Read Imbabura Highland Quichua EZEQUIEL 42 Bible Online

EZEQUIEL 42 - Imbabura Highland Quichua bible

EZEQUIEL 42

¹Chai jipami, jahua lado canlla patioman pushahuarca. Chaimandaca, patio ñaupajpi tiajuj huasi ucumanmi pushahuarca. Chai huasi ucuca, Diospaj huasi ñaupajpi, jahua ladomanmi carca.

²Jahua lado pungu ñaupaca, picha chunga ishcai metro largo, ishcai chunga sucta metro anchomi carca.

³Chunga metro, chuscu chunga centimetrota medij ucu lado patio ñaupajman, rumihuan juyaillaguta empedrashca calla lado patio ñaupajmanmi pushahuarca. Chaipi huasi ucucunaca, caishujhuan chaishuj chimbapura quimsa altibajo huasica, ucumanmi carca.

⁴Chai ucucunapaj ñaupajpica, shuj corredormi tiarca. Chai corredorca, picha metro, ishcai chunga centímetro anchomi carca. Chai ucuta puringapaca, picha chunga ishcai centimetrota charij ñanmi tiarca. Chai ucucunapaj pungucunaca, jahua ladomanmi carca.

⁵Ashtahuan jahuaman rurashca ucucunaca, ashtahuan quichijimi carca. Ashtahuan jahuaman rurashca ucucunaca, callari ucucunamandapash, chaupipi rurashca altibajo ucucunamandapash ashtahuan yali uchillami carca.

⁶Chai huasicunaca, quimsa altibajota rurashca cashpami, huasi patiocunapi tiaj pilarcunatashnaca na charirca. Shinamandami callari ucucunapash, chaupipi rurashca altibajo ucucunatapash, alpamandaca ashtahuan yali quichiji ricurirca.

⁷Chai ucucunapaj ñaupajpimi, canlla patio ladoman shuj pirca tiarca. Chai pircaca, ishcai chunga sucta metro largomi carca.

⁸Jatun huasi canlla patioman ucucunapaj huasica, ishcai chunga sucta metro jatunmi carca. Shinallata Diospajlla huasi ladoman shayajuj ucucunapaj huasica, picha chunga ishcai metro jatunmi carca.

⁹Canlla patiomanda chai ucucunaman yaicuna punguca, indi llujshimuj ladomanmi carca.

¹⁰Patio muyundipi shayajuj pircapica, indi llujshimuj ladomanmi uchilla ucucuna tiarca. Chai ucucunaca, muyundi patio ñaupajpi, jatun huasita shayachishca ñaupajpimi carca.

¹¹Chai uchilla ucucunapaj ñaupajpi tiaj corredorca, jahua ladoman tiaj corredorshnallatami carca. Chai uchilla ucucunapaj huasi anchopash, largopash, llujshina pungucunapash, yaicuna pungucunapash tucuillami, jahua ladoman tiaj huasishnallata carca.

¹²Ura ladoman tiaj ucucunapaj pungucunapash, jahua ladopi tiaj ucucunapaj pungucunashnallatami carca. Chai ucucunaman yaicungapaca, indi llujshimuj ladoman pirca ladopimi, shuj pungu tiarca. Chai pungutami, chai ucucunaman yaicuna carca.

¹³Ñucataca, cashnami nihuarca: “Jahua ladomambash, ura ladomambash patio ñaupajpi rurashca ucucunaca, Diospajllami. Chai ucucunapimi, Mandaj Diospaj ñaupajman quimirij curacunaca, Diospajlla cachun shicanyachishpa carashcacunata micunajunga. Chai huasi ucucunapimi, Diospajlla cachun shicanyachishpa carashcacunatapash, juchamanda imaguta carashcatapash, juchamanda Diosman cushpa huañuchishca animaltapash alichinga. Chai ucucunaca, Diospajlla cajpimi, chaipi alichinajunga.

¹⁴Curacuna Diospajlla ucuman yaicushpaca, canlla patioman llujshitaca na ushangachu. Ashtahuangarin Diospajta rurangapaj paicuna churajushcataca, Diospajlla cashcamandami, chai ucupillata saquinajunga. Paicunaca, shuj churajunacunata churajushpami, caishuj gentecunapajman quimirinajunga” nihuarcami.

¹⁵Diospaj huasi ucuta medishca jipaca, indi llujshimuj ladoman tiajuj punguta llujchishpami pushahuarca. Chaipica, tucuilla muyunditami medijurca.

¹⁶Medina caspihuan, indi llujshimuj ladota muyundi medijpica, huaranga sucta patsaj sucta metromi carca.

¹⁷Jahua ladota muyundi medijpipash, huaranga sucta metromi carca.

¹⁸Ura ladota medijpipash, ishcai huaranga sucta metromi carca.

¹⁹Indi huashajuj ladoman muyushpa medijpipash, huaranga sucta patsaj metromi carca.

²⁰Chashnami, chuscundi ladota medijurca. Chaipimi largomambash, anchomambash, huaranga sucta patsaj metrota medij muyundi pata tiarca. Chai patami, Diospajlla huasitapash, runacuna maita purinatapash shicanyachijurca.