Read Imbabura Highland Quichua EZEQUIEL 48 Bible Online

EZEQUIEL 48 - Imbabura Highland Quichua bible

EZEQUIEL 48

¹Caipica, Israel aillucunapaj shuticunatami villajun: Jahua lado manñamandaca, Hetlón shuti puebloman rina ñanda catishpa, Hamat shuti, Hazar-enán shuti pueblocunaman yaicuna ñangamanmi canga. Chaica, Damasco pueblo, jahua lado manñamandaca, Hamat shuti pueblo ladocamanmi Dan shuti ailluca, chaipimi indi llujshimuj ladomanda, indi huashajuj ladocaman asha alpata japinga.

²Dan aillupaj alpa lindero ladopica, Aser shuti aillumi, indi llujshimuj ladomanda, mama cucha ladocaman asha alpata japinga.

³Aser shuti aillupaj alpa lindero ladopica, Neftalí aillumi, indi llujshimuj ladomanda, mama cucha yacucaman asha alpata japinga.

⁴Neftalí aillupaj alpa lindero ladopica, Manasés aillumi, indi llujshimuj ladomanda, mama cucha ladocaman asha alpata japinga.

⁵Manasés aillupaj alpa lindero ladopica, Efraín aillumi, indi llujshimuj ladomanda, mama cucha ladocaman asha alpata japinga.

⁶Efraín aillupaj alpa lindero ladopica, Rubén aillumi, indi llujshimuj ladomanda, mama cucha ladocaman asha alpata japinga.

⁷Rubén aillupaj alpa ladopica, Judá aillumi, indi llujshimuj ladomanda, mama cucha ladocaman asha alpata japinga.

⁸Judá aillupaj alpa lindero ladopica, indi llujshimuj ladomanda mama cucha ladocaman, asha alpata shicanyachinguichi. Chai alpaca, pusaj chunga kilómetro anchomi canga. Largopaca, caishujcuna japinajushcashnallatami canga. Chai alpa chaupipimi, Diospajlla huasica tiajunga.

⁹Mandaj Diospajlla shicanyachishca alpaca, pusaj chunga kilometromi canga. Anchoca, quimsa chunga ishcai kilometromi canga.

¹⁰Diospajlla alpamandallata asha alpata, curacunapajlla cachun shicanyachinguichi. Chai asha alpa jahua ladoca, pusaj chunga kilómetro largomi canga. Shinallata indi huashajuj ladopica, quimsa chunga ishcai kilómetro anchomi canga. Cutin caishuj asha alpaca, quimsa chunga ishcai kilómetro anchomi, indi llujshimuj ladoman canga. Ura ladoca, pusaj chunga kilómetro largomi canga. Chai alpacunapaj chaupipimi, Diospajlla huasica tiajunga.

¹¹Sadoc shuti curapaj mirai curacunaca, ñucapajlla causanajushpami, ñuca mandashcacunata cazunajurca. Paicunaca, israelcuna nalita ruranajujpipash, ima nalitapash na ruranajurcachu. Paicunaca, levita curacunashnaca na pandata ruranajurcachu.

¹²Paicunaca, levita curacunapaj alpa ladopillatami, asha alpata japinga. Chai alpaca, Diospajlla shicanyachishcami canga.

¹³Levitacunapaj alpaca, Sadoc shuti runapaj mirai curacunapaj alpa ladopillatami canga. Chai alpapaj largopash, pusaj chunga kilometromi canga. Anchoca, quimsa chunga ishcai kilometromi canga. Largoca tucuillami, pusaj chunga kilometrota charinga. Anchopash tucuillami, quimsa chunga ishcai kilometrota charinga.

¹⁴Levitacunaca, chai alpataca, ashatallapash na pimambash jatui ushangachu. Chai alpapaj randi, shuj alpata japitapash na ushangachu. Chai alpapi punda fucushca granotaca, pimambash na cui ushangachu. Chaicunaca, Mandaj Dios ñucapajlla cashcamandami, chashna ruraitaca na ushanga.

¹⁵Chai pusaj chunga kilometrota charij alpamanda chunga sucta kilómetro puchushca asha alpaca, pueblota rurangapaj, gentecuna causangapaj, michina pambacunapajmi canga. Chai alpa chaupicunapimi, pueblo tucunga.

¹⁶Chai pueblota rurana alpaca, jahua ladomambash, ura ladomambash, chunga chuscu kilómetro, chuscu patsaj metromi canga. Shinallata indi llujshimuj ladomambash indi huashajuj ladomambash, chunga chuscu kilómetro, chuscu patsaj metromi canga.

¹⁷Chai pueblo jahua ladomambash, ura ladomambash, pusaj patsaj metro largoca, michina pambapajmi canga. Shinallata indi llujshimuj ladomambash, indi huashajuj ladomambash, pusaj patsaj metro largoca, michina pambapajllatami canga.

¹⁸Diospajlla alpa ladopica, pueblopi servijcuna micuchun tarpuna alpami canga. Chai alpaca, indi llujshimuj ladomambash, indi huashajuj ladomambash, quimsa chunga ishcai kilometrotami charinga.

¹⁹Pueblopi servijcunaca, Israel aillu puracunamandallami tucuilla canga.

²⁰Largomambash, anchomambash, pusaj chunga kilometrota charij chai tucui alpataca, asha asha shicanyachinguichi. Chai alpacunapimi, Diospajlla huasipash, pueblopash shayaringa.

²¹Diospaj huasita rurangapaj, pueblota rurangapaj shicanyachishca alpa ladopica, tucui ladoman asha puchushca alpaca, mandaj runapajmi canga. Chaishuj asha alpaca, pusaj chunga kilometromandaca, indi llujshimuj ladomanmi puchunga. Caishuj asha alpaca, pusaj chunga kilometromandaca, indi huashajuj ladomanmi puchunga. Chai ishcai alpacunami, mandaj runapaj canga. Chai ishcai asha alpacunapaj chaupipimi, Diospajlla huasica shayaringa.

²²Mandaj runa japina asha alpaca, chashnami levitacunapaj alpa linderomandaca, pueblota rurana alpa linderocaman canga. Chaicunaca, Judá aillupaj linderomandaca, Benjamín aillupaj linderocaman canga.

²³Shinallata caishuj Israel aillucunapaj alpacunaca, indi llujshimuj ladomandaca, mama cucha ladocamanmi canga. Chaipimi Benjamín ailluca, asha alpata japinga.

²⁴Benjamín aillupaj alpa lindero ura ladomambash, Simeón aillumi, indi llujshimuj ladomandaca, mama cucha ladocaman asha alpata japinga.

²⁵Simeón aillupaj alpa lindero ura ladomambash, Isacar aillumi, indi llujshimuj ladomandaca, mama cucha ladocaman asha alpata japinga.

²⁶Isacar aillupaj alpa lindero ura ladomambash, Zabulón aillumi, indi llujshimuj ladomandaca, mama cucha ladocaman asha alpata japinga.

²⁷Zabulón aillupaj alpa lindero ura ladomambash, Gad shuti aillumi, indi llujshimuj ladomandaca, mama cucha ladocaman asha alpata japinga.

²⁸Gad shuti aillupaj alpa lindero ura ladomambash, Tamar shuti pueblomandaca, fiñanajui yacucaman, shinallata Cades shuti pueblomandaca Egipto llactahuan tuparinapi tiaj jatun larca yacuta catishpa, Jatun Cuchacamanmi lindero canga.

²⁹Israel aillucunaca, shinami cai alpataca, suerteta rurashpa chaupirina canguichi. Chaicunami, canguna japina alpacunaca canga. Mandaj Jatun Dios ñucami, chashna nini.

³⁰Chai puebloca, jahua ladomambash, chunga chuscu kilómetro, chuscu patsaj metromi canga. Chai pueblopaj pungucunaca, cashnami canga:

³¹Chai pueblocunapaj pungucunaca, Israel aillucunapaj shuticunahuanmi canga. Jahua ladomanmi, quimsa pungu canga. Shuj punguca, Rubén shutihuan, caishuj punguca, Judá shutihuan, chaipaj jipa punguca, Leví shutihuanmi canga.

³²Shinallata indi llujshimuj ladomambash, chunga chuscu kilómetro, chuscu patsaj metrotallami canga. Chaipipash, quimsa pungucunallatami tianga. Shuj punguca, José shutihuan, caishuj punguca, Benjamín shutihuan, chaipaj jipa punguca, Dan shutihuanmi canga.

³³Ura ladomambash, chunga chuscu kilómetro, chuscu patsaj metrollatami canga. Chaipipash, quimsa pungucunami tianga. Shuj punguca, Simeón shutihuan, caishuj punguca, Isacar shutihuan, chaipaj jipa punguca, Zabulón shutihuanmi canga.

³⁴Indi huashajuj ladomambash, chunga chuscu kilómetro, patsaj canchis chunga picha metrollatami canga. Chai ladomambash, quimsa pungucunami tianga. Shuj punguca, Gad shutihuan, caishuj punguca, Aser shutihuan, chaipaj jipa punguca, Neftalí shutihuanmi canga.

³⁵Chai pueblo muyundita medijpica, picha chunga canchis kilómetro, sucta patsaj metromi carca. Chai punllamandapachami, chai puebloca: ‘Mandaj Diosmi chaipi’ nishca shutihuan canga” nijurcami.