Read Imbabura Highland Quichua EZEQUIEL 36 Bible Online

EZEQUIEL 36 - Imbabura Highland Quichua bible

EZEQUIEL 36

¹Huañuna aichayu runa. Israel llacta urcucuna imalla tucunata, cashna nishpa villai: Israel llactapi tiaj urcucunalla, Mandaj Dios imatalla nishcata uyaichi” nijurcami.

²Mandaj Jatun Diosca, cashnami nijurca: “Cangunata fiñajcunaca, cashnami ninajurca: ‘Jajai, causaita causaicaman tiaj urcucunatapashmi, ñucanchipaj cachun carashca’ ninajurcami.

³Shina cashcamanda ima tucunatapash, cashna nishpa villai: Mandaj Jatun Diosca, cashnami nin: ‘Cangunataca, tucui ladocunamanda shamushpami, langanshna llaquichishpa, llaquinayaita tucuchinajurca. Chashna rurajpimi, cangunataca shuj llactacuna japinajurca. Cangunataca, gentecuna ninanda nalicachishpa rimai tucuchunmi urmachirca.

⁴Shina cashcamanda Israel llacta urcucunalla, Mandaj Jatun Dios imatalla nishcata uyaichi. Mandaj Jatun Diosca, urcucunatapash, lomacunatapash, jatun larca yacucunatapash, pugru pambacunatapash, rumi mundunlla quedashcacunatapash, llaquinayaita tucuchi tucushca pueblocunatapash, imalla tiajta quichushpa apai tucushca pueblocunatapash, muyundi shuj llactapi causajcuna ninanda nalicachishca pueblocunatapash, cashnami nin:

⁵Shuj llactapi causajcunapash, Edom shuti llactapi causajcunapash, ñuca llactataca tucui shunguhuan cushijushpami, quichurishpa japinajurca. Chaipi causajcunataca, ninandapacha fiñashpami, prezu apanajurca. Shina rurashcamandami, ñucaca nina rupajunshna ninandapacha fiñarishpa rimarcani. Mandaj Jatun Dios ñucami, chashna nini.

⁶Shina cashcamanda Israel llacta imalla tucunataca, chai llactapi tiaj urcucunamambash, lomacunamambash, jatun larca yacucunamambash, pugru pambacunamambash, cashna nishpa villai: Mandaj Jatun Diosca, cashnami nin: Ricui, cangunaca shuj llactacunapi causajcuna ninanda nalicachishpa rimajpimi causarcanguichi. Shinamandami, nina rupajunshna ninandapacha fiñarishpa, paicunataca rimarcani.

⁷Chaimandami Mandaj Jatun Diosca, cashna nijurca: Cambaj muyundi llactacunapi causajcunaca rimajpi pingai tucungami nishpami, ñuca maquita alsashpa juramenturcani.

⁸Ashtahuangarin Israel llactapi tiaj urcucunalla, ñuca agllashca israelcunapaca, yuracuna viñashpa, micuna granocunata fucuichilla. Ñallami paicunaca tigramunga.

⁹Ricuichi, cangunamandaca ñucami shayarisha. Ñucami cangunapajman tigramusha. Cangunaca, yapushpami tarpui tucunguichi.

¹⁰Shinallata chaipi causanajuj israelcunataca, tucuicunatami ashtacata mirachisha. Pueblocunapipash taucacunami causanajunga, tucuilla urmashca huasicunatapash cutinmi shayachinajunga.

¹¹Cangunapi causanajuchunga runacunatapash, animalcunatapashmi, ashtacata mirachisha. Shina mirachijpimi, ashtacapacha miranajunga. Punda huatacunashnallatami, taucacuna causanajunga. Punda huatacunatapash yalitami, ashtaca alicunata carasha. Shina rurajpimi ñucataca, Mandaj Dios cajta yachanguichi.

¹²Cangunapica, ñuca agllashca Israel runacunatami purinajuchun churasha. Paicunapaj cachun paicuna japijpimi, canga paicunapaj cangui. Paicunapaj huahuacunataca, na cutinga huañuchinguichu.

¹³Mandaj Jatun Taita Dios ñucami, cashna nini: Cangunataca, cashnami ninajun: Runacunata micuj, llactapi causanajuj huahuacunata huañuchijmi canguichi ninajunmi.

¹⁴Shinamandami, runacunataca na ashtahuan tucuchingui. Cambaj llactapi causajcunapaj huahuacunatapash, na ashtahuan huañuchinguichu. Mandaj Jatun Dios ñucami, chashna nini.

¹⁵Shuj llactacunapi causajcuna nalicachishpa rimashca uyarichunga, ima horallapash na saquishachu. Shuj llactapi causajcunaca, na ashtahuan nalicachishpa rimangachu. Cambi causaj huahuacunatapash, na ashtahuan huañuchinguichu’ ninmi Mandaj Jatun Diosca” nijurcami.

¹⁶Mandaj Diosca cai shimicunatami, cashna nishpa villahuarca:

¹⁷“Huañuna aichayu runa. Israelcunaca, paicunapaj llactapi causanajushpaca, paicuna nalita rurashpa causajcunahuanmi mapayachinajurca. Paicuna, ñuca ñaupajpi nalita rurashpa causashcapash, quilla nanaihuan ungushca huarmi mapayachishcashnami carca.

¹⁸Huañuchishpa yahuarta alpapi jichashcamanda, paicunapaj yanga dioscunata mañashpa mapayashcamandami, ñuca ninanda fiñarishcataca talinshna, paicunapaj jahuapi cachamurcani.

¹⁹Shuj llactacunaman caita chaita cachajpimi, cai pachapica maitapash chajchushca quedarca. Paicuna imashna causashcashnallata, paicuna imashna rurashcashnallatami llaquichircani.

²⁰Chaimandami, shuj llactacunaman paicuna chayajpica, ñuca jucha illaj shutita yangapi churashpa, israelcunataca cashna ninajurca: ‘Caicunaca, Mandaj Diospaj gentecunami. Diospaj llactamandami llujshimushca’ nishpami rimanajurca.

²¹Ashtahuangarin paicuna causanajuj llacta puracunapica, jucha illaj ñuca shutita yangapi churashpa israelcuna rimanajujta ricushpami llaquirircani.

²²Shina cashcamanda israelcunataca, cashna ni: Mandaj Jatun Diosca, cashnami nin: ‘Israelcunalla, ima ruranatapash, cangunamandaca na ruranichu. Ashtahuangarin maijan llactaman chayashpapash, jucha illaj ñuca shutita yangapi churashpa canguna rimashcamandami, paicunataca llaquichigrini.

²³Shuj llacta puracunapi yangapi churashpa canguna rimashca, ñuca jatun shutitami, jucha illaj cajta ricuchisha. Chai llacta puracunapi causanajushpami, ñuca shutitaca yangapi churashpa rimarcanguichi. Ñuca chashna rurajta ricushpami ñucataca, Mandaj Dios cajta yachanajunga. Shuj llactacunapi causajcunapaj ñaupajpi, cangunamanda ñuca jucha illaj cajta ricushpami, chashna yachanajunga. Mandaj Jatun Dios ñucami, chashna nini.

²⁴Cangunataca ñucami, shuj llactacunamanda pushamusha. Tucui llactacunamanda tandachishpami, cangunapaj llactamanllata pushamusha.

²⁵Chaipimi cangunapaj jahuapica, mapa illaj yacuta tsirapachisha. Shina rurajpimi tucui ima mapata rurashcamandapash, mapa illaj quedanguichi. Shinallata cangunapaj tucui yanga dioscunata mañashcamandapashmi, mapa illajta saquisha.

²⁶Cangunapica, mushuj shunguta, mushuj espiritutami churasha. Cangunamandaca, rumi shunguta anchuchishpami, aicha shunguta cusha.

²⁷Cangunapica, ñuca Espiritutami churasha. Chashnami cangunaca, pactachinajuchun ñuca cushca shimicunata pactachishpa causanguichi. Imata rurachun ñuca mandashcatapashmi pactachinguichi.

²⁸Cangunapaj ñaupa taitacunaman carashca llactapimi causanguichi. Cangunaca, ñuca agllashcacunami canguichi, ñucapash cangunapaj Taita Diosmi casha.

²⁹Cangunataca, tucui mapamandami huacaichisha. Ashtaca trigota cayashpami, ninanda mirachisha. Shina rurashpaca, yarjai punllacunataca cutinga na cachamushachu.

³⁰Shuj llactacunapi causajcuna, canguna yarjaihuan cajta ricushpa ama cutin nalicachishpa rimanajuchunmi, quirucunapi fucuj, alpacunapi fucuj granocunataca ashtacatapacha fucuchisha.

³¹Nali ñangunata catishpa causashcatapash, tucui ima nalita rurashcapash, imapajpash nali cajtami yaringuichi. Canguna nalicunata rurashcamanda, millanayaicunata rurashcamandaca, cangunallatami pingai tucunguichi.

³²Caitaca, alimi yachana canguichi. Cai alicunataca, cangunamandaca na ruranichu. Israelcunalla, canguna nalita rurashcamandaca, cangunallata ninanda pingai tucushpa musparichi’ ninmi” Mandaj Jatun Diosca.

³³Mandaj Jatun Diosca, cashnami nijurca: “Cangunapaj tucui juchacunata anchuchijui punllallatami, pueblocunapi causachumbash churasha. Shinallata chai urmashca huasicunatapash, cutinmi shayachinguichi.

³⁴Cai llactataca, tucui yalijcunami llaquinayaita tucuchi tucushcata ricurca. Chashna tucuchi tucushcalla sirina randica, chai alpacunaca yapushcami canga.

³⁵Chaita ricushpami, cashna ninajunga: ‘Llaquinayaita tucuchi tucushca alpacunaca, Edén shuti huertashnami tucushca. Jichushca, llaquinayaita tucuchi tucushca, urmachishca sirij pueblocunatapash cunanga huasichishpami, muyundi pircashpa causanajun’ ninajungami.

³⁶Cangunapaj muyundi shuj llactacunapi causajcunaca, tucui urmachishcacunata ñuca cutin shayachishcatami yachanajunga. Llaquinayaita tucuchi tucushca alpatapash, ñuca tarpushcatami yachanajunga. Mandaj Dios ñucami, chashna nini. Chaitaca rurashapachami” nijurcami.

³⁷Mandaj Jatun Diosca, cashnami nijurca: “Israelcunaca, ñucata cutin mañanajungarami. Paicuna mañashcata uyashpami, chashna rurasha. Runacunataca, llamacunata mirachinshnami mirachisha.

³⁸Jatun fiesta punllacunapi, Jerusalenman apamushca ñucapajlla llamacunashnami, israelcunaca jichushca pueblocunapica jundanga. Chaita ricushpami ñucataca, Mandaj Dios cajta yachanajunga” nijurcami.