Read Imbabura Highland Quichua EZEQUIEL 47 Bible Online

EZEQUIEL 47 - Imbabura Highland Quichua bible

EZEQUIEL 47

¹Chai jipaca, Diospaj huasi pungumanmi cutin pushahuarca. Chaipimi, chai huasi pungu umbral ucumanda yacu llujshijujta ricurcani. Chai yacuca, indi llujshimuj ladomanmi calpajurca. Diospaj huasipash, indi llujshimuj ladomanllatami shayajurca. Chai yacuca, Diospaj huasi ali lado altar ura ladotami calpajurca.

²Chai jipaca, jahua lado punguta llujchishpami, indi llujshimuj ladoman tiaj ñanda muyuchihuarca. Chai jipaca, huasi canllatami muyuchun pushahuarca. Chaipipash, ali ladomanda yacu llujshijujtami ricurcani.

³Chaipimi, indi llujshimuj ladoman shuj runa, cordelta maquipi aisashca rijujta ricurcani. Chai runaca, picha patsaj ishcai chunga metrota medishpami, chai yacuta yalichihuarca. Chai yacuca, canillascamanmi pambahuarca.

⁴Cutinllatami, picha patsaj ishcai chunga metrota medijurca. Chai yacuca, cunguricaman pambarijtami yalircani. Cutinllatami, picha patsaj ishcai chunga metrota medijurca. Chaitaca, cinturascaman pambarijtami yalircani.

⁵Cutinllatami, picha patsaj ishcai chunga metrota medijurca. Chai yacuca, ña jatun yacu cajpimi na yali usharcani. Ashtaca yacuca, ninanda mirashca cajpimi, chaitaca na chaquilla yali usharcani. Chaitaca huambushpallami, yali ushana carca.

⁶Chaipimi cashna nihuarca: “Huañuna aichayu runa. ¿Caicunataca, alichu ricushcangui?” nihuarcami. Chai jipaca cutin tigrachishpami, chai jatun yacu manñata pushahuarca.

⁷Chai jatun yacu manñata cutin tigrajushpaca, cai ladomambash, chai ladomambash, ashtaca quirucuna tiashcatami ricurcani.

⁸Cashnatapashmi nihuarca: “Cai jatun yacuca, indi llujshimuj lado llactamanmi calpajun. Arabá pambaman urai rishpaca, mama cuchamanmi yaicunga. Mama cuchaman yaicushpaca, mishquilla yacumi tucunga.

⁹Cai ishcai yacu yaicuj ladopi, causaita tucui charijcuna huambushpaca, causangami. Cai yacucuna jatun cuchaman yaicushcamandami, pijicunapash ninandapacha miranga. Yacupash mishquillami tucunga. Cai jatun yacucunaman yaicujcunaca, tucuicunami causanga.

¹⁰Shinallata pijita japijcunapash, chai yacu ladopillatami canga. En-gadi shuti pueblomandaca, En-eglaim shuti pueblocamanmi, linllicunata churanajunga. Jatun Cuchapi tiaj ashtaca pijicunashnallatami cai yacupipash, shuj shuj pijicuna tianga.

¹¹Turu yacucunapash, cucha yacucunapash, na mishquiyangachu. Ashtahuangarin cachita japingapajmi canga.

¹²Cai yacu manñacunapipash, shican shican tucui frutacunata fucuj quirucunami viñanga. Chai quiru fangacunaca napacha urmangachu, micunapash napacha tucuringachu. Diospajlla huasimanda yacu llujshijushcamandami, chai quirucunapi frutacunaca, fucuna punllacunapi fucunga. Frutacunaca, micungapajmi canga. Fangacunaca, jambimi canga.

¹³Mandaj Jatun Dios ñucami, cashna nini: Chunga ishcai Israel aillucuna, canguna japina alpacunataca, cai linderocunata churashpami chaupiringuichi: Joseca, ishcai pushtu alpatami japinga.

¹⁴Chashnami cai alpataca, caishuj chaishuj chaupiringuichi. Cai alpacunatami, cangunapaj ñaupa taitacunaman carashapacha nishpa, ñuca maquita alsashpa juramenturcani. Chaimandami cai alpacunataca, cangunapaj cachun japinguichi.

¹⁵Jahua ladoman alpacunaca, cai linderocunahuanmi canga: Jatun Cuchamandaca, Hetlón shuti puebloman rina ñanda catishpa shamushpaca, Zedad,

¹⁶Hamat, Berota, Sibraim shuti pueblocunacamanmi canga. Sibraim shuti puebloca, Damasco pueblohuan, Hamat shuti pueblohuan lindero chaupipimi tiajun. Shinallata Hazar-haticón shuti pueblocamanmi canga. Chai puebloca, Haurán shuti llacta linderopimi.

¹⁷Jahua ladoman linderoca, mama cuchamandaca, Hazar-enán shuti pueblocamanmi canga. Damasco pueblopash, Hamat shuti pueblo lindero jahua ladomanmi quedanga.

¹⁸Indi llujshimuj ladomambash, cashnami canga: Haurán shuti llacta, Damasco pueblo, Galaad llacta, Israel llacta chaupita rishpaca, Jordán jatun yacucamanmi canga. Chaitaca, indi llujshimuj lado mama cuchacaman medinguichilla.

¹⁹Indi huashajuj ura ladomambash, cashnami canga: Tamar shuti pueblomandaca, fiñanajui yacucaman, Cades shuti pueblomanda callarishpaca, jatun larca yacuta catishpa, Jatun Cuchacamanmi canga. Shinami ura lado linderoca canga.

²⁰Indi huashajuj ladoman linderoca, cashnami canga: Jatun Cucha vichaitaca, Hamat puebloman yaicuna chimba puracamanmi canga. Shinami, indi huashajuj ladoman linderoca canga.

²¹Cai alpataca, Israel aillu puracuna imashna cashcashnallata chaupiringuichilla.

²²Shinallata cangunapajpash, caru llactamanda shamushpa caipi causashpa, canguna purapi churicunata charij huahuacunapajpash, Israel puracunamanshnallata suerteta rurashpa, cai alpataca chaupinguichilla. Chai huahuacunataca, Israel llactapi huacharishcamandaca, cangunapura cashcatapachata yanguichi. Israel aillucunashnallata alpata charichun, suertecunata rurashpa paicunamambash chaupishpa cunguichi.

²³Caru llactamanda runa maijan aillu purapi causajpipash, chaipillata alpata chaupishpa cunguichilla. Mandaj Jatun Dios ñucami, chashna nini.