Read Imbabura Highland Quichua EZEQUIEL 32 Bible Online

EZEQUIEL 32 - Imbabura Highland Quichua bible

EZEQUIEL 32

¹Chunga ishcai huatapaj chunga ishcai quilla punda punllapimi, cashna tucurca: Mandaj Diosca cai shimicunatami, cashna nishpa villahuarca:

²“Huañuna aichayu runa. Egipto llactata jatun mandaj Faraonmandaca, yarishpa yarishpa cashna nishpa huacayari: ‘Canga, shuj llacta puracunapica, huahua leonshnami cangui. Mama cucha yacucunapi causajuj dragonshnami cangui. Cambaj jatun yacucunatapashmi, chaquichin carcangui. Cambaj chaquihuan sarushpami, chai yacucunatapash mapayachin carcangui. Chai yacu manñacunatapashmi, sarushpa purin carcangui’ nishpa huacayari” nihuarcami.

³Mandaj Jatun Diosca, cashnami nijurca: “Ñucaca, ashtaca gentecunata tandachimushpami, ñuca linllita cambaj jahuapi shitasha. Ñuca linllihuanmi, candaca vichai apanajunga.

⁴Candaca alpapillami saquisha, alpa jahuapimi shitashpa saquisha. Jahuata rij alasyu tucui animalcunataca, cambaj jahuapimi tiarichun saquisha. Tucui cai pachapi tiaj tucui animalcunamambashmi, na munangacaman micuchun carasha.

⁵Cambaj aichacunataca, urcucunapimi churasha. Cambi causajcuna huañushcacunataca, pugru pambacunapimi jundachisha.

⁶Cambaj yahuartaca, llactapi tiaj can huambujushca yacupillatami jichasha. Cambaj yahuarca, urcucunacamanmi jicharinga, jatun larca yacucunapipashmi jundanga.

⁷Canda huañuchishca jipaca, jahua pachatapashmi quilpasha. Jahua pachapi tiaj luzerocunatapashmi yanayachisha. Inditapash, fuyuhuanmi quilpasha. Lunapash na punchayachimungachu.

⁸Canmandami, jahua pachapi tiaj tucui punchayachijcunatapash yanayachisha. Cambaj llactapica, yana yana tutatami churasha. Mandaj Jatun Dios ñucami, chashna nini.

⁹Llacta puracunamanda can na rijsishca shuj llactacunaman cambaj puracunata prezu apashpami, ashtaca gentecunapaj shungupi llaquillata saquisha.

¹⁰Canmandami, ashtaca gentecunata muspayachishpa saquisha. Cambaj jahuami, paicunata jatun mandajcunapash ninanda manllarinajunga. Ñuca espadata paicunapaj ñaupajpi punchalla llujchijpimi, chashna tucunajunga. Canda llaquichijui punllapica, paicunapaj yuyaipi ninanda manllarishpami, cutin cutin chujchunajunga” nihuarcami.

¹¹Ashtahuangarin Mandaj Jatun Diosca, cashnami nijurca: “Babilonia llactata jatun mandajpaj espadami, cambajman shamunga.

¹²Cambaj gentecunataca, ninan shinlli runacunapaj espadahuanmi huañuchishpa urmachisha. Tucui paicunami, llactacunapi ninan ushaita charijcuna canga. Paicunami, jariyashca Egipto llactataca tucuchinga. Chaipi tucui ashtaca gentecunapash, shitai tucushcami canga.

¹³Ashtaca yacucunapi causaj tucui millai animalcunatapashmi tucuchisha. Chai yacucunataca, runapaj chaquihuambash, animalpaj silluhuambash, na ashtahuan sarushpa mapayachinajungachu.

¹⁴Ashtahuangarin cambaj yacucunataca, mapa illajtami rurasha. Shinallata jatun yacucunataca, aceiteshna richunmi saquisha. Mandaj Jatun Dios ñucami, chashna nini.

¹⁵Egipto llactataca jichushcata saquijpi, chaipi imalla tiajcunatapash quichushpa tucuillata apajpi, chaipi causajcunatapash tucuillata huañuchijpimi ñucataca, Mandaj Dios cajta yachanajunga.

¹⁶Cai shimicunaca, yarishpa yarishpa huacanami. Cai candanatami candanajunga. Shuj llactacunapi causaj huarmicunami candanajunga. Egipto llactamandapash, chaipi tucui causajcunamandapashmi, yarishpa yarishpa huacanajunga” nijurcami Mandaj Jatun Diosca.

¹⁷Chunga ishcai huatapaj callari quilla chunga picha punllapimi, cashna tucunga: Mandaj Diosca, cai shimicunatami cashna nishpa villahuarca:

¹⁸“Huañuna aichayu runa. Egipto llactapi causanajuj ashtaca gentecunamandaca, yarishpa yarishpa huacayari. Paitapash, ninan ushaita charij llactacunapi causaj huarmicunatapash, pambana utujuman urai rijcunandi, cai pacha alpa ucu ucuman shitayari.

¹⁹Canga, juyaillagu cashcamanda, circuncisionda na rurashcacunandi siringapaj urai riyari.

²⁰Espadahuan huañuchi tucushca puracunahuanmi urmanga. Paitaca, espadahuan huañuchi tucushca cachunmi curcani. Egipto llactatapash, chaipi tucui causajcunatapash apamuichilla.

²¹Egipto llactataca, tucuita yali ninan ushaita charijcunapash, chai llactatallata ayudajcunapashmi, Seol chaupimanda rimanajunga. Paicunaca, espadapi huañuchi tucushpa, circuncisionda na rurashcacunahuan, Seolman urai rishpami chaipi sirinajun.

²²Asiria llactapash, paipaj tucui ashtaca gentecunandi chaipimi. Paita pambashca muyundipica, paipaj gentecunata pambashca utujucunami tiajun. Paicunapash tucuillami, espadahuan huañuchi tucushpa urmarca.

²³Paicunata pambashca utujucunaca, jatun utuju ladopimi tiajun. Shinallata paita pambashca muyundipica, paipaj gentecunata pambashca utujucunami tiajun. Paicunapash tucuillami, espadahuan huañuchi tucushpa urmarca. Paicunaca, cai pachapi causajcunata manllachijcunami carca.

²⁴Elam shuti llactapash chaipimi. Paita pambashca muyundipica, tucui ashtaca gentecunata pambashca utujucunami tiajun. Paicunaca tucuicunami, espadahuan huañuchi tucushpa urmarca. Circuncisionda na rurashca runacunaca, cai pachapi causajcunata ninanda manllachipa causashcamandami, cai pacha ashtahuan ucuman pambai tucunajurca. Paicunapash, pambai tucushca puracunahuanllatami, pingai tucunajurca.

²⁵Paitapash, paipaj tucui ashtaca gentecunatapash, huañushcacunapaj chaupipimi camapi churanajurca. Paipaj muyundipica, paipaj gentecunata pambashca utujucunami tianajun. Tucui paicunapash, circuncisionda na rurashcacunami carca. Cai pachapi causajcunata ninanda manllachishcamandami, espadahuan huañuchi tucunajurca. Ashtahuangarin paicunapash, pambana utujuman urai rijcunahuanllatami pingai tucunajurca. Huañushcacunapaj chaupipimi, paipash churai tucurca.

²⁶Mesec shuti, Tubal shuti llactacunapash, paicunapaj ashtaca gentecunandi chaipimi. Paita pambashca muyundipica, paipaj gentecunata pambashca utujucunami tianajun. Paicunapash, cai pachapi causajcunata ninanda manllachishcamandami, tucuicuna circuncisionda na rurashcacuna, espadahuan huañuchi tucushcacuna carca.

²⁷Circuncisionda na rurashca, shinlli runacuna jatun macanajuipi huañushpa sirinajuj runacunahuanga, na siringachu. Paicunaca, jatun macanajuipi macanajunacunandimi, Seolman urai rinajurca. Espadatapash saunachishpami cachanajurca. Cai pachapi ninan ushaita charijcunatapash manllachishcamandami, paicunapaj juchacunaca paicunapaj tullucunapillata canga.

²⁸Egipto llactalla, canga circuncisionda na rurashcacunahuanmi llaquichi tucungui. Cambash, espadahuan huañuchi tucushcacunahuanmi siringui.

²⁹Edom shuti shuti llactapash, chai llactata jatun mandajcunapash, paicuna churashca tucui mandajcunapash chaipimi. Paicunaca, ninan ushaita charishca cashpapash, espadahuan huañuchi tucushcacunahuanmi urai rinajurca. Paicunaca, circuncisionda na rurashcacunandi pambana utujuman, huañushpa urai rishcacunandimi sirinajunga.

³⁰Jahua lado llactata tucui mandajcunapash, Sidón shuti pueblopi tucui causajcunapash chaipimi. Paicunaca, manllachijcuna cashpapash, ninan ushaita charijcuna cashpapash pingai tucushpami, huañushcacunahuan urai rinajurca. Espadahuan huañuchi tucushcacunahuanmi, circuncisionda na rurashcacuna sirinajun. Paicunapash, huañushcacuna pambai tucuna utujuman urai rijcunahuanllatami pingai tucunajun.

³¹Cai tucui huañushcata ricushpami Faraonga, na paipaj ashtaca gentecunalla huañushcata ricushpa cushijunga. Faraonbash, paipaj tucui soldadocunapash, espadahuanmi huañuchi tucurca. Mandaj Jatun Dios ñucallatami, shina nini.

³²Ñucami, cai pachapi causajcunapaca, manllaita churarcani. Chaimandami Faraonbash, paipaj tucui ashtaca gentecunapash, espadahuan huañuchi tucushcacunahuan, circuncisionda na rurashcacuna sirinajunga” ninmi Mandaj Jatun Diosca.