Read Imbabura Highland Quichua EZEQUIEL 7 Bible Online

EZEQUIEL 7 - Imbabura Highland Quichua bible

EZEQUIEL 7

¹Mandaj Diosca cai shimicunatami, cashna nishpa villahuarca:

²“Huañuna aichayu runa. Mandaj Jatun Dios ñucaca, Israel llactataca cashnami nini: Tucurinaca ñami chayamun. Chuscundi ladomanda cai llacta tucurina punllapash, ñamari chayamun.

³Canguna tucurinaca, cunanmi canga. Ñuca ninanda fiñarishcataca, cangunapaj jahuapimi cachamugrini. Imashna canguna causashcashnallatami llaquichisha. Tucui chai millanayaicunata canguna rurashcacunapash, cangunapaj jahuallatami canga.

⁴Ñuca ñaupajmandaca, napacha quishpichishachu, paicunataca napacha llaquishachu. Ashtahuangarin canguna imashna causashcata, chai millanayaita rurashcataca, cangunapaj chaupipillatami ricuchisha. Shina rurajpimi ñucataca, Mandaj Dios cajta yachanguichi.

⁵Mandaj Jatun Dios ñucallatami, cashna nini: Shuj jatun llaquimi chayamugrin. Ricuichi, shuj jatun llaquica chayamugrimbachami.

⁶Tucurinaca chayamugrinmi. Chai tucurinaca chayamugrimbachami. Cangunata llaquichijca, ñami rijcharishca. Ricuichi, ñami shamujun.

⁷Israel llactapi causajcunalla, cangunata llaquichina punllapash, ñami pacarimujun. Chai llaquichina huatacunapash, punllacunapash ñami pactamujun. Urcucunapi cushijunapaj randica, jatun llaqui punllacunami chayamujun.

⁸Cunanga, ñuca ninanda fiñarishcata talinshnami, ucha cachamusha. Ninandapacha ñuca fiñarishcataca, cangunapimi pactachisha. Canguna imashna causashcashnallatami llaquichisha. Millanayaicunata canguna rurashcapash, cangunapaj jahuallatami canga.

⁹Ñuca ñaupamandaca napacha quishpichishachu, paicunataca napacha llaquishachu. Can imata rurashcashnallatami llaquichisha. Chai millanayaita rurashcacunaca, cangunapaj chaupipillatami ricuringa. Chaipimi, Mandaj Dios ñuca llaquichij cajta yachanguichi.

¹⁰Ricuichi, punllacunata. Ricuichi, ñami shamujun. Chai punllapash, ñami punllayajun. Varapash ñami sisashca, jariyashpa jatun tucunapash ashtahuanmi mirashca.

¹¹Shujcunata ninandapacha llaquichinaca, jatun nalita rurana varashnami tucushca. Paicunaca, maijanllapash na puchungachu. Ashtacacuna cashpapash, paicuna puramandaca shujllapash na puchungachu. Paicuna puramanda huacajcunapash, pipash illangami.

¹²Chai huatacunami ña pactamushca, chai punllapash ñami chayamushca. Maijan imata randishpapash, ama cushijuchun, maijan imata jatushpapash, ama huacachun. Ñuca ninanda fiñashcapash, tucuicunapaj jahuapirami.

¹³Jatushpa causaj runacuna causaj puchushca cashpapash, paicuna jatushcata cutin japitaca, na ushangachu. Tucuicunata llaquichinata muscuipishna ricuchishcataca, na saquichi ushangachu. Paicuna jatun nalita rurashcamandami, paicunapaj causaitaca pipash na quishpichi ushanga.

¹⁴Trompetata huacachishpami, tucuita alichinajunga. Ashtahuangarin macanajuiman llujshingapaca, pipash na tiangachu. Ñucaca, tucuilla ashtaca ashtaca gentecunahuanmi ninanda fiñarircani.

¹⁵Canllapica espadahuanmi llaquichinga, ucupica jatun ung:uipash, yarjaipashmi japinga. Canlla pambapica, espadahuanmi huañuchi tucunga. Pueblopica yarjaipash, jatun ung:uipashmi tucuchinga.

¹⁶Chai tucui llaquimanda quishpirijcunaca, pugru pambapi causaj palomacunashnami, urcucunapi pacajugringa. Chaipimi, paicunaca nalita rurashcamanda, llaquirishpa aij ninajunga.

¹⁷Tucuicunapaj maquimi irquiyashca tucunga. Tucuicunapaj cunguricunami irquiyashpa, yacushna tucunga.

¹⁸Cañamutami cinturaspi huatarinajunga, jatun manllaimi paicunataca quilpamunga. Tucuicunami pingai tucunajunga, tucuicunallatami ajchata rutui tucunga.

¹⁹Paicunapaj culquitapash, ñangunapimi shitanajunga. Paicunapaj orotapash, mapatashnami shitanajunga. Mandaj Dios ninanda fiñashpa llaquichijui punllapica, paicunapaj culquipash, oropash na quishpichi ushangachu. Tucui shungu munashcataca, na pactachingachu. Chaicunaca, paicunapaj vijsatapash na pactachingachu. Chaicunaca nitijanshna pandachishpa, jatun nalita rurachingapajllami carca.

²⁰Imatapash punchapamba churajushpami jariyanajurca. Chaicunahuanllatami, imamambash rijchaj millanayai, yanga dioscunata ruranajurca. Chaimandami chaicunataca, na ricunayaicuna cachun rurarcani.

²¹Ima charishcacunata tucuilla apachunmi, na rijsishcacunapaj maquipi churarcani. Chaicunataca, cai pachapi causanajuj ñucata na manllajcunami japinajunga. Chashna japishpami, yangapi churanajunga.

²²Paicunamandaca, ñuca ñavita ladoman churanshnami na ricusha. Shinamandami, ñucapajlla pacalla tiajuj pushtumambash, shuj llactamanda runacuna huaglichingapaj yaicunajunga. Paicuna yaicushpami, chai ucutaca yangapi churanajunga.

²³Canga, shuj cadenata rurai. Cai llactapica, huañuchishpa yahuarta jichashcahuan jundami. Cai pueblopica, ninandapacha llaquichinahuan jundami.

²⁴Shinamandami jatun nalita rurajcunata, shuj llactamanda pushamusha. Chai runacunami, paicunapaj huasicunata quichushpa causanajunga. Ninan ushaita charijcuna jariyashpa jatun tucushcataca tucuchishami. Paicuna rurashca dioscunapaj huasicunapash, yangapimi churai tucunga.

²⁵Tucuchinami shamujun. Shina llaqui shamujpipash, casilla ali causaita mascashpapash na taringachu.

²⁶Jatun llaquica, cati catimi shamunga. Tucui llaquicunatami, cati cati villanajunga. Chaimandami, ñuca ima nishcata villaj villachun mascanajunga. Ashtahuangarin curacunapash, imatalla mandashcataca cungangami. Mandaj rucucunapash, ali yuyaicunataca cungangami.

²⁷Jatun mandajca, yana churajunatami churanga. Cati mandajca, llaquilla cajta ricuchij churajunatami churajunga. Cai llactapi causajcunapaj maquica chujchungami. Paicuna imashna causashcashnallatami, ñucapash rurasha. Paicuna imatalla rurashcata ricushpami llaquichisha. Chashna rurajpimi ñucataca, Mandaj Dios cajta yachanga” nihuarcami.