Read Imbabura Highland Quichua DANIEL 6 Bible Online

DANIEL 6 - Imbabura Highland Quichua bible

DANIEL 6

¹Darío shuti runaca, alimi canga yashpami, pai mandana tucui llactacunapi mandachunga, patsaj ishcai chunga sátrapa nishca mandajcunata churarca.

²Chai satrapacunata mandachunga, quimsa mandajcunatami churarca. Chai quimsa mandaj puramanda shujca, Danielmi carca. Jatun mandajta ama llaquichijuchunmi, chai satrapacunataca chai quimsamanra tucui imata cashpapash villachun mandarca.

³Ashtahuangarin Danielca satrapacunata, llactacunata mandajcunata yali ali yuyaita charijmi carca. Shinamandami jatun mandajca, pai mandajuj tucuilla llactata mandaj cachun, churanata yarijurca.

⁴Chaimandami mandajcuna, satrapacunaca, Danielta imashnallapash juchachingapaca, pai imashna mandajujta ricurianajurca. Ashtahuangarin juchachingapaca, ima nalitallapash na tarircachu. Danielca, ali cazuj, ima mapa munaicunatapash na charij, ima pandatapash na rurajmi carca.

⁵Shina cajpimi chai runacunaca, cashna ninajurca: “Cai Danieltaca, imamanda juchachitapash na usharingachu. Paitaca, paipaj Taita Dios imata mandashcamanda juchachitallami ushashun” ninajurcami.

⁶Shina nishpami, mandajcuna, satrapacunaca, jatun mandajpaj ñaupajpi tandanajushpa, cashna ninajurca: —¡Jatun mandaj Dariolla, canga causaita causajupanguilla!

⁷Ñucanchica, tucui llactacunata mandajcuna, satrapacuna, soldadocunata mandajcuna tandanajushpami, mandashcata churapai ningapaj yarinajurcanchi: Cai quimsa chunga punllacunapi, maijan shuj diosta cashpa, na cashpaca canmanda ashtahuan shuj runata cashpa mañajcunaca, leonguna tiaj utujupi shitai tucuchun nipanchimi.

⁸Cunanga, jatun mandajlla, shina mandashcata alipacha canllata firmapai. Shina rurajpimi, caitaca pipash na yangapi churai ushanga. Media shuti, Persia shuti llactacunapaj mandashcapi nijunshnallata amapacha anchuchi tucushca cachun— ninajurcami.

⁹Shina ninajujpimi, Darío shuti jatun mandajca, chai mandashcatapash, na ruranachu nishpa jarcashcatapash firmarca.

¹⁰Chai mandashcapi jatun mandaj firmashcata Daniel yachashpami, paipaj huasiman yaicurca. Chai huasi ucuman yaicushpami, Jerusalén ladoman ricuna ventanacunata pascashpaca, punllapi quimsacaman paipaj Taita Diospaj ñaupajpi cungurishpa, punda imashna mañan cashcashnallata pashi nishpa mañajurca.

¹¹Chai mandajcuna tandanajushpa shamushpaca, paipaj Taita Diospaj ñaupajpi, ayudahuayari nishpa ninanda mañajujtami Danieltaca ricurca.

¹²Chaita ricushpaca, jatun mandajpajman rishpami, pai jatun mandaj mandashcata yarichishpa, cashna ninajurca: —Jatun mandajlla, ¿nachu canga cai quimsa chunga punllacunapi maijan shuj diosta cashpa, na cashpaca canmanda ashtahuan shuj runata cashpa mañajcunaca, leonguna tiaj utujupimi shitai tucunga nishpa mandashcata alipacha churarcangui?— ninajurcami. Shina nijpimi jatun mandajca, cashna nishpa tigrachirca: —Ari, shinapachami rurarcani. Media shuti, Persia shuti llactacunapi mandashcashnallata pactachinajuchunmi mandarcani. Chaitaca, pipash na yangapi churai ushanachu— nircami.

¹³Shina nijpimi jatun mandajpaj ñaupajpica, cashna nishpa tigrachinajurca: —Judá llactamanda prezu apamui tucushca puramanda Danielmi, candaca na manllan. Jatun mandajlla, chashnapacha pactachun, can mandashpa churashcatapash na cazunllu. Ashtahuangarin punllapi quimsacamanmi, paipaj Diostaca mañan— ninajurcami.

¹⁴Chaita uyashpami, jatun mandajca ninanda llaquirirca. Shina llaquirishpami, Danielta imashnallapash cacharichisha yajurca. Shina yashpami cacharichingapaca, indi huashajungacaman imatallapash rurajurca.

¹⁵Ashtahuangarin chai mandajcunaca, jatun mandajpaj ladopi muyundi shayarishpami cashna ninajurca: —Jatun mandajlla, Media shuti, Persia shuti llactacunapi mandashcapica, cashnami nijun: ‘Imata villashcata, ima mandashcata chashnapacha cachun jatun mandaj churashcataca, ama shujman tigrachishca cachun’ nijunmi. Chaitaca canllata yachanguimi— ninajurcami.

¹⁶Shina ninajujpillatami, jatun mandajca apachun cacharca. Shina cachajpimi, Danielta apamushpaca, leonguna tiaj utujupi shitarca. Chaipimi, jatun mandajca Danieltaca cashna nirca: —Canga, punllandimi cambaj Taita Diosta servishpa causangui. Paillata, candaca cacharichishca cachun— nircami.

¹⁷Ña shitashpaca, shuj jatun rumita apamushpami, chai utuju pungutaca quilpanajurca. Chai rumitaca, jatun mandajca paipaj surtijashuan, pai churashca mandajcunapaj surtijashuan sellashpami churarca. Danielta chaiman shitangapaj yarishcataca, ama shujman tigrachingapajmi, chashna ruranajurca.

¹⁸Chai jipaca jatun mandajca, mandashpa tiajuna huasiman rishpami, na micushpa sirijurca. Tocanacunata apamushpa, paipaj ñaupajman shamuchumbash na munarcachu, puñuitapash na usharcachu.

¹⁹Jatun mandajca, cayandi tutamandata jatarishpami, leonguna tiaj utuju ladoman calpashpa rirca.

²⁰Chai utujuman quimirishpami, llaquilla shimihuan Danieltaca, cashna nishpa caparirca: —Causajuj Taita Diosta servij Daniel, canga punllandimi paita servishpa causarcangui. Pai Taita Diosca, ¿leongunapaj shimimanda cacharichi usharcachu?— nircami.

²¹Shina nijpimi Danielca, jatun mandajtaca cashna nirca: —Jatun mandajlla, canga causaita causajupailla.

²²Ñuca Taita Diosca, paipaj angeltami cachamurca. Paimi, leonguna ñucata ama imatapash rurachunga, shimita vicharca. Ñucataca, paipaj ñaupajpica ima nalitapash, na rurashcatami ricuhuashca. Can jatun mandajpaj ñaupajpipash, ima nalitapash na rurashcanichu— nircami.

²³Shina nijpimi jatun mandajca, Danielmandaca ninandapacha cushijurca. Shina cushijushpami, chai leonguna tiaj utujumandaca, Danielta llujchinajuchun mandarca. Shina mandajpimi, Danieltaca leongunapaj utujumanda llujchirca. Shina llujchishpaca, imallapash na chugrishcatami ricurca. Paica, paipaj Taita Diosta yarijushcamandami, imallapash na tucushca carca.

²⁴Chai jipaca, jatun mandajllata apamuchun mandajpimi, Danielta juchachij mandajcunata pushamushpa, leonguna tiaj utujupi paicunapaj huahuacunandi, huarmicunandi shitanajurca. Nara chai utuju alpaman urmajpillatami, leongunaca paicunata japishpa, tucuilla tullucunata faquishpa micunajurca.

²⁵Chaimandami, Darío shuti jatun mandajca, tucui gentecunaman, shuj shuj llactacunapi causajcunaman, shican shican rimaita rimaj tucui llactapi causajcunaman, cashna nishpa escribichirca: “Tucui cangunapaca, casilla ali causai ashtahuan tiashca cachun.

²⁶Ñucami, cai mandashcataca cuni: Ñuca mandajuj tucui llactacunapi causajcunaca, Danielpaj Taita Diospaj ñaupajpi manllaihuan tucuicuna chujchuichi. Paica, causaita causaicaman causajuj Taita Diosmi. Pai mandana llactaca, napacha tucuchi tucungachu. Causaita causaicaman mandajungallami.

²⁷Paimi, ima llaquimandapash quishpichishpa cacharichin. Jahua pachapipash, cai pachapipash juyaillacunatami ruran. Paimi Danieltaca, leonguna micunamandapash cacharichirca” nishpami escribichirca.

²⁸Danielca, Darío mandajuj huatacunapipash, Persia llactamanda Ciro shuti runa mandajuj huatacunapipash, aligutami mandajurca.