Read Imbabura Highland Quichua EZEQUIEL 40 Bible Online

EZEQUIEL 40 - Imbabura Highland Quichua bible

EZEQUIEL 40

¹Ñucanchica, ñami ishcai chunga picha huatata prezu causanajurcanchi. Chai huatapaj callari quilla chunga punllapimi, Mandaj Diosca paipaj maquita ñuca jahuapi churashpa, israelcunapaj llactaman apahuarca. Jerusalén pueblota quichushcapash, ñami chunga chuscu huata tucushca carca.

²Taita Diosmi ñucataca, muscuipishna Israel llactaman apashpa, chai llactapi tiaj jatun urcu jahuapi churahuarca. Chai urcu ura ladopica, jatun puebloshnalla shuj huasimi tiashca carca.

³Chaimanmi ñucataca apahuarca. Chaipica, bronceshnalla punchapamba runatami ñapash ricurcani. Paica, lino pucha caupushca cordeltapash, medina caspitapash maquipi charishcami pungupi shayajurca.

⁴Chai runaca, cashnami nihuarca: “Huañuna aichayu runa. Cambaj ñavihuambacha ricui, cambaj rinrihuambacha uyai. Ñuca imata ricuchishcatapash, cambaj shungupi alichi. Candaca, caicunata ricuchunmi caiman pushamurca. Can ricushcataca, tucuita israelcunaman villai” nihuarcami.

⁵Shina nijpimi, chai huasi muyundipica, ñapash shuj pirca ricurirca. Chai runa charijuj medina caspica, quimsa metro ishcai chunga centimetromi carca. Chai medina caspihuanmi, pircata medijurca. Chaica, quimsa metro ishcai chunga centímetro ancho pircami carca. Shinallata quimsa metro, ishcai chunga centímetro jatunmi carca.

⁶Chai jipaca, indi llujshimuj ladoman tiajuj pungu ladoman shamushpami, gradascunata vichai rishpa, punguta charijuj caspicunata medijurca. Chai caspicunaca, caishuj ladopash, chaishuj ladopash quimsa metro ishcai chunga centimetromi carca.

⁷Tucui ucucunami, largomambash, anchomambash, quimsa metro ishcai chunga centímetro carca. Chai ucucunaca tucui ucucunami, ishcai metro, sucta chunga centímetro carupi rurashca carca. Shinallata chai ucucunaman yaicuna pungu ucu ladoman shayanajuj pungu caspicunaca, ishcandillata quimsa metro ishcai chunga centimetromi carca.

⁸Shinallata ucuman shayajuj pungupash, quimsa metro ishcai chunga centimetromi carca.

⁹Chai jipaca, corredorman yaicuna pungutapashmi medirca. Chai punguca, chuscu metro chunga sucta centimetromi carca. Chai pungupaj pilarcunaca, shuj metro chuscu centimetromi carca.

¹⁰Indi llujshimuj ladoman tiaj pungupash, ishcandi ladomanmi chashnatallata medishpa rurashca quimsa ucucunata charirca. Shinallata ishcandi ladoman corredorpash, chashnatallata medishpa rurashcami carca.

¹¹Yaicuna pungu anchotapashmi medijurca. Chaica, picha metro ishcai chunga centimetromi carca. Shinallata corredor largotapashmi medijurca. Chaica, sucta metro, canchis chunga sucta centimetromi carca.

¹²Chai jipaca, uchilla ucu ladocunata jarcashca pircatami medijurca. Chaita medijpica, caishuj ladomambash, chaishuj ladomambash picha chunga ishcai centimetromi carca. Shinallata chai ucucunapash, tucuillatami caishuj ladomambash, chaishuj ladomambash quimsa metro, chunga ishcai centímetro carca.

¹³Shuj ucupaj tejamanda, caishuj ucupaj tejacaman medijpica, chunga quimsa metro anchomi carca. Shinami, caishuj lado pungumanda, chaishuj lado pungucaman medirca.

¹⁴Shinallata pilarcunatapashmi medirca. Patiopi tucui pilarcunatapash, corredor muyundipi tucui pilarcunatapashmi medirca. Chaicunaca, quimsa chunga shuj metro, ishcai chunga centimetromi carca.

¹⁵Shinallata canllamanda yaicuna pungu patamandaca, ucuman tiaj pungucamanmi medijurca. Chaica, ishcai chunga sucta metromi carca.

¹⁶Shinallata uchilla ucucunapipash, huasi ucuman tiaj muyundi corredorcunapipash, caishuj corredorcunapipashmi, quichiji ventanacuna tiarca. Chai ventanacunaca, ucu ladoman muyundi rurashcami carca. Shinallata tucuilla pilarcunapimi, palmera quirucunata rurashca carca.

¹⁷Chai jipaca, huasi canlla patiomanmi llujchihuarca. Chaipica, uchilla ucucuna tiajtami ñapash ricurcani. Chaitaca, muyundita rumicunahuan llambullaguta rurashcami carca. Chai patio muyundipica, quimsa chunga ucucunami tiarca.

¹⁸Shinallata chai huasiman yaicuna pungu ladotapash, tucui ladotami rumicunahuan juyaillaguta rurashca carca. Corredor chimba purapi rumicunahuan rurashca pambaca, ashtahuan ucumanmi carca.

¹⁹Chai jipaca, huasi ucuman yaicuna pungu ñaupajmandaca, huasi canllapi tiaj caishuj pungu ñaupacamanmi medijurca. Chaica, picha chunga ishcai metro, picha chunga centímetro anchomi carca. Indi llujshimuj ladota medijpipash, jahua ladota medijpipash, chashnallatami carca.

²⁰Shinallata canllaman llujshina jahua ladoman tiaj pungutapashmi, jatundapash, anchotapash medijurca.

²¹Chai pungu ladocunapica, tucui ladomanmi quimsa uchilla ucucuna tiarca. Chaipi tiaj pungu arcopash, pilarpash, jatun corredorman yaicuna ucupi tiaj pungushnallatami medirca. Jatunmambash, ishcai chunga sucta metro, ishcai chunga picha centimetromi carca. Anchomambash, chunga quimsa metromi carca.

²²Chai pungu ladopi tiaj ucucunapaj ventanacunapash, arcocunapash, palmeracunapash, indi llujshimuj ladoman tiaj ucucunapajshnallatami medirca. Chaiman yaicungapaca, canchis gradascunatami vitsiana carca. Chai arcocunaca, chai ñaupajpillatami carca.

²³Ucuman tiaj patioman yaicuna punguca, jahua ladoman tiaj punguhuan chimba purami carca. Indi llujshimuj ladomambash, chashnallatami carca. Shuj pungumanda caishuj pungucaman medijpica, picha chunga ishcai metromi carca.

²⁴Chai jipaca, ura ladomanmi pushahuarca. Chai ura ladomambash, shuj pungutami ricurcani. Chaipi tiaj corredorcunatapash, arcocunatapash, indi llujshimuj ladoman tiaj ucucunata medishcashnallatami medirca.

²⁵Chai corredor ucupica, ventanacunapash, arcocunapash muyundimi tiarca. Caishuj pungu corredorpi tiaj ventanacunashnallatami carca. Chai corredorca, ishcai chunga sucta metro largomi carca. Anchoca, chunga quimsa metromi carca.

²⁶Chai punguman chayangapaca, canchis gradascunami tiarca. Chai pungu ñaupajpica, arcocunata rurashcami carca. Shinallata pungu pilarcunapipash, cada ladomanmi palmera quirucunata rurashca carca.

²⁷Huasi ucuman tiaj patio urai ladomambashmi, pungucuna tiarca. Chai pungumandaca, urai ladomanllata tiaj pungucamanmi medijurca. Chaipica, picha chunga ishcai metrotami medirca.

²⁸Chai jipami, ucu patiopi tiaj ura lado punguman pushahuarca. Chai pungutapash, caishuj pungucunata medishcashnallatami medirca.

²⁹Chai pungu corredor ucupipash, uchilla ucucuna, pungu patacuna, arcocuna, ventanacunami tiarca. Chaicunatapash, caishuj pungucunata medishcashnallatami medirca. Chai corredorca, ishcai chunga sucta metro jatunmi carca. Anchoca, chunga quimsa metromi carca.

³⁰Pungucunapi rurashca tucuilla muyundi arcocunaca, chunga quimsa metro jatunmi carca. Anchomambash ishcai metro, sucta chunga centimetromi carca.

³¹Chai pungucunapi rurashca arcocunaca, canlla patioman cumurishcami carca. Shinallata pungu patacunapipash, palmeracunata rurashcami carca. Chai punguman chayangapaca, pusaj gradascunami tiarca.

³²Chai jipaca, huasi canllapi tiaj, indi llujshimuj lado pungumanmi pushahuarca. Chai pungutapash, caishuj pungucunata medishcashnallatami medirca.

³³Chai pungu corredor ucupipash, uchilla ucucuna, pungu patacuna, pungupi rurashca arcocunami tiarca. Chaicunatapash, caishuj punguta medishcashnallatami medirca. Chai corredor ucupica, muyundipimi ventanacunata, arcocunata rurashca carca. Chai corredor largoca, ishcai chunga sucta metromi carca. Anchoca, chunga quimsa metromi carca.

³⁴Chai corredor pungucunapi rurashca arcocunaca, huasi canllaman churashcami carca. Pungu patacunapipash, cada ladomanmi palmeracunata rurashca carca. Chai pungucunaman chayangapaca, pusaj gradascunami tiarca.

³⁵Chai jipaca, huasi canllapi tiaj jahua lado pungumanmi pushahuarca. Chai pungutapash, caishuj pungucunata medishcashnallatami medirca.

³⁶Chaipipash uchilla ucucuna, pungu patacuna, arcocuna, ventanacunami, muyundi tiarca. Chai pungu largoca, ishcai chunga sucta metromi carca. Anchoca, chunga quimsa metromi carca.

³⁷Chai pungu patacunaca, huasi canllaman llujshirishcami carca. Chai patacunapipash, cada ladomanmi palmera quirucunata rurashca carca. Chai punguman yaicungapaca, pusaj gradacunami tiarca.

³⁸Chaipica, shuj jatun ucumi tiarca. Chaiman yaicuna pungutaca, corredorpi rurashca jatun pilarcunatashnami rurashca carca. Chai ucupimi, Diosman cushpa tucuillata rupachina animal aichataca maillanajunga.

³⁹Chai ucuman yaicuna pungupica, cada ladomanmi ishcai mezacuna tiarca. Chai mezacunapaj jahuapimi, Diosman cushpa tucuilla rupachina animaltapash, juchamanda cushca animaltapash, Diosman carashca animaltapash, juchata rurashcamanda huañuchina carca.

⁴⁰Jahua ladoman tiaj huasi canllapi tiaj punguman yaicuna gradas ladopipash, cada ladomanmi ishcai meza tiarca.

⁴¹Chai pungupica, ucu ladoman chuscu mezacuna, canlla ladoman chuscu mezacunami tiarca. Tucuimandaca pusaj mezami carca. Chai mezacunapaj jahuapimi, Diosman cushca animaltaca huañuchinajunga.

⁴²Chuscu mezacunaca, animalta Diosman cushpa tucuillata rupachingapajmi carca. Chai mezacunaca, rumita labrashpa rurashcami carca. Chai jahuapimi, Diosman animalta cushpa huañuchina cuchillocunata churana canguichi. Chai mezacunaca largomambash, anchomambash canchis chunga pusaj centimetromi carca. Jatunmambash, picha chunga ishcai centimetromi carca.

⁴³Chai ucupica, muyundipimi huarcuna ganchocuna tiarca. Chai ganchocunaca, canchis centimetromi carca. Meza jahuacunapica, animalpaj aichatami churana carca.

⁴⁴Chaishuj ladomanda yaicushpa, jahua ladoman tiaj pungu lado patiopica, candajcunapaj ucucunami tiarca. Chai ucucunaca, ura ladoman churashca pungucunahuanmi carca. Shuj ucuca, indi llujshimuj ladoman tiaj pungu ladomanmi carca. Chai ucuca, jahua ladoman churashca punguhuanmi carca.

⁴⁵Ñucataca cashnami nihuarca: “Ura ladoman punguhuan ucuca, Diospaj huasita cuidaj curacunapajmi canga.

⁴⁶Jahua ladoman punguhuan ucuca, Diosman cushcata rupachij altarta cuidaj curacunapajmi canga. Chai curacunaca, Sadoc shuti curapaj mirai curacunami canga. Paicunaca, Leví shuti runapaj miraicuna cashcamandami, Mandaj Diosta servitaca ushanga” nihuarcami.

⁴⁷Chai jipaca, Diospaj huasi ñaupajpi tiaj patiotami medijurca. Chai huasi patioca, chuscundi ladomi chashnallata carca. Largomambash, anchomambash picha chunga ishcai metromi carca. Diospaj huasi ñaupajpimi, altarpash tiajurca.

⁴⁸Chai jipami ñucataca, Diospaj huasi ñaupajpi tiaj corredorman pushahuarca. Chaipica pilarcunatami medirca. Tucui pilarcunami, ishcai metro, sucta chunga centímetro racu carca. Pungu patacunapash, tucui ladocunami shuj metro, picha chunga sucta centímetro ancho carca.

⁴⁹Chai corredorca chunga metro, chuscu chunga centímetro jatunmi carca. Anchoca, picha metro, canchis chunga ishcai centimetromi carca. Chai corredorman vichai ringapaca, gradascunami tiarca. Chai corredorpi tiaj pungu ladopica, tucui ladomanmi pilarcuna shayajurca.