahuata rij alasyu tucui animalcuna causanajunga. Chai malqui jahuacunapimi, pambapi causaj tucui animalcuna sirinajunga.

¹⁴Yacu manñapi viñaj tucui quirucuna yapa jatun cashpalla, ama jatun tucunajuchun, fanga junda malquicunata ama yalishpa viñachun, yacuta chupashpa viñashcacunapash, ama cungashca causanajuchunmi, chashna ruranga. Tucuicunallatami huañushpa, ucu ucu alpaman rina canguichi. Cangunapash, huañuna aichayu runacunandimi, cai pacha alpa ucuman ringuichi. Ucu jatun utujumanllatami urai ringuichi” nircami.

¹⁵Mandaj Jatun Diosca, cashnami nijurca: “Seolman pai uriajuj punllapillatami, yana churajunata churachircani. Manllanayai ucu ucupi tiaj yacuhuanmi quilparcani. Paicunapaj jatun yacucunatapash, ashtaca yacucunatapashmi jarcarcani. Paimandami, Líbano urcutapash yana yana tutahuan quilparcani. Pambapi shayanajuj quirucunapashmi, shaijunshna urmanajurca.

¹⁶Urmachishpa culun nichishpami, llactacunatapash chujchuchircani. Pambana utujuman tucui rijcunahuan, Seolman urai cachajushpami chashna rurarcani. Shinallata Edén huertapi tiaj agllashca quirucunapash, Líbano urcupi tiaj tucuimanda yali ali quirucunapash, yacuta chupaj tucui quirucunapash, cai pacha alpa ucupimi cushijunajurca.

¹⁷Paicunapashmi, paihuanllata Seolman urai rinajurca. Espadahuan huañuchi tucushcacunapash, paipaj rigrashna cashcacunapash, shuj llacta chaupicunapi cashpa, pai llandujpi causajcunapashmi urai rinajurca.

¹⁸Can juyailla canata, jatun tucushca canataca, ¿Edén huertapi tiaj quiru puracunamandaca, maijan quiruhuanda chimbapurarishcangui? Ashtahuangarin Edén shuti huertapi quirucunandillatami, cai pacha alpa ucuman shitai tucungui. Circuncisión nishcata na rurai tucushca puracunahuan, espadahuan huañuchi tucushca puracunahuanmi sirigringui. Caica Faraonhuan, paipaj tucui gentecunahuanmi chashna canga” nijurcami Mandaj Jatun Diosca.