Read Imbabura Highland Quichua EZEQUIEL 8 Bible Online

EZEQUIEL 8 - Imbabura Highland Quichua bible

EZEQUIEL 8

¹Sucta huata, sucta quillapaj picha punllapimi, cashna tucurca: Ñucaca, ñuca huasipimi tiajurcani. Judá llactata mandaj rucucunaca, ñuca ñaupajpimi tianajurca. Chaipi tiajujpimi, Mandaj Jatun Diosca paipaj maquita ñuca jahuapi churahuarca.

²Chaipi ñuca ricujujpimi, runaman rijchajca ñapash ricurirca. Chai runaca, cinturasmanda uraica ninami carca. Cinturasmanda vichaica, punchayachijuj bronceshnami punchapamba ricurijurca.

³Runaman chai rijchajca, maquita chutashpami, ñuca uma ajchamanda japihuarca. Chai jipami, Diospaj Espirituca, cai pachamanda jahuaman apashpa Taita Diosca, muscuicunapishna ricuchishpa Jerusalenman apahuarca. Paica, jahua ladoman tiaj ucu punguman yaicuna ladomanmi apahuarca. Chaipica, Mandaj Diosta fiñachij, imamambash rijchaj diospaj ucumi tiashca carca. Paimi, ninanda fiñachin carca.

⁴Ricui, israelcunapaj Taita Diospaj punchapambaguca, chaipimi carca. Pambapi cashpa, muscuipishna ñucaman ricurishcashnami carca.

⁵Chaipimi: “Huañuna aichayu runa. Cunanga, jahua ladota vichai ricui” nihuarca. Shina nijpimi, jahua ladota vichai ricurcani. Chaipica, altarman yaicuna pungu ladopimi, Mandaj Diosta ninandapacha fiñachij imamambash rijchaj dios tiajushca carca.

⁶Chai jipaca, cashnami nihuarca: “Huañuna aichayu runa. Ñucapajlla huasimanda ñucata anchuchingapajmi, israelcunaca jatun millanayaicunata ruranajun. Paicuna chashna rurajujtaca, ¿nachu ricungui? Ashtahuan cutin tigrarishpa ricui. Caitapash yali millanayaita rurashcatami ricungui” nihuarcami.

⁷Chai jipaca, ucu patioman yaicuna ladomanmi pushahuarca. Chaipica, patapi shuj utujutami ricurcani.

⁸Chaipica: “Huañuna aichayu runa. Chai patata allai” nihuarcami. Shina nijpi chai patata allajpica, shuj pungumi ñapash ricurirca.

⁹Chai jipami, cashna nihuarca: “Chaiman yaicushpa, ashtahuan jatun nali millanayaicunata paicuna chaipi ruranajujta ricugri” nihuarcami.

¹⁰Shina nijpimi, chaiman yaicushpa ricugrircani. Chaipimi tucui muyundi pircapica, llucashpa purij tucui animalcunata, tucui mapa animalcunata, israelcunapaj tucui yanga dioscunata pintashpa rurashca carca.

¹¹Chaicunapaj ñaupajpica, Israel puramanda canchis chunga mandaj rucucunami chaipi carca. Paicunapaj chaupipica, Safán shuti runapaj churi Jaazanías shuti runapashmi chaipi carca. Paicunaca, tucuicunami paicunapaj maquipi inciensota cushnichinata charinajurca. Chaimandaca, inciensota cushnichishca yana yana cushnimi, jahuata vichai llujshijurca.

¹²Chaipimi cashna nihuarca: “Huañuna aichayu runa. ¿Israelcunata mandaj rucucuna yana yana tutapi imata ruranajujta ricunguichu? Paicunaca, tucuicunami paicunapaj huasi ucucunapi, imamambash rijchaj dioscunata pintashca. Paicunaca: ‘Mandaj Diosca ñucanchita na ricujunllu. Mandaj Diosca, cai llactataca saquishcami’ ninajunmi” nihuarcami.

¹³Chai jipaca, cashnami nihuarca: “Cutin tigrarishpa ricui. Caicunatapash yali millanayaita ruranajujtami ricungui” nihuarcami.

¹⁴Chai jipaca, Mandaj Diospaj huasiman yaicuna jahua lado pungumanmi pushahuarca. Chaipica huarmicunami, yarishpa yarishpa huacashpa, Tamuz shuti diosta mañanajushca carca.

¹⁵Chaipimi cashna nihuarca: “Huañuna aichayu runa, ¿nachu ricungui? Cutin tigrashpa ricui. Caicunatapash yali ashtahuan millanayaita ruranajujtami ricungui” nihuarcami.

¹⁶Chai jipaca, Mandaj Diospaj huasi ucu patiomanmi pushahuarca. Mandaj Diospaj huasiman yaicuna punguhuan altarhuan chaupipica, ishcai chunga pichashna runacunatami ricurcani. Paicunaca, Mandaj Diospaj huasi ladoman huashata tigrachishpami, indi llujshimuj ladoman ricushpa shayanajurca. Paicunaca, indi llujshimuj ladomanllata alpaman chayajta cungurishpami, indita mañanajurca.

¹⁷Chaipimi, cashna nihuarca: “Huañuna aichayu runa, ¿nachu ricungui? ¿Judá llactapi causajcuna millanayaita caipi rurashcapash paicunapaca, yangallachu? Paicunaca, cai llactapi nalita rurashcacunata jundachishca jipami, ñucata ashtahuan fiñachingapaj ñucapajman tigramunajurca. Ricui, paicunaca imapash fangacunatami mutijinajun.

¹⁸Shinamandami ñucapash ninandapacha fiñarishpa, paicunataca llaquichisha. Ñuca ñaupajmandaca napacha quishpichishachu, paicunataca napacha llaquishachu. Paicunaca, ñuca uyachunmi shinllita caparinajunga. Shina caparinajujpipash, napacha uyashachu” nihuarcami.