Read Imbabura Highland Quichua EZEQUIEL 4 Bible Online

EZEQUIEL 4 - Imbabura Highland Quichua bible

EZEQUIEL 4

¹Huañuna aichayu runa. Canga, shuj adobeta japishpa, cambaj ñaupajpi churai. Chaipica, Jerusalén pueblo imashna canata rurangui.

²Chaipica, chai pueblota muyundi chaupipi churashpa shayanajujta rurangui. Shinallata paicunahuan macanajungapaj shinlli torretapash rurangui, baluarte nishcatapash llujchishpa churangui. Chai ñaupajpica, soldadocunapaj carpacunatapash rurangui. Caspicunahuan rurashca ariete nishcacunatapash, muyundi churangui.

³Shinallata shuj jirru tablata japishpa pircapaj randica, chai pueblohuan, canhuan shicanyachijuchun pircatashna churangui. Chai jipaca, chai pueblotaca chimbapura ricuriajunguilla. Chaica, muyundi jatun pircapaj randimi canga. Shinallata cambash, chai puebloman ashtahuan quimirishpa, chaupipi churangui. Chaica, israelcunaman shuj ricuchinata ricuchijujmi canga.

⁴Shinallata canga, lluqui ladoman siriringui. Israelcunapaj juchataca, chai jahuapi churangui. Lluqui ladoman mashna punllata puñushpapash, canllatami paicunapaj juchataca, apana cangui.

⁵Paicuna juchata rurashca huatacunataca, quimsa patsaj iscun chunga punllacunatallami, canman ricuchircani. Chashnallatami canga, israelcunapaj juchataca, apana cangui.

⁶Ña chai punllacunata pactachishca jipaca, ali ladomanmi cutin siririna cangui. Shinallata Judá llactapi causajcunapaj juchataca, chuscu chunga punllacunatami, apana cangui. Shuj huatamandaca, shuj punlla shuj punllami canman curcani.

⁷Jerusalenda muyundi chaupipi churashpa shayajujtaca, cambaj ñavihuambacha ricushpami, cambaj rigratapash pascashpa, ñuca ima nishcata villangui.

⁸Ricui, candaca huatashpami saquircani. Chaimandami caishuj ladomambash, chaishuj ladomambash na tigrari ushangui. Can llaquichi tucuna punllacuna pactangacamanmi, chashna sirijungui.

⁹Canga trigota, cebadata, jabasta, lentejasta, millo nishca granota, avenata tandachishpa, shuj fundupi churangui. Chaicunataca, shuj ladomanlla can sirijushca punllacunapimi, quimsa patsaj iscun chunga punllacaman, punllandi tandata rurashpa micujuna cangui.

¹⁰Chai micunataca, micuna horaspillami ishcai patsaj ishcai chunga pusaj gramota punllandi micuna cangui.

¹¹Shinallata yacutapash, shuj litrota medishpami, ufiana horaspilla ufiana cangui.

¹²Shinallata runa mapayachishca huanuta rupachishca uchufapimi, cebada tandata cusashpa, micuna cangui. Chai tandataca, paicuna ricujta cusangui” nihuarcami.

¹³Mandaj Diosca, cashnatapashami nihuarca: “Israelcunata maijan llactacunaman ñuca llujchishpa cachajpipash, paicunaca cashna mapa micunatallami micunajunga” nihuarcami.

¹⁴Shina nijpimi ñucaca, cashna nircani: “¡Aij, Mandaj Jatun Dioslla! Ricui, ñuca shunguca na mapachu capani. Ñucaca, chaira viñaimandapacha cunan cai huatacaman paimandallata huañushca aichata, sacha animal huañuchishca aichata, ima shuj mapa aichataca, ima horallapash na micushcanichu. Ima horallapash na ñuca shimipi churashcanichu” nircanimi.

¹⁵Shina nijpica, cashna nishpami tigrachihuarca: “Ricui, cambaj tandataca runapaj huanuhuan cusangapaj randica, huagrapaj huanuhuan cusachunmi saquini” nihuarcami.

¹⁶Chai jipaca, cashnami nihuarca: “Huañuna aichayu runa. Ricui, Jerusalenbica micushpa shinlli tucunatapash tucuchishami, pezashcatallami llaquilla micunajunga. Yacutapash, medishpallami manllai manllailla ufianajunga.

¹⁷Micunapash, yacupash tucurijpica manllarishpami, caishuj chaishuj ñavitalla ricurinajunga. Paicunallata nalita rurashcamanda tucurinajuchunmi, chashna rurasha.