Read Imbabura Highland Quichua EZEQUIEL 39 Bible Online

EZEQUIEL 39 - Imbabura Highland Quichua bible

EZEQUIEL 39

¹Huañuna aichayu runa. Gog shuti runata llaquichinataca, cashna nishpa villai: Mandaj Jatun Diosca, cashnami nijurca: ‘Ricui, Mesec shuti, Tubal shuti llactacunata jatun mandaj Gog shuti runalla, canhuanga fiñarishcami cani.

²Candaca ninanda llaquichishpa pushamushpami, jahua lado llactacunamanda vichai pushamusha. Candaca, Israel llacta urcu jahuacunamanmi pushamusha.

³Cambaj lluqui lado maquipi charijuj arcotapash quichushami. Cambaj ali lado maquipi charijuj flechacunatapash cacharichishami.

⁴Cambash, cambaj soldadocunapash, canhuan rishca gentecunapash, Israel llacta urcucunapimi, huañushpa urmanguichi. Cangunataca, pai puralla mirashca jahuata rij alasyu millai animalcuna, sachapi causaj millai animalcuna micuchunmi cararcani.

⁵Ñucallata chashna nishcamandami, pamba jahuapi huañushpa urmangui. Mandaj Jatun Dios ñucami, chashna nini.

⁶Shinallata Magog shuti llactamambash, mama cucha manñacunapi imatapash na manllashpa causajcunamambash, ninatami cachamusha. Shina rurajpimi ñucataca, Mandaj Dios cajta yachanajunga.

⁷Shina rurashpami, jucha illaj ñuca shutitaca, ñuca agllashca israelcunaman rijsichisha. Chai jipami, jucha illaj ñuca shutitaca, na cutinga yangapi churachun saquisha. Shina rurajpimi, shuj llactacunapi causajcunapash ñucataca, israelcunapaj jucha illaj Mandaj Dios cajta yachanajunga.

⁸Ricuichi, ñuca llaquichina punllami chayamujun, chaica pactamungapachami. Chai punlla chayamunatami villajurcani. Mandaj Jatun Dios ñucami, chashna nini.

⁹Israel llactapi tiaj pueblocunapi causajcuna llujshishpami, ima macanajunacunata, jarcarina uchilla escudocunata, jarcarina jatun escudocunata, arcocunata, flechacunata, maquihuanlla shitana flechacunata, lanzacunatapash ninata japichishpa, canchis huatacaman rupachinajunga.

¹⁰Chaicunata rupachingapaca, na sachamanda yamdataca apagringachu, bosquemanda quirucunatapash na urmachingachu. Ashtahuangarin chai macanajunacunataca, ninapi rupachinajungallami. Paicunaca, paicuna imatalla charishcacunata quichujcunatallatami quichunajunga. Paicuna charishcata shuhuajcunatallatami shuhuanajunga. Mandaj Jatun Dios ñucami, chashna nini.

¹¹Chai huatacunami, Israel llactapica, Gog shuti runata maipi pambanatapash ricuchisha. Indi llujshimuj lado mama cuchaman rina pugru pambapimi ricuchisha. Chaipimi Gog shuti runatapash, paipaj ashtaca runacunatapash pambanajunga. Chaita purijcunapash, na ashtahuan chaita purinajungachu. Chai pugru pambataca, Hamón-gog[4] shutitami shutichinajunga.

¹²Israel llactataca, mapa illajta saquingapajmi, chai huañushcacunataca canchis quillacaman pambanajunga.

¹³Chai llactapi tucui causajcunami, chai huañushcacunataca pambanga. Ñucata jatunyachinajui punllami, paicunapajpash cushijushpa yarina punlla canga. Mandaj Jatun Dios ñucami, chashna nini.

¹⁴Tucui chai llactata purichunmi, culquipaj trabajaj runacunata japinajunga. Tucui chai llactapi huañushpa quedashcacunata pambangapajmi, chashna japinajunga. Israel llactata mapa illajta saquingapajmi, chashna ruranajunga. Ña canchis quilla jipami, chai llactata ricunajunga.

¹⁵Chai llactata purijcunami, maijambash runapaj tullucunata ricushpaca, chai ladopi shuj ricuchinata churanajunga. Huañushcacunata pambajcuna Hamón-gog shuti pugru pambapi chai tullucunata pambangacamanmi churashpa saquinga.

¹⁶Chai pueblotaca, Hamona[5] shutitami shutichinajunga. Shinami Israel llactataca, mapa illajta saquinajunga’ nishpa villai” nihuarcami.

¹⁷Mandaj Jatun Diosca, cashnami nijurca: “Huañuna aichayu runa. Chai puralla mirashca tucui alasyu animalcunatapash, tucui sacha animalcunatapash, cashna ningui: ‘Tucuicuna tandanajushpa shamuichi. Tucui ladomanda tandanajushpa, Israel llacta urcucunaman shamuichi. Chaipimi, ashtacacunata huañuchishpa, cangunaman carasha. Chaipica aichatami micunguichi, yahuartapashmi ufianguichi.

¹⁸Ninan shinlli runacunapaj aichatami micunguichi, llactata mandajcunapaj yahuartami ufianguichi. Paicunaca, Basán shuti urcupi virayashca jari llamacuna, maltun llamacuna, jari chivocuna, racu huagracuna, jari huagracunashnami.

¹⁹Cangunaman carangapaj ñuca huañuchishca animalcunapaj virataca, na munangacamanmi micunguichi. Yahuartapash, machangacamanmi ufianguichi.

²⁰Ñuca meza jahuapica, caballocunatapash, caballopi tiarij ninan shinlli runacunatapash, macanajuj tucui soldadocunatapash huañuchishpami churasha. Chaicunataca, na munangacamanmi micunguichi. Mandaj Jatun Dios ñucami, chashna nini.

²¹Shina rurashpami ñuca punchapambataca, shuj llacta puracunapi churasha. Shina rurajpimi, tucui llactacunapi causajcuna, aliguta ricushpa ñuca mandajushcata ñuca maquihuan llaquichishcata yachanajunga.

²²Israelcunaca, chai punllamandapachami ñucataca, paicunata Mandaj Taita Dios cajta yachanajunga.

²³Shuj llactacunapi causajcunaca, israelcuna ñucata jariyashpa, juchata rurashcamanda prezu apai tucushcatami yachanajunga. Paicunamanda ñuca ñavita ladoman churashpa, fiñajcunaman cujpi, espadahuan tucuilla huañuchi tucushcatapashmi yachanajunga.

²⁴Mapacunata paicuna rurashcashnallata, paicuna ñucata jariyashcashnallatami llaquichijurcani. Paicunata ama ricungapajmi, ñuca ñavitaca shuj ladoman churarcani’ ningui” nijurcami.

²⁵Shinamandami Mandaj Jatun Diosca, cashna nijurca: “Cunanga, Jacobopaj mirai israelcunataca, prezu causanajushcamandami tucuicunata llaquishpa tigrachimusha. Jucha illaj ñuca shutimandami, ñucapajlla cachun ninandapacha juyashcata ricuchisha.

²⁶Paicunaca, paicunapaj llactapica, pipash na llaquichijpimi, imatapash na manllashpa causanajunga. Shina causanajushpami paicunaca yachashpata, ñucata na cazushcata yarishpa pingai tucunajunga.

²⁷Shuj gentecunapaj chaupimanda llujchimushpa, paicunata fiñajcunapaj llactacunamanda tandachimujpi, ashtaca llactacunapi causajcunapaj ñaupajpi jucha illaj cajta ñuca ricuchijpimi, chashna canga.

²⁸Shuj llactacunaman prezu apashca cashpapash, paicuna puramandaca shujllatapash na saquishpa tandachishpami, paicunapaj llactapi causanajuchun churasha. Shina rurajpimi ñucataca, paicunata Mandaj Taita Dios cajta yachanajunga.

²⁹Paicunamandaca ñuca ñavitaca, na cutinga ladoman churashachu. Ashtahuangarin israelcunapica, ñuca Espiritutami churasha” nijunmi Mandaj Jatun Diosca.