Read Imbabura Highland Quichua EZEQUIEL 46 Bible Online

EZEQUIEL 46 - Imbabura Highland Quichua bible

EZEQUIEL 46

¹Mandaj Jatun Dios ñucami, cashna nini: Ñuca huasi ucu patioman yaicuna, indi llujshimuj ladoman tiaj punguca, trabajana sucta punllatami vichashca canga. Samana punllapica, pascashcami canga. Luna llullu punllapipashmi, pascashca canga.

²Mandaj runaca, jatun punguta yaicushpa corredorta yalishpa, huasi ucu patioman yaicuna pungu caspi ladopimi shayaringa. Ñucaman cushca animalta, curacuna tucuilla rupachingacaman, ñucahuan ali cangapaj imaguta carashcatapash ñucaman carangacamanmi mandaj runaca, chai pungu ladopillata shayajunga. Chaipi shayajushpallatami, ñucataca ninanda alicachishpa llujshinga. Ashtahuangarin chai pungutaca, chishangacaman na vichangachu.

³Shinallata cai llactapi causajcunapash, samana punllacunapi, luna llullu punllacunapipash, chai pungu ladopillata, Mandaj Dios ñucata mañachun ninimi.

⁴Mandajca, samana punllapica, imapash na tucushca sucta maltun llamacunata, shuj alipacha jari llamatapash, ñucaman cushpami, tucuillata rupachinga.

⁵Shinallata cada jari llamahuanga, ishcai chunga ishcai kilo jacuhuanmi cunga. Shuj maltun llamahuanga, imata cui ushana cashpapash cungallami. Ishcai chunga ishcai kilo jacuhuanga, sucta litro yali aceitetami cunga.

⁶Ashtahuangarin luna llullu punllapica, huarmi huagracunamanda maltun jari huagrata, shuj shicuta, sucta maltun llamacunata, shuj jari llamatami cunga. Chaicunaca, imapash na tucushca animalcunami canga.

⁷Ishcai chunga ishcai kilo jacutaca, shuj shicuhuanmi cunga. Shinallata cada jari llamahuambash, ishcai chunga ishcai kilo jacutami cunga. Ashtahuangarin maltun llamacunahuanga, imatapash cui ushashcatallami cunga. Sucta litro yali aceitetaca, ishcai chunga ishcai kilo jacuhuanmi cunga.

⁸Mandaj yaicushpaca, corredorman yalina jatun pungutami yaicunga. Llujshingapaca, pai maita yaicushcatallatami llujshinga.

⁹Ashtahuangarin cai llactapi causajcuna, fiesta punllacunapi Mandaj Dios ñuca ñaupajman yaicushpaca, paicuna puramanda huaquingunaca, jahua lado punguta yaicushca cashpaca, ura lado pungutami llujshinga. Ura lado punguta yaicushpaca, jahua lado pungutami llujshinga. Maita yaicushca pungutallataca na llujshingachu. Ashtahuangarin maita yaicushca cashpapash, chai chimba purapi tiajuj pungutami llujshinga.

¹⁰Cai llactapi causajcuna ñucata mañangapaj yaicujpica, mandajpash paicunapaj chaupipimi yaicunga. Paicuna llujshijpipash, paicunahuanllatami mandajpash llujshinga.

¹¹Shinallata jatun fiesta punllacunapipash, jatun tandanajui punllacunapipash, cada shicuhuan ishcai chunga ishcai kilo jacutami cunga. Cada jari llamahuambash, ishcai chunga ishcai kilo jacutami cunga. Maltun llamacunataca, imatalla cui ushashcacunahuanmi cunga. Sucta litro yali aceitetaca, ishcai chunga ishcai kilo jacuhuanmi cunga.

¹²Ashtahuangarin mandaj runaca, paipaj munaillata ñucaman animalta cushpa tucuillata rupachigrijushpa, Mandaj Dios ñucahuan ali cangapaj, imata cashpapash caragrijushpaca, indi llujshimuj lado punguta pascachun. Chaita yaicushpa, samana punllapi rurashcashnallata, animalta cushpa tucuillata rupachijuchun, ali cangapaj imatalla caranatapash carachun. Pai chashna rurashpa llujshishca jipaca, chai pungutaca vichachunlla.

¹³Imapash na tucushca shuj huatata charij maltun llamatami, Mandaj Dios ñucaman cushpa, punllandi huañuchishpa, tucuillata rupachina cangui. Cada tutamandami, animalta ñucaman cushpa huañuchina cangui.

¹⁴Chai maltun llamahuanmi, ishcai chunga ishcai kilo jacuta tucui tutamanda cuna cangui. Shinallata tucuimanda yali ali jacupi chapungapaca, sucta litro yali aceitetami cuna cangui. Punllandi Mandaj Dios ñucaman imagutapash caranacunaca, tucui causaipi pactachinajuchun cushca shimicunami canga.

¹⁵Cada tutamandami maltun llamatapash, granocunatapash, aceitetapash, Mandaj Dios ñucaman cushpa tucuillata rupachinajunalla canguichi.

¹⁶Mandaj Jatun Dios ñucallatami, cashna nini: Mandaj runaca, pai charishca alpamanda asha alpatami, paipaj churicunaman cunga. Shina cajpica chai asha alpaca, paipaj churicunapajmi canga.

¹⁷Ashtahuangarin mandaj runaca, pai charishca alpamanda paita servijman cujpica, chai alpaca cutin tigrachina huatacamanllami, chai servij runapaj canga. Chaica, servishpa causana huatacunata pactachingacamanllami canga. Ña chai huatacunata pactachishpaca, paita mandajmanllatami tigrachinga. Chai tigrachishca asha alpataca, mandajpaj churicunallatami japinga.

¹⁸Mandaj runaca, cai llactapi causajcuna charishca alpacunataca na quichunachu. Paipaj churicunamambash, paipaj alpatallatami cuna. Shina rurajpimi, ñuca agllashcacunaca, pipash na alpa illaj quedanga. Shujllapash paicunapaj llactamandaca, ama llujchi tucuchun” nijurcami.

¹⁹Chai jipami ñucataca, yaicuna pungu ladopi tiaj curacunapajlla ucucunaman pushamuhuarca. Chai ucucunaca, jahua ladomanmi punguta charirca. Chaipimi, ashtahuan huashaman shuj ucuta ricurcani. Chai ucuca, indi huashajuj ladomanmi carca.

²⁰Chaipimi, cashna nihuarca: “Cai jatun ucupimi, curacunaca, juchamanda Diosman imatalla cushcatapash, animal aichatapash yanunga. Chaicunataca, huasi canllapi ama yanungapajmi, chai ucupi yanunajunga. Canllapi yanushpaca, tucuicunatami ñucapajlla shicanyachinajunga” nihuarcami.

²¹Chai jipaca, canlla patiomanmi llujchihuarca. Chai patiopica, chai patio chuscundi esquinacunamanmi pushahuarca. Chaipica, cada esquinapimi, shuj uchilla patio tiarca.

²²Chai huasi patio chuscundi esquina ladopi tiaj patiocunaca, muyundi pircashcami carca. Chai patiocunaca chuscundimi, ishcai chunga metro, pusaj chunga centímetro largo carca. Shinallata chunga picha metro, sucta chunga picha centímetro anchomi carca.

²³Chai patiocunapica, chuscundi ladotami pircashca carca. Chai pirca muyundi ucupimi, tulpacuna tiashca carca.

²⁴Chaita ricuchishca jipaca, cashnami nihuarca: “Diosman gentecuna imatalla cushcataca, cai yanuna ucucunapimi, cai huasipi servishpa causajcuna yanunajunga” nihuarcami.