Read Imbabura Highland Quichua EZEQUIEL 35 Bible Online

EZEQUIEL 35 - Imbabura Highland Quichua bible

EZEQUIEL 35

¹Mandaj Diosca cai shimicunatami, cashna nishpa villahuarca:

²“Huañuna aichayu runa. Canga, Seir shuti urcuman ricushpa, paita imashna llaquichinata villai.

³Paitaca cashna ningui: Mandaj Jatun Diosca, cashnami nijurca: ‘Seir shuti urculla, ricui canhuanga fiñarishcami cani. Candaca, ñuca maquita chutashpami llaquichisha. Jichushca pambata, chulunlla pushtutami saquisha.

⁴Cambi tiaj pueblocunatapash, llaquinayaitami tucuchisha. Cambashmi, llaquinayaita tucuchi tucungui. Shina rurajpimi ñucataca, Mandaj Dios cajta yachangui.

⁵Tucui causaipi fiñanajushpalla causajushcamandami, candaca chashna rurasha. Israelcunataca, ninan llaquita apanajui punllacunapimi, espadahuan huañuchijcunaman japishpa curcangui. Ninandapacha llaquichi tucunajui punllapimi, chashna rurarcangui.

⁶Chaimandami Mandaj Jatun Dios ñucaca, cashna nini: Ñucaca causajunipachami. Candapash yahuarta jichai tucuchunmi saquisha. Candaca huañuchishpa yahuarta jichangapajmi catinajunga. Huañuchishpa yahuarta jichanata saquingapaj can na munashcamandami, candapash huañuchishpa yahuarta jichangapaj catinajunga.

⁷Seir shuti urcutaca, jichushca urcuta, chulunlla urcutami saquisha. Shinallata chaipi causajcunataca rijtapash, shamujtapashmi huañuchisha.

⁸Cambaj urcucunapica, chaipi causajcuna huañushcatami jundachisha. Cambaj lomacunapipash, pugru pambacunapipash, cambaj jatun larca tucui yacucucunapipash, espadahuan huañuchijpimi urmanajunga.

⁹Candaca, tucui causaipajmi llaquinayaita tucuchisha. Cambaj pueblocunatapash, na ashtahuan cutin shayachinajungachu. Shina rurajpimi ñucataca, Mandaj Dios cajta yachanguichi.

¹⁰Canga cashnami nircangui: Ishcandi llactacuna, ishcandi alpacunami ñucapaj canga. Chaicunataca, ñucapajlla cachunmi japisha nircanguimi. Mandaj Diospash chaipi cajpillatami, chashna nircangui.

¹¹Chaimandami Mandaj Jatun Dios ñucaca, cashna nini: Ñucaca causajunipachami. Imashna can ninanda fiñarishcashnallatami fiñarisha. Ninanda can fiñarishpa llaquichishcashnallatami llaquichisha. Israelcunahuan fiñanajushpa causashpami, chashna rurajurcangui. Canda chashna llaquichijpimi israelcunaca, ñucataca rijsinajunga.

¹²Canga, Israel llactapi tiaj urcucunata ninanda fiñashpa nalicachishpa can rimashcata, Mandaj Dios ñuca uyashcataca yachanguimi. Canga cashnami nircangui: Urcucunaca tucuchi tucushcamari. Micunshna tucuchinajuchunmi, ñucanchiman cushca nircanguimi.

¹³Canga, ñucata ninanda fiñashpa jariyashpami nalicachishpa rimahuarcangui. Chaitaca ñucallatami uyarcani’ ninmi ningui” nihuarcami.

¹⁴Mandaj Jatun Diosca, cashnami nijurca: “Candaca, tucuicuna ricushpa cushijunajuchunmi, llaquinayaita saquisha.

¹⁵Canga, israelcuna causanajuj ñuca carashca llacta llaquinayaita tucuchi tucushcata ricushpapash cushijurcanguimi, chashnallatami candapash rurasha. Seir shuti urcuca llaquinayaitami tucuchi tucunga, tucui Edom llactami, chaipi tucui causajcunandi llaquinayaita tucuchi tucunga. Shina rurajpimi ñucataca, Mandaj Dios cajta yachanajunga.