Read Imbabura Highland Quichua DANIEL 4 Bible Online

DANIEL 4 - Imbabura Highland Quichua bible

DANIEL 4

¹Jatun mandaj Nabucodonosor shuti runaca, tucui gentecunata, shuj shuj llactapi causajcunata, shican shican rimaita rimaj, tucui llactapi causajcunatami, cashna nin: “Tucui cangunapaca, ashtahuan ali casilla causai tiashca cachun ninimi.

²Jahua pachapi causajuj Taita Dios imatapash juyaillaguta rurashpa ricuchishcata, pipash na rurai ushanallacunata rurashpa ñucaman ricuchishcataca, cangunaman villana ali cajpimi villajuni.

³¡Imatapash juyaillaguta rurashpa ricuchishcacunaca jatumbachamari! ¡Manllarinacunata pai rurashcapash, tucui ushaihuan rurashcacunamari! Pai mandana llactaca, causaita causaicaman napacha tucurij mandana llactami. Cati cati miraicunatapash mandajungallami.

⁴Nabucodonosor ñucaca, ñuca huasipimi casilla aliguta causajurcani. Mandashpa tiajuna huasipipash, cushijushpami causajurcani.

⁵Shuj tutami, ñuca camapi sirijushpa, ninanda manllarinata muscuipishna ricurcani. Ñuca yuyaipica, muscuipishna ricushcata maitapash yarijushpallatami, yapata musparijurcani.

⁶Chaimandami, ñuca muscushcacuna ima cajta villachunga, Babilonia llactapi causaj tucui alipacha yachajushcacunata, ñuca ñaupajman pushamuchun cacharcani.

⁷Shinamandami yachajcuna, luzerocunata ricujcuna, caldeocuna, yumbucunapash shamunajurca. Paicunaman ñuca muscushcata parlajpipash, chai muscui ima cajtaca, na villai ushanajurcachu.

⁸Shuj punllami, Danielca ñuca ñaupajman shamurca. Paipaj shutica, ñuca diospaj shutitashnallata Beltsasar shutimi. Paipica, jucha illaj dioscunapaj espiritumi causajun. Paimanmi, ñuca muscushcataca cashna nishpa parlarcani:

⁹Yachajcunata mandaj Beltsasar shuti runalla, ñucaca jucha illaj dioscunapaj espíritu cambi causajujtami ña yachani. Pipash na yachai ushanallacunapash, cambica na pacalla cai ushanllu. Shina cashcamandaca muscuipishna ñuca ricushcatapash, chai muscui ima cajtapash villahuayari.

¹⁰Ñuca camapi sirijushpaca, ñuca yuyaipica cashnatami muscuipishna ricurcani: Cai pacha alpa chaupipica, shuj quiru shayajujta ricushcatashnallami yarini. Chai quiruca, jatumbachami carca.

¹¹Chai quiruca, ashtahuan viñashpami, shinlli shinlli tucurca. Chai quiru pundaca, jahua pachacamanmi viñarca. Chaitaca, tucui cai pachamandami maimandapash ricunalla carca.

¹²Fanga junda, juyailla quirumi carca, granocunapash ninandami fucujurca. Chaipi fucushca granocunaca, tucuicuna micungapajmi pactarca. Tucui animalcunapash, chai quiru ucupimi, llandushpa siririnajurca. Jahuata rij alasyu animalcunapash, chai quirupimi causanajurca. Ima cashpapash causaita tucui charijcunaca, chai quirumandami micushpa causanajurca.

¹³Ñuca camapi sirijushpallatami, ñuca yuyaipica muscuipishna cashnatapash ricurcani: Jucha illaj shuj cuidajmi, jahua pachamanda urai shamurca.

¹⁴Paica, cashna nishpami ninanda caparijurca: ‘Chai quirutaca urmachichi. Chai quiru malquicunatapash, tucuillata fitichi. Fangacunatapash, tucuillata anchuchichi. Chaipi fucushca granocunatapash, caiman chaiman shitaichi. Chai quiru ucupi sirinajuj animalcunapash, anchurichi. Chai quiru malquicunapi tianajuj alasyu animalcunapash, richi.

¹⁵Ashtahuangarin troncotaca, sapicunandi chaipillata saquichilla. Chaitaca, jirru cadenacunahuan, bronce cadenacunahuan, pamba jihua chaupicunapi huatashpa saquichi. Chaica, jahua pachamanda urmashca paramuhuan mutiyachun. Micuitapash animalcunahuan purishpa, pamba jihuata micuchun saquichi.

¹⁶Paipaj shungutapash, runapaj shungupaj randica, animalpaj shungutashna cuchun. Canchis huatacaman chashna causachun.

¹⁷Shina tucuchun mandashcataca, jucha illaj cuidajcuna parlarishpami, chashna mandarca. Runacuna mandana llactataca, jahua pachapi causajuj Dios mandajujta cai pachapi causajcuna yachachunmi, chashna villarca. Chai mandanataca, pai piman cungapaj munashpapash cujlla cajta, pai munashpaca tucuicunata yali yangalla runatapash mandanapi churajlla cajta yachachunmi, shina villajurca’ nijurcami.

¹⁸Cai muscuitaca, jatun mandaj Nabucodonosor ñucami ricurcani: Chai muscui ima cajtaca, can Beltsasarllata villahuayari. Ashtahuangarin ñuca mandajuj llactapi tiaj ninanda tucui yachajushcacunapash, chai muscui ima cajtaca na villai ushanllu. Cambica, jucha illaj dioscunapaj espiritumi causajun. Shina cashcamandami, ñuca muscushcataca villai ushangui” ninmi.

¹⁹Shina nijpimi, Beltsasar nishca Danielca, paipaj yuyaipi ninanda musparishpa, shuj horastashna upalla quedarca. Chaimandami jatun mandajca, cashna nirca: “Beltsasar, ñuca muscushcata canman villajpi, chai muscui ima cajta ñucaman villanamandaca, ama manllarichu” nircami. Shina nijpimi Beltsasar runaca, cashna nijurca: “Ñucata mandajlla, cambaj muscuica canda fiñajcunapaj cashpami ali canman. Chai muscui ima cashcapash, canda llaquichingapaj munajcunapaj cashpami ali canman.

²⁰Canga, shuj quiru viñashpa, shinlli shinlli tucujtami ricurcangui. Chai quirupaj umapash, jahua pachacaman chayajtami ricurcangui. Chai quirutaca, cai pacha tucuri manñacunamandapash, ricunalla cajtami ricurcangui.

²¹Chai quirupaj fangapash juyailla, granocunapash ninandami fucujurca. Chaipi fucushca granoca, tucuicuna micungapaj pactanami carca. Chai quiru ucupimi, animalcunapash causanajun carca. Chai quiru malquicunapimi, jahuata rij alasyu animalcunapash, tazinda ruranajun carca.

²²Jatun mandajlla, canllatami chai quiru viñanshna jatun tucushpa, ninan shinlli tucurcangui. Jahua pachaman chayajta jatun tucushpami cai pacha tucuri manñacunacaman mandajungui.

²³Can jatun mandajca, jahua pachamanda jucha illaj shuj cuidaj urai shamujtami ricurcangui. Chai cuidajca, cashnami nijurca: ‘Chai quirutaca, fitishpa tucuchishpa saquichi. Ashtahuangarin troncotaca, sapicunandi chaipillata saquichilla. Chaitaca jirru cadenacunahuan, bronce cadenacunahuan, chai jihua junda pambapillata huatashpa saquichilla. Chaica, jahua pachamanda urmashca jamzi paramuhuan mutiyajuchun, micuitapash animalcunahuan purishpa micuchun, chashna saquichi. Canchis huata yalingacaman chashna causachun saquichi’ nijurcami.

²⁴Jatun mandajlla, jahua pachapi causajuj Diosca, ñuca amo can jatun mandajta llaquichingapajmi, cai muscui ima cajtaca cashna villachijun:

²⁵Candaca, gentecunapaj chaupimanda shitajpimi, pambapi animalcunahuan causangui. Candaca huagratashnami, jihua pambacunapi michinajunga. Canga, jahua pachamanda urmashca paramuhuanmi armachishca cangui. Canchis huatacamanmi, chashna causangui. Runacuna mandana llactataca, jahua pachapi causaj Dioslla mandajujta, shinallata chai mandanataca, pai piman cungapaj munashpapash, cujlla cajta can yachangacamanmi, chashna causangui.

²⁶Shinallata troncotaca, sapicunandi chaipillata saquichun mandajtami ricurcangui. Chaica, jahua pachamanda tucuita mandaj cajta can yachashca jipaca, can mandajushca llactataca, canllata cutin japinatami villajun.

²⁷Shina cashcamandaca jatun mandajlla, ali yuyaita ñuca cushcata uyahuayari: Imatapash cashcatapacha rurashpami, chai juchamandaca cacharichi tucungui. Nalicunata can rurashcata anchuchijuchumbash, llaquichi tucushpa causajcunata llaquishpami causana cangui. Shina rurashpaca, imapash na tucushpa, casilla aliguta causashpa catinguipashchari” nijurcami.

²⁸Tucui caicunami, jatun mandaj Nabucodonosor runapajman shamurca.

²⁹Shina villashcamandaca, ña huata tucujpimi, jatun mandajca, Babilonia llactapi mandashpa tiajuna huasipi caiman chaiman purijurca.

³⁰Shina purijushpami, cashna rimari callarirca: “Cai jatun Babilonia pueblotaca, ¿nachu ñuca rurachircani? Caitaca, ñuca mandana huasita caipi charingapajmi, ñuca ninan ushaihuan rurachircani. Ñuca mandajushcamanda ninanda alicachi tucungapajmi, caitaca rurachircani” nirijurcami.

³¹Jatun mandaj chashna nirijujpillatami, jahua pachamanda cashna nij uyarirca: “Jatun mandaj Nabucodonosor, candami cashna nirca: ‘Can mandana llactataca, ña quichui tucurcanguimi.

³²Candaca, gentecunapaj chaupimanda shitajpimi, pambapi animalcunahuan causangui. Candaca huagratashnami, jihua pambacunapi michinajunga. Canchis huatatami chashna causangui. Runacuna mandana llactataca, jahua pachapi causajuj Dios mandajujta, shinallata chai mandanataca, pai piman cungapaj munashpapash cujlla cajta yachangacamanmi, chashna causangui’ nircami” nijmi uyarirca.

³³Chai horasllatami, Nabucodonosor shuti runa chashna tucunaca pactarca: Shinamandami, gentecunapaj chaupimanda llujchishpa shitai tucurca. Micunatapash, huagrashnami jihuata micujurca. Shinallata jahua pachamanda urmashca paramuhuanmi mutiyajurca. Paipaj tucui aichapimi, jatun angapaj plumashna milmacuna viñarca. Sillucunapash, alasyu animalcunapaj sillucunashnami tucurca.

³⁴“Ashtahuangarin ñuca chashna purijuna tucuri huatacuna pactajpimi, Nabucodonosor ñucaca, jahua pachata vichai ricurcani. Shina ricujpimi, gentepaj yuyaita ñucaman tigrachihuarca. Chaimandami jahua pachapi causajuj Diosta aligumari cangui nircani. Causaita causaicaman causajuj Diostaca, jatunmi cangui nishpami alicachircani. Pai mandana llactaca, causaita causaicaman na tucurij mandanami. Paica, tucui mirai miraicunacaman mandajungallami.

³⁵Paipaj ñaupajpica, cai pachapi causajcunaca tucuicunallata imapash na canllu. Paimi, jahua pachapi ima tiajcunata, tucui cai pachapi causajcunataca, pai munashcata ruran. Paipaj maquihuan imata rurajujpipash, paipaj maquita charishpa: ‘¿Imatata rurajungui?’ nitaca, pipash na ushanllu nircanimi.

³⁶Chai horasllatami, gentepaj yuyaita tigrachihuarca. Shinallata ñuca mandashpa tiajuna llactatapash, alicachi tucunapash, jatun canapash ñucamanmi tigramurca. Ñuca churashca mandajcunapash, ñucaman ali yuyaita cujcunapashmi ñucataca mascahuarca. Shinami ñucaca, ñuca mandana llactatallata cutin mandajurcani. Chai jipaca, punda charishca ushaitapash yali ushaitami carahuarca.

³⁷Cunanga, Nabucodonosor ñucaca, jahua pachata Jatun Mandajtami alicachishpa jatunyachini. Paitaca ninandami alicachini. Pai tucui imata rurashcapash na llullachu, imatapash cashcatapachami rurajun. Paica, jariyashpa jatun tucujcunatapash urai cumuchi ushanllami”.