Read Imbabura Highland Quichua EZEQUIEL 45 Bible Online

EZEQUIEL 45 - Imbabura Highland Quichua bible

EZEQUIEL 45

¹Canguna japina alpata chaupiringapaj, suertecunata ruranajushpaca, asha alpataca Mandaj Dios ñucapaj cachun shicanyachinguichi. Ñucapajlla cachun shicanyachishca chai alpaca, pusaj chunga kilómetro largo cachun. Shinallata quimsa chunga ishcai kilómetro ancho cachun. Tucuilla muyundicunapica, chai alpami ñucapajlla shicanyachishca canga.

²Ñucapajlla shicanyachishca chai alpamandami, ñucapajlla huasita rurangapaj shicanyachina canguichi. Ñucapajlla huasita rurana alpaca, largomambash anchomambash, shuj kilómetro, sucta patsaj metromi canga. Chai alpa muyundipi ishcai chunga sucta metro anchoca, michina pambacunami canga.

³Pusaj chunga kilómetro largota, quimsa chunga ishcai kilómetro anchotami medina cangui. Chai alpapimi ñucapajlla huasita, ñucapajlla shicanyachishca ucuta rurana cangui.

⁴Ñucapajlla shicanyachishca chai alpaca, curacunapajmi canga. Paicunaca, ñucapajlla huasipi ñucata servishpa causajcunami. Paicunami, Mandaj Dios ñucata servingapaj quimirinajunga. Chai pushtumi, paicuna causana huasicunapaj canga. Chai alpaca, ñucapajlla huasita rurangapaj shicanyachishcami canga.

⁵Shinallata ñuca huasipi servishpa causanajuj levita curacunapajpash, alpataca shicanyachinami. Chai alpaca, pusaj chunga kilómetro largomi canga. Shinallata quimsa chunga ishcai kilómetro anchomi canga. Chaitami, paicunapaj cachun japinga. Chaipica, ishcai chunga ucucunatami ruranga.

⁶Tucui israelcuna causana pueblota rurangapaca, ñucapajlla huasita rurangapaj shicanyachishca ñaupajpimi, chunga sucta kilómetro anchota, pusaj picha chunga kilómetro largota charij alpata medina.

⁷Shinallata mandajman shicanyachishca asha alpapash, ñucapajlla huasita rurana alpa ladopi pueblota rurangapaj shicanyachishca alpa ladopimi canga. Chai alpaca, indi huashajuj ladomandaca, indi llujshimuj ladocaman ñuca huasipaj shicanyachishca largoshnallatami canga.

⁸Israel llactapica, chai alpatami pai causangapaj charinga. Ñuca churashca mandajcunaca, ñuca agllashcacunataca, na ashtahuan llaquichishpa causanajungachu. Ashtahuangarin mashna aillucuna cajpipash, alpacunataca pactanatami, israelcunaman cunga.

⁹Mandaj Jatun Dios ñucami, cashna nini: ¡Israel llactata mandajcunalla! ¡Ninandapacha llaquichinata, shuhuanataca ña chashnalla saquichiyari! Ashtahuangarin aliguta ricushpa mandashpa, imatapash cashcatapacha rurashpa causaichiyari. Ñuca agllashcacunata mandashpa llaquichishpa causanataca saquichiyari. Mandaj Jatun Dios ñucami, chashna nini.

¹⁰Ali pezaj balanzata, ali medina efa nishcata, ali medina bato nishcatami charina canguichi.

¹¹Efa nishcapash, bato nishcapash chashnallatami medinga. Bato nishca medinaca, shuj homer nishca medinata chungapi chaupishpa shicanyachishcami canga. Shinallata efa nishca medinapash, shuj homer nishca medinata chungapi chaupishpa shicanyachishcami canga. Chai medinacunaca, homer nishca medidashnallatami canga.

¹²Shinallata shuj siclo culquica, ishcai chunga geratami pezanga. Sucta chunga siclo culquica, shuj mina nishcatami pezanga.

¹³Ñucaman, imatalla cuna cashcacunataca, cashnami medishpa cuna canguichi: Ishcai chunga ishcai kilota suctapi chaupishpaca, quimsa kilo yalitami, cada chuscu quintal ishcai chunga kilo trigohuan cuna canguichi. Ishcai chunga ishcai kilota suctapi chaupishpaca, quimsa kilo yalitami, cada chuscu quintal ishcai chunga kilo cebadahuan cuna canguichi.

¹⁴Aceiteta ñucaman cushpaca, quimsa chunga canchis litrota medishpa cuchunmi mandani. Bato nishca medinaca, shuj coro nishca medinata chungapi chaupishpa shicanyachishcami. Chunga bato nishca medinaca, shuj homer cashcamandami, chunga bato nishca medinaca shuj homer tucunga.

¹⁵Shinallata Dioshuan ali cangapaj imagutapash carangapaj, juchamanda animalta cungapaj, Diosman animalta carashpa huañuchingapaj, Diosman cushpa tucuillata rupachingapaca, paicunapaj virayashca malta huarmi llamatami, israelcunamanda cuna canguichi. Mandaj Dios ñucami, chashna nini.

¹⁶Tucui cai llactapi causanajuj gentecunaca, ñucaman imagutapash cuna cashcataca, Israel llactata mandajmambash cunapachami.

¹⁷Ashtahuangarin mandajca, cashna ruranatami charin: Jatun fiesta punllacunapi, luna llullu punllacunapi, samana punllacunapi, israelcuna fiestata rurana punllacunapimi, animalta ñucaman cushpa tucuillata rupachijuchun, animalta ñucaman cushpa huañuchijuchun, vinotapash ñucaman cushpa talichun cunata charin. Paillatami, juchata anchuchijuchun ñucaman cunatapash, animalta ñucaman cushpa tucuilla rupachinatapash, ñucahuan ali cangapaj imaguta caranatapash, israelcunapaj juchata anchuchijuchun animalta ñucaman cunatapash cunga.

¹⁸Mandaj Jatun Dios ñucami, cashna nini: Huata callari quillapaj punda punllapica, huarmi huagracunamanda imapash na tucushca, shuj shicuta ñucaman cushpa huañuchingui. Shina rurashpami ñucapajlla huasitaca, ima mapapash illajta saquingui.

¹⁹Juchamanda cushca animalpaj yahuartaca curami, ñuca huasi patacunapipash, altar tiarinapi tiaj chuscundi esquinacunapipash, huasi ucu patiomanda llujshina pungu pilarcunapipash javinga.

²⁰Maijambash pandarishpa, na cashpaca maijambash umachijpi juchata rurashcamandaca, punda quillapaj canchis punllapica, chashnallatami rurana cangui. Ñuca huasi ima mapapash illaj quedachumbash, animalta cungui.

²¹Huata callari quillapaj chunga chuscu punlla jipaca, pascua fiestatami, canchis punllacunacaman rurana canguichi. Chai punllacunapica, levadura illaj tandata micunguichi.

²²Chai punllapica mandajmi, paipaj juchamandapash, cai llactapi causaj tucuicunapaj juchamandapash, shuj shicuta ñucaman cushpa huañuchinga.

²³Chai jatun fiesta canchis punllapica, punllandimi canchis alipacha shicucunata, canchis jari llamacunata, Mandaj Dios ñucaman cushpa tucuillata rupachinga. Shinallata cangunapaj juchamandapash, canchis punllacamanmi punllandi, shuj jari chivota huañuchinga.

²⁴Cada maltun shicuhuanmi, ishcai chunga ishcai kilo jacuhuan cuhuanga. Shinallata cada jari llamahuanmi, ishcai chunga ishcai kilo jacuhuan cuhuanga. Ishcai chunga ishcai kilo jacuhuanga, sucta litro yali aceitetami cuhuanga.

²⁵Mandaj runaca, canchis quillapaj chunga picha punllapi fiestata rurashpaca, cai canchis punllapi rurashcashnallatami ruranga. Chai fiesta punllapi, tucuicunapaj juchamanda animaltapash cushcashnallata, animalta ñucaman cushpa tucuillata rupachishcashnallata, imaguta caranata carashcashnallata, aceitetapash cushnallatami ruranga.