Read Imbabura Highland Quichua EZEQUIEL 5 Bible Online

EZEQUIEL 5 - Imbabura Highland Quichua bible

EZEQUIEL 5

¹Huañuna aichayu runa. Canga, filo filo cuchillota, barbasta anchuchina navajata japishpa, uma ajchatapash barbastapash anchuchingui. Chai jipaca, balanzata japishpa, chai ajchata pezashpa chaupingui.

²Macanajuna punllacuna ña pactajpica, quimsapi shicanyachishca asha ajchataca, pueblo chaupipillata ninahuan rupachingui. Caishuj ashataca, pueblo muyundipi espadahuan fitingui. Caishuj asha ajchataca chafsishpa, huairapi cachangui. Ñucami, paicunataca espadata alichinamanda espadata llujchishpa, catishpa risha.

³Shinallata asha ajchata japishpa, jahualla cambaj churajunapi huatangui.

⁴Shinallata shuj asha ajchata cutin japishpaca, nina chaupipi shitashpa rupachingui. Chaimanda ashtahuan nina llujshishpami, tucui israelcunata rupachinga.

⁵Mandaj Jatun Dios ñucallatami, cashna nini: Cai Jerusalendami, shuj llactacunapaj chaupipipash, muyundi llactacunapaj chaupipipash churarcani.

⁶Paica, shuj llactacunata, paipaj muyundi llactacunata yalimi, ñuca imata rurachun villachishcacunata, jatun naliman tigrachijurca. Chashnami ñuca imata rurachun villachishcacunata, ñuca mandashcacunataca, yangapi churanajurca.

⁷Shinamandami, Mandaj Dios ñucallata, cashna nini: Cangunapaj muyundi llactacunapi causajcunatapash yali jatun nalicunata rurashpami, ñuca mandashcacunataca na cazurcanguichi. Ñuca mandashca shimicunata, na huacaichishpami causarcanguichi. Cangunapaj muyundi llactacunapaj mandashcacunapi nijunshnallapash, na rurashpami causarcanguichi.

⁸Chaimandami, Mandaj Jatun Dios ñucallata, cashna nini: Ricuichi, ñucaca cangunahuan fiñarishcami cani. Ari ñucallatami, cangunataca tucui llactacunapi causajcunapash ricunajujta llaquichisha.

⁹Tucui chai millanayaicunata rurashcamandami, cambaj causajcunataca ima horapash na llaquichishcata llaquichisha. Cutinga, na chashnaca llaquichishachu.

¹⁰Chaimandami cambi causajcunaca, taitacunallata huahuacunata micunga. Shinallata huahuacunapash, paicunapaj taitacunatallatami micunga. Chashnami, cambi causajcunataca llaquichisha. Chai huaquin puchushcacunataca, huairapi cachanshnami caita chaita cachasha.

¹¹Mandaj Jatun Dios ñucaca causajunipachami. Chaimandami canguna yapa millanayaita rurashpa, ñucapajlla huasita yangapi churashcamandaca, ñucapash llaquichisha. Ñuca ñaupajmandaca, napacha quishpichishachu. Paicunataca napacha llaquishachu.

¹²Cambi causajcunamanda quimsapi shicanyachishca ashaca, jatun ung:uihuan, yarjaihuanmi, cangunapaj chaupipillata huañushpa tucuringa. Shuj quimsapi shicanyachishca ashaca, cambaj muyundipillatami, espadahuan huañuchi tucushpa urmanga. Chaishuj quimsapi shicanyachishca ashataca, huairapi cachanshnami caita chaita cachasha. Paicunataca, espadata alichinamanda espadata llujchishpami catisha.

¹³Ninandapacha ñuca fiñarishcata pactachingapaca, paicunata llaquichishpami ñuca fiñashcamanda ali tucushpa cushijusha. Chashna llaquichishpami, cushijushpa samasha. Chashna rurashpa ñuca fiñashcata pactachijpimi, Mandaj Dios ñucapajlla cachun munashpa rimashcata yachanga.

¹⁴Candaca, chulunlla pushtutami saquisha. Cambaj muyundi llactacunapi causajcunapash, caita tucui yalijcunapaj ricuipipash, nalicachi tucushca cachunmi saquisha.

¹⁵Ñuca ninandapacha fiñarishpa, canda llaquichijujpica, cambaj muyundi llactacunapi causajcunapaca, nalicachishpa rimana, asishpa ricuna, paicuna ricushpa yarina, jatun manllarinami tucunga. Mandaj Dios ñucallatami, chashna nini.

¹⁶Paicunata tucuchingapaca, ninanda llaquichina flechatashnami, yarjai punllacunata cachamusha. Chaicunaca, paicunata tucuchingapajmi canga. Chashna cachamushpami, cangunapica yarjai punllacunata ashtahuan mirachisha. Canguna micushpa shinlli tucunatapash tucuchishpami, ninanda llaquichisha.

¹⁷Shinami cangunapaj jahuapica yarjaitapash, millai animalcunatapash, cangunata tucuchinajuchun cachamusha. Cambaj chaupipica ung:uipash, yahuartapash, espadahuan macanajunapashmi tianga. Caitaca, Mandaj Dios ñucallatami chashna nini” nihuarcami.