Read Imbabura Highland Quichua EZEQUIEL 38 Bible Online

EZEQUIEL 38 - Imbabura Highland Quichua bible

EZEQUIEL 38

¹Mandaj Diosca cai shimicunatami cashna nishpa villahuarca:

²“Huañuna aichayu runa. Magog shuti llactata mandaj Gog shuti runata fiñashpa ricushpa, paita llaquichinata villai. Paica Mesec shuti, Tubal shuti llactacunata jatun mandajmi.

³Canga cashna ningui: Mandaj Jatun Diosca, cashnami nin: ‘Mesec shuti, Tubal shuti llactacunata jatun mandaj Gog shuti runalla. Ricui, canhuanga fiñarishcami cani.

⁴Candaca ninanda llaquichishpami, cambaj quijadaspica, garfio nishca jirrucunata churachisha. Shina churachishpami candapash, cambaj tucui soldadocunatapash, caballocunatapash, caballocunapi tiarij soldadocunatapash, jarcarina jatun escudocunahuan, jarcarina uchilla escudocunahuan, alipacha alichirishca ashtaca gentecunata llujchishpa cachasha. Tucui paicunatami, espadata charinajujta llujchishpa cachasha.

⁵Persia, Cus, Fut shuti llactacunapi causajcunapashmi, canhuanga rinajunga. Paicunapash jarcarina escudocunandi, umapi churajushca jirrucunandimi rinajunga.

⁶Shinallata Gomer shuti llactapi causajcunapash, paicunapaj tucui soldadocunapash, jahua ladoman tiaj cai pacha manñamanda Togarma shuti llactapi causajcunapash, paicunapaj soldadocunapash, shuj ashtaca runacunapashmi canhuanga rinajunga.

⁷Shina cashcamanda cunanga cambash, canhuan tandanajushca tucui runacunapash, alichiringuichi. Canmi, paicunataca cuidangui.

⁸Cunanmanda ashtaca punllacuna yalijpimi, llaquichi tucuna cangui. Unai huatacuna yalishca jipami, espadamanda quishpirishca llactaman shamungui. Ashtaca gentecunamanda tandachishpa apamujpimi, Israel llacta urcucunaman shamungui. Chai urcucunaca, llaquinayaita tucuchi tucushcallami sirirca. Ashtahuangarin shuj llactacunamanda llujchimui tucushcamandami, tucui paicunaca imatapash na manllashpa causanajunga.

⁹Can vichai shamushpaca, ninan huairahuan tamiashnami shamungui. Cambash, cambaj tucui soldadocunapash, canhuan tandanajushca ashtaca runacunapash, fuyushnami chai llactataca quilpanguichi’ ninmi nishpa villai” nihuarcami.

¹⁰Mandaj Jatun Diosca, cashnami nijurca: “Chai punllapimi, cambaj shungupica, nali shimicunata rimana yuyaicunalla jundanga.

¹¹Chaimandami cashna yajungui: ‘Macanajunata na yachaj llactata llaquichingapaj vichai rishalla. Imatapash na manllashpa, casilla causajcunata llaquichigrishalla. Tucui paicunaca, jatun pircacunapash, aldabacunapash, pungucunapash illajmi causanajun.

¹²Paicunahuan macanajushpa quichungapaj, tucui imatalla charishcacunata apamungapaj, jichushca pambacunapi causajcuna imatalla charishcacunata cambaj maquihuan quichungapaj, shuj llactacunamanda tandachishca gentecunata llaquichingapajmi risha yajurcangui. Paicunaca animalcunata, ashtahuan imacunatapashmi, charij tucunajushca. Paicunaca, cai pacha chaupipimi causanajun’ yajunguimi.

¹³Sabá shuti, Dedán shuti llactacunapi causajcunapash, Tarsis pueblomanda randishpa jatujcunapash, tucui mandajcunapashmi, candaca cashna ninajunga: ‘¿Imatalla charishcacunata quichushpa apangapajchu shamurcangui? ¿Culquita, orota, animalcunata, ima shuj ashtaca charishcacunata, macanajushpa imatalla quichushcacunata quichushpa apangapajchu, cai tucui runacunata tandachishpa shamurcangui?’ ninajungami.

¹⁴Shina cashcamanda, huañuna aichayu runa. Gog shuti runaman, cashna nishpa villai: Mandaj Jatun Diosca, cashnami nin: ‘Chai punllacunapica, ñuca agllashca israelcuna, imatapash na manllashpa causanajujpica, ¿nacha yachangui?

¹⁵Canga, can causajushca pushtumandami shamungui. Cambash, canhuan tandanajushca ashtaca gentecunapashmi, jahua lado llactamanda shamunguichi. Tucui paicunaca, caballopi tiarishca ninan shinlli, ashtacapacha soldadocunami canga.

¹⁶Ñuca agllashca israelcunata llaquichingapaj vichai shamushpaca, fuyushnami llactata quilpangapaj shamunguichi. Gog shuti runalla, asha punlla jipacunami shuj llactacunapi causajcunapaj ñaupajpi, jucha illaj cajta ricuchingapaca, ñuca agllashcacunata llaquichijuchun, ñucallata candaca apamusha’ ninmi.

¹⁷Mandaj Jatun Diosca, cashnami nijurca: ‘¿Nachu canga, israelcunaman villaj ñucata servijcunahuan, punda huatacunallata villachishca runa cangui? Chai villajcunaca, ñuca canda pushamunataca, chai huatacunallatami villanajurca’ nijurcami.

¹⁸Mandaj Jatun Diosca, cashnami nin: ‘Israel llactata Gog shuti runa llaquichingapaj shamui huatacunapillatami, ñucapash ninandapacha fiñarisha.

¹⁹Ñucapajlla cachun munashpa, nina rupajunshna ninandapacha fiñarishpami, cashna nishpa rimani: Chai huatacunapica, Israel llactapica ninandami alpa chujchui tianga.

²⁰Mama cuchapi causaj pijicunapash, jahuata rij alasyu animalcunapash, sachapi causaj animalcunapash, alpata llucaj tucui culebracunapash, cai pachapi causaj tucui gentecunapash, ñuca ñaupajpimi chujchunajunga. Urcucunapash t'uniringami, jarcashca pircacunapash, muyundi jatun pircacunapash, tucuillami alpaman urmanga.

²¹Ñucapaj tucui urcucunamandami, Gog shuti runata huañuchinajuchun espadata cayasha. Mandaj Jatun Dios ñucami, chashna nini. Chaipica paicunapaj espadahuanllatami, huauqui purallata huañuchirinajunga.

²²Paitaca, jatun ung:uihuan, yahuarhuanmi ninanda llaquichisha. Shinallata paitapash, paipaj soldadocunatapash, paihuan tandanajushca ashtaca runacunatapash, manllanayai tamiahuan, rumishna runduhuan, nina rupajuj azufrehuanmi, ninanda llaquichisha.

²³Shina rurashpami, jatunyachi tucushca, alicachi tucushca, ashtaca llactacunapi causajcunapaj ñavipica rijsi tucushca casha. Shina cajpimi ñucataca, Mandaj Dios cajta yachanajunga’ ninmi ningui.