Read Imbabura Highland Quichua EZEQUIEL 33 Bible Online

EZEQUIEL 33 - Imbabura Highland Quichua bible

EZEQUIEL 33

¹Mandaj Diosca cai shimicunatami, cashna nishpa villahuarca:

²“Huañuna aichayu runa, cambaj llacta puracunaman cashna nishpa villai: ‘Ñuca espadata cai llactaman cachamujpica, cai pachapi causaj gentecunaca, paicunapaj llacta puramanda shuj runata agllashpami, chapariashpa cuidachun churanajunga.

³Chai runaca, ñuca espada chai llactaman shamujujta ricushpaca, trompetata huacachishpami gentecunaman villanga.

⁴Maijan cashpapash chai trompeta huacajta uyashpapash na pacajushcamandami, espada shamushpa chugrichishpa huañuchinga. Shina huañuchijpica paipaj yahuarca, paipaj jahuallatami canga.

⁵Chai trompeta huacajta uyashpapash na pacajushcamandami, paipaj yahuarca paipaj jahuallata canga. Ashtahuangarin trompeta huacajta uyashpa pacajushpaca, paipaj causaitami quishpichinga.

⁶Ashtahuangarin espada shamujujta ricushpapash, chapariashpa cuidaj chai runa trompetata na huacachijpica, gentecunaca na pacajungachu. Shinamandami espada shamushpaca, chai pueblopi causaj puramandaca, maijanda cashpapash paipaj juchamanda huañuchinga. Ashtahuangarin paipaj yahuarca, chapariashpa cuidaj chai runapaj jahuami canga.

⁷Huañuna aichayu runa. Candaca, israelcunata chapariashpa cuidaj cachunmi churarcani. Cunanga, ñuca imatalla nishcata ali uyangui. Paicunataca, ñucapaj randi shinllitapacha tacuringui.

⁸Ñucaca, ñucata na manllaj runataca: Ñucata na manllashcamandaca, huañunapachami cangui nishami. Shina nijpipash ñucata na manllaj runa nalita ruranata saquichun, can na villajpica, ñucata na manllaj runaca, paipaj juchamandami huañunga. Ashtahuangarin paipaj yahuarca, cambaj jahuami canga.

⁹Ashtahuangarin ñucata na manllaj runa nalita runata saquichun, can rimashca jahua na saquishpaca, paipaj juchamandami huañunga. Ashtahuangarin canga, cambaj causaitaca quishpichinguimi’ nishpa villai.

¹⁰Huañuna aichayu runa. Canga, israelcunataca cashna ni: Cangunaca, cashna nishpami rimarcanguichi: ‘Ñucanchi na cazushcapash, ñucanchi juchacunapash ñucanchi jahuallatami. Shinamandami ñucanchica tucurinajunchi. Shina cashpaca, ¿imashnata causashunyari?’ nircanguichimi ni.

¹¹Cashnatapash ningui: Mandaj Jatun Diosca, cashnami nin: ‘Ñucaca causajunipachami. Ñucata na manllaj runa huañuchunga, na munanichu. Ashtahuangarin ñucata na manllaj runaca, pai imashna causajushcata saquishpa, causaita charichunmi munani. Shina cashcamanda nalita ruranajushcata saquishpa, ñucapajman tigrarimuichiyari, tigrarimuichiyari. Israelcunalla, ¿imashpata huañunguichiyari?’ ninmi ningui.

¹²Huañuna aichayu runa. Cambaj llacta puracunataca, cashna ni: ‘Maijambash ñucata na manllashpa jariyajui punllapica, imatapash cashcatapacha ruraj runa, imatapash cashcatapacha rurashcapash na quishpichingachu. Shinallata ñucata na manllaj runa nalita rurashcapash, nalita rurashcata saquishpa ñucapajman tigrarimujpica na jarcangachu. Imatapash cashcatapacha ruraj runa juchata rurashpaca, imatapash cashcatapacha rurashcamandaca na causangachu’ ni.

¹³Ñucaca, imatapash cashcatapacha ruraj runataca: ‘Causanguipachami’ nishami. Shina nijpica paica, imatapash cashcatapacha rurajmi cani yashpami, nalita ruranga. Shina rurajpica, tucui imatapash cashcatapacha pai rurashcacunataca napacha yarishachu. Ashtahuangarin nalita rurashcamandaca huañungapachami.

¹⁴Shinallata ñucata na manllaj runataca: ‘Huañunapachami cangui’ nishami. Shina nijpica nalita ruranata saquishpa, ñucapajman tigrarimushpa ima pandatapash na rurashpa, imatapash cashcatapachami ruranga.

¹⁵Shinallata ñucata na manllaj runaca, prendata quichushcatapash cutin tigrachishpami, imata shuhuashcatapash tigrachinga. Shina rurashpaca, pactachinajuchun cushca causaita cuj shimicunatapash pactachishpami, ima nalitapash na rurashpa causanga. Shina causashpaca na huañungachu, causangapachami.

¹⁶Shina rurajpica, pai juchata punda rurashcacunataca, maijan juchatapash na yarishachu. Alita rurashpa, imatapash cashcatapacha rurashpami causanga. Shina rurashpaca causangapachami.

¹⁷Chaicunata rurajta ricushpaca, cambaj llacta puracunaca: ‘Jatun Diosta catishpa causanaca, napacha alichu’ ninajungami. Ashtahuangarin paicuna nalita rurashpa causashcamari nali.

¹⁸Imatapash cashcatapacha ruraj runa imatapash cashcatapacha ruranata saquishpa nalita rurashpaca, chai nalita rurashcamandaca huañungapachami.

¹⁹Shinallata ñucata na manllaj runapash, nalita ruranata saquishpa, ima pandatapash na rurashpa, imatapash cashcatapacha rurashpaca, chai alita rurashcamandaca causangapachami.

²⁰Cangunaca: ‘Jatun Diosta catishpa causanaca, napacha alichu’ ninajurcanguichimi. Israelcunalla, canguna imashna causashcataca ñucami tucuicunaman ricuchisha” nihuarcami.

²¹Ñucanchica, ñami chunga ishcai huatata prezu tianajurcanchi. Chai huatapimi, cashna tucurca: Chunga quillapaj picha punllapimi shuj runaca, Jerusalenmanda pacajushpa ñucapajman shamurca. Chai runaca: “Pueblotaca ñamari quichushca” nishpami villahuarca.

²²Pacajushpa shamuj chai runa, tutamandata ñucapajman nara shamujpillatami Mandaj Diosca, chishillata paipaj maquita ñuca jahuapi churashpa, cutin rimachihuarca. Shina rimachijpimi, cutinga na upalla quedarcani.

²³Mandaj Diosca cai shimicunatami, cashna nishpa villahuarca:

²⁴“Huañuna aichayu runa. Llaquinayaita tucuchi tucushca Israel llactapi causajcunaca, cashna nishpami rimanajun: ‘Abrahamga shujllami carca. Shina cashpapash, cai llactataca japircallami. Ñucanchicarin taucacunamari canchi. Cai llactataca, ñucanchipaj cachunmi ñucanchiman cararca’ ninajunmi.

²⁵Shina cashcamanda, cashna nishpa villai: Mandaj Jatun Diosca, cashnami nin: ‘Cangunaca aichatapash, yahuarcunandimi micunguichi. Yanga dioscunatapashmi vichai ricunguichi, huañuchishpa yahuarta jichajcunapashmi canguichi. Shina ruranajushpapash, ¿llactata japinallachu canguichi?

²⁶Cangunaca, espadatalla yarishpa causashpami, millanayaita rurarcanguichi. Tucuicunami, cumba runagupaj huarmita nalita rurashpa mapayachircanguichi. Shina ruranajushpapash, ¿llactata japinallachu canguichi?’ ninmi nishpa villai.

²⁷Paicunataca cashna ningui: Mandaj Jatun Diosca, cashnami nin: ‘Ñucaca causajunipachami. Llaquinayaita tucuchi tucushca llactapi causajcunaca, espadahuanmi huañuchi tucunga. Pambacunapi causajcunataca, millai animalcunaman micuchunmi cusha. Shinlli torrecunahuan jarcashca pueblocunapi, jatun utujucunapi causajcunaca, jatun ung:uihuanmi huañunga.

²⁸Chai llactataca, jichushca pambata, chulunlla pushtutami saquisha. Ninan ushaita charishpa jariyashpa causanaca chingangami. Israel llactapi tiaj urcucunapash, llaquinayaitami tucuchi tucunga. Chai urcucunapica, pipash na puringachu.

²⁹Chai tucui millanayaicunata rurashcamanda, chai llactataca chulunlla pushtuta, jichushca pambatalla saquijta ricushpami ñucataca, Mandaj Dios cajta yachanajunga’ ninmi nishpa villai.

³⁰Huañuna aichayu runa. Cambaj llacta puracunaca, pata ladocunapi, huasi pungucunapi shayarishpami, can rimashcataca nalicachishpa asinajun. Paicuna purapash, caishuj chaishujmi: ‘Mandaj Dios imatalla villachishcata uyangapaj shamuichi’ ninajun.

³¹Paicunaca, ñuca agllashca gentecunashnami cambajman shamunajunga. Ñuca agllashca gentecunashna, can imatalla rimashcata cambaj ñaupajpi uyashpapash, na pactachinajungachu. Ashtahuangarin mishqui shimicunahuan rimashpapash, shungupica charijyanatalla munashpami purinajunga.

³²Ricui, canga paicunapaca juyaimanda candaj runashnami cangui. Juyaillaguta tigrachishpa ali candaj runashnami cangui. Paicunaca, can villashcacunata uyashpapash, chaitaca na pactachinajungachu.

³³Cai shimicunaca pactamungami, (ñallami pactamunga). Shina pactamujpimi, profeta runa paicuna purapi tiashcata yachanajunga” nihuarcami.