Read Imbabura Highland Quichua DANIEL 5 Bible Online

DANIEL 5 - Imbabura Highland Quichua bible

DANIEL 5

¹Belsasar shuti jatun mandajca, pai churashca huaranga mandajcunamanmi, jatun micuita rurarca. Chai huaranga mandajcunapaj ñaupajpimi, paica vinota ufiajurca.

²Belsasar runaca, cushijushpa vinota ufiajushpami, Jerusalenbi tiaj Diospaj huasimanda llujchishpa, paipaj taita Nabucodonosor shuti runa apamushca oro copacunata, culqui copacunata apamuchun cacharca. Pai jatun mandajpash, pai churashca alicachi tucushcacunapash, paipaj huarmicunapash, paipaj caishuj huarmicunapash, chai copacunapi ufiangapajmi, apamuchun cacharca.

³Shina cachajpimi, Taita Diospaj huasimanda llujchishpa apamushca, Jerusalenbi tiajushca oro copacunata apamurca. Chai copacunapimi, jatun mandajpash, pai churashca mandajcunapash, paipaj huarmicunapash, paipaj caishuj huarmicunapash ufianajurca.

⁴Vinota chashna ufiashpami, orota, culquita, bronceta, jirruta, caspita, rumita rurashca dioscunata alicachinajurca.

⁵Chai horasllatami, candeleropaj ñaupajpica, shuj runapaj maqui dedocuna ricurirca. Chai maquipimi, calhuan yurajyachishca mandashpa tiajuna huasi pircapica escribijurca. Chai maqui escribijujtami, jatun mandajca ricurca.

⁶Chaita ricushpami, jatun mandajca ninanda manllarishpa, ñavipash quillu quillu tucushpa, paipaj yuyaicunapash ninanda muspachijurca. Paipaj cinturaspash fuerza illaj tucushpami, cunguricunapash paipura huactarijta chujchujurca.

⁷Chaimandami jatun mandajca, yachajcunata, caldeocunata, yumbucunata pushamuichi nishpa, shinllita caparirca. Babilonia llactapi causaj yachajcuna ña shamujpica, jatun mandajca cashnami nirca: —Chai pircapi escribishca tiajujta, maijambash leyishpa chai escribishca ima nijujta villajpica, morado juyailla churajunatami churachisha. Cungapipash, oro cadenatami churajushca puringa. Ñuca mandajuj llactapipash, ishcaipaj jipa mandaj cachunmi churasha— nircami.

⁸Shina nijpimi, jatun mandajpaj alipacha yachajushcacunataca, tucuicunata paipajman pushamunajurca. Ashtahuangarin paicunaca, chai escribishcataca na leyi ushanajurcachu. Chai escribishca ima nijujta, jatun mandajman villaitapash na ushanajurcachu.

⁹Chaimandami jatun mandaj Belsasar runaca, ninandapacha musparishpa ñavipash quillu quillu tucurca. Pai churashca mandajcunaca, imata ruraitapash na ushanajurcachu.

¹⁰Jatun mandajpash, pai churashca mandajcunapash rimarinajujta uyashpami, jatun mandaj huarmica, jatun micuita ruranajuj ucuman yaicurca. Chaipimi, cashna nijurca: —Jatun mandajlla, canga causaita causajupanguilla. Ama cambaj yuyaipi yapata musparishpa, ñavipash quilluyajuichu.

¹¹Can mandajuj cai llactapica, shuj runapimi jucha illaj dioscunapaj espíritu causajun. Cambaj taita causajui punllacunapica, paimi michashna imatapash ricuj, ali yuyaitapash charij carca. Paica, dioscunashnalla alipacha yachajushcapashmi carca. Jatun mandajlla, cambaj taita jatun mandaj Nabucodonosor runaca, paitami tucui ninan yachajcunata, luzerocunata ricujcunata, caldeocunata, yachajcunata, mandaj cachun churarca.

¹²Chai runaca Danielmi. Paitami, jatun mandajca, Beltsasar shutita shutichirca. Paitami, tucuicunata yali ali yuyaita charij, imatapash alipacha yachajushca, imatapash ali entendij cashcamandaca, muscushcacuna ima cajtapash villajlla cajta ricurca. Pipash na yachai ushanallacunatapash, ima cajta na yachai ushanallacunatapash villajlla cajtapashmi ricurca. Shina cashcamandaca cunambash, Danielta cayailla. Paica, chai escribishca ima nijujtapash villangallami— nijurcami.

¹³Shina nishpami Danieltaca, jatun mandajpaj ñaupajman pushamunajurca. Chaipimi jatun mandajca, Danieltaca cashna nijurca: —¿Canllu Judea llactamanda ñuca taita prezu apamushca, Judá llactamanda Daniel cangui?

¹⁴Ñucaca, jucha illaj dioscunapaj espíritu cambi tiajtami yachani. Tucuicunata yali ali yuyaita charij, michashna imatapash ricuchij, alipacha yachajushca cajtapashmi yachani.

¹⁵Cunanga, cai escribishcata leyishpa, ima nijushcatapash ñucaman villachunmi, alipacha yachajushcacunata, luzerocunata ricujcunata, ñuca ñaupajman pushamuchun cacharcani. Ashtahuangarin cai escribishca ima nijujtapash, pipash na villai usharcachu.

¹⁶Shina cajpipash ñucaca, candami imatalla ricushcacuna ima cajta villaj, ima na ushanallacunata alichij cajta uyani. Cunan cai escribishcata can leyishpa, chai escribishca ima nijujtapash villajpica, morado juyailla churajunatami churachisha. Cambaj cungapipash, oro cadenatami churachisha. Ñuca mandajuj llactapipash, ishcaipaj cati mandaj cachunmi churasha— nijurcami.

¹⁷Shina nijpimi Danielca, jatun mandajpaj ñaupajpi cashna nishpa tigrachirca: —Ima alicunata carangapaj munashcataca, quiquimbajllata saquipailla. Alita rurashcamanda tigrachinataca, shujcunaman cupailla. Ñucaca, can jatun mandaj uyachun leyishpa, chai escribishca ima nijujtapash villashallami.

¹⁸Jatun mandajlla, jahua pachapi causajuj Taita Diosmi, cambaj taita Nabucodonosor runamambash, llactacunata mandaj cachun, jatunyachi tucuchun, ninanda alicachi tucuchun, mandachumbash curca.

¹⁹Shina jatunyachishcamandami, tucui gentecunapash, shuj shuj llactacunapi causajcunapash, shican shican rimaita rimajcunapash, paipaj ñaupajpi manllaihuan chujchunajurca. Maijandapash pai huañuchingapaj munashpaca, huañuchinllami carca. Maijandapash causachun saquingapaj munashpaca, causachun saquinllami carca. Maijanda alicachi tucunapi churangapaj munashpapash, churanllami carca. Maijanda yangapi churangapaj munashpapash, yangapi churanllami carca.

²⁰Ashtahuangarin paipaj shungupi jariyashpa, paipaj yuyaipash jariyashpa, ninan shinlli shungu tucushcamandami, paipaj llactata mandangapaj tiarinataca quichui tucurca. Pai jatun cashcatapashmi, quichui tucurca.

²¹Chaimandami gentecunapaj chaupimanda anchuchi tucurca. Paipaj yuyaipash, animalcunapaj yuyaishna tucushpami, sacha burrocunahuan causajurca. Paimanmi, huagramanshna jihuata micuchinajurca. Shinallata jahua pachamanda urmashca paramuhuanllami mutiyajurca. Runacuna mandana llactataca, jahua pachapi causajuj Taita Diosllami mandajun. Chai mandanataca, pai piman cungapaj munashpapash, cujlla cajta yachangacamanmi, chashna causajurca.

²²Paipaj churi can Belsasarca, tucui chaicunata yachashpapash, cambaj shungupi jariyanataca na saquishcanguichu.

²³Ashtahuangarin jahua pachapi causajuj Jatun Diosta na cazushpa jariyashpa jatun tucushpami, paipaj huasimandaca copacunata cambaj ñaupajman apamuchun cachamurcangui. Chai copacunapimi cambash, can churashca mandajcunapash, cambaj huarmicunapash, cambaj caishuj huarmicunapash vinota ufiarcanguichi. Shina rurashca jahuami, napash ricuj, napash uyaj, napash imata yachaj, culquita, orota, bronceta, jirruta, caspita, rumita rurashca dioscunatara alicachircangui. Ashtahuangarin cambaj causaica, Taita Diospaj maquipimi. Tucui cambaj causaitaca, paimi ricujun. Paitaca, ima horasllapash na alicachircanguichu.

²⁴Chaimandami paipaj ñaupajmanda cachamujpi, chai maquica cai shimicunata escribishca.

²⁵Chai escribishcapica: MENE, MENE, TEKEL, UPARSIN nishca shimicunami tiajun.

²⁶Chai shimicunaca caitami nijun: MENE nishpaca: Taita Diosca, can mandana llactataca caicamanlla cachun nishpami, ña tucurichun mandashca nijunmi.

²⁷TEKEL nishpaca: Balanzapi pezajpica, faltajmi ricurishcangui nijunmi.

²⁸PERES nishpaca: Can mandana llactataca quichushpami, Media shuti, Persia shuti llacta runacunaman cushca nijunmi— nijurcami.

²⁹Shina nijpimi Belsasar runaca, morado juyailla churajunata, Danielman churachirca. Cungapipash, oro cadenatami churachirca. Shinallata mandana cai llactapica, ishcaipaj cati mandajmi nishpapashmi, tucuicunaman villachirca.

³⁰Chai tutallatami, caldeocunata jatun mandaj Belsasar runaca, huañuchi tucurca.

³¹Pai huañujpica, Media shuti llactamanda Darío shuti runami, mandana llactataca japirca. Paica, sucta chunga ishcai huatatami charirca.