Read Imbabura Highland Quichua DANIEL 12 Bible Online

DANIEL 12 - Imbabura Highland Quichua bible

DANIEL 12

¹Chai huatacunapica, cambaj llactapura israelcunata ayudaj jatun mandaj Miguel shuti angelmi shayaringa. Cai pachapi gentecuna causai callarishcamandapacha chai punllacaman, nara tiashca jatun llaqui huatacunami tianga. Shina cajpipash chai huatacunapica, libropi shutita escribichi tucushca tucui cambaj llacta puracunallami quishpichi tucunga.

²Huañushpa ñutu alpapi samajcunapash, ashtacacunami rijchachi tucunga. Shujcunaca, causaita causagringapaj, shujcunaca causaita causaicaman pingai tucushpa ninanda musparingapajllami, rijchachi tucunga.

³Ali yachajushcacunaca, jahua pachamanda punchayachinshnami punchayachinajunga. Imatapash cashcatapacha rurashpa causanajuchun, ashtaca gentecunaman yachachijcunaca, luzerocunashnami causaita causaicaman punchapamba ricuringa.

⁴Daniel, ashtahuangarin canga, cai shimicunata escribishca librotaca, tucurimui punllacunacaman vichashpa, sellashpa alichilla. Ashtacacunami caiman, chaiman rinajunga. Ima jatun yachajunacunapash, ninandami miranga” nihuarcami.

⁵Chai jipaca, ishcaipura shayanajujtami, Daniel ñucaca ricurcani. Shujca, jatun yacu cai ladoman, caishujca chimba ladomanmi shayanajurca.

⁶Paicuna puramanda shujmi, lino churajunata churajushca, jatun yacu jahuapi shayajuj runataca, cashna nirca: “Cashna juyaillacunata rurashpa tucuchinaca, ¿ima punllata pactamungayari?” nishpami tapurca.

⁷Shina nijpimi, jatun yacu jahuapi, lino churajunata churajushca shayajuj runaca, ali lado maquitapash, lluqui lado maquitapash vichai alsashpa, causaita causaicaman causajuj Diospaj shutipi cashna nishpa juramenturca: “Quimsa huata chaupitami, chashna llaquica tianga. Diospajlla causajcunataca, ninan ushaihuan shuj llactacunaman cachana tucurijpimi, tucui caicunaca pactanga” nishpami juramenturca.

⁸Shina nijta uyashpapash, na yachai ushashpami: “Ñucata mandajlla, cashna tucunaca, ¿ima punllata pactangayari?” nishpa tapurcani.

⁹Shina tapujpica, cashnami nihuarca: “Daniel, cunanga rilla. Cai shimicunaca, tucurimui punllacunacaman sellashpa vichashcami tiajun.

¹⁰Ashtacacunami, tucui mapamanda anchuchishca, yurajyachishca, mapa illajcuna canga. Diosta na manllajcunaca, Diosta na manllashpa catinajungallami. Diosta na manllajcunaca, cashna tucunataca shujllapash na yachai ushangachu. Ashtahuangarin ali yachajushcacunaca, yachai ushangallami.

¹¹Diosman punllandi animalta cushpa rupachinata anchuchishca punllamanda, yapa millanayachishpa tucuchijta churangacamanmi, huaranga ishcai patsaj iscun chunga punllacuna yalinga.

¹²Maijambash huaranga quimsa patsaj quimsa chunga picha punllacunata Diosta shuyajca, ninandami cushijun.

¹³Canga, huañui punllacaman catinguilla. Samajushca jipa, tucurimui punllapi jatarishpami, can japinataca japingui” nihuarcami.