Read Imbabura Highland Quichua OSEAS 10 Bible Online

OSEAS 10 - Imbabura Highland Quichua bible

OSEAS 10

¹Israelcunaca, fanga junda uvas yurashnami, ashtaca granocunata paicunapajllata fucuchinajun. Ashtaca granocunata charishcashnallatami, altarcunatapash mirachinajurca. Paicunapaj alpacunapi ashtaca granocuna fucushcashnallatami, yanga dioscunatapash mirachinajurca.

²Paicunapaj shungupipash, ishcai yuyaihuanmi causanajun. Paicunaca, cunanmi llaquichi tucuna ricuringa. Paicuna rurashca altarcunata, yanga dioscunataca, Mandaj Diosmi urmachishpa ñutushpa tucuchinga.

³Chaimandami cunanga, cashnatapacha ninajunga: “Ñucanchica, Mandaj Diosta na manllashcamandami, jatun mandajtapash na charinchi. Jatun mandajca ñucanchimandaca, ¿imatashi ruranman?” ninajungami.

⁴Ari nishpa juramentushpapash, yanga llullashpallami chashna ninajushca. Chaimandami llaquicunaca, huachushca alpacunapi jayaj ajenjoshna ashtahuan miranga.

⁵Samaria pueblopi causajcunaca, Bet-avén shuti pueblopi tiaj shicu dioscunamandami manllarinajunga. Chai pueblopi causajcunaca, chai shicu diosmandami huacanajunga. Chai dios juyailla cajpi cushijuj curacunapash, ninandami huacanajunga. Chai juyailla cashcapash, tucuchi tucungami.

⁶Chai shicu diosca, Jareb shuti jatun mandajman carangapajmi, Asiria llactaman apai tucunga. Chaimandami Efraín ailluca, pingaichi tucunajunga. Israelcunapash, paicunallata nali yuyaita cushcamandami, pingai tucunajunga.

⁷Samaria pueblota jatun mandajca, yacupi huambujuj putsujushnami chingarca.

⁸Avén shuti pueblo lomacunapi tiaj altarcunapi, israelcuna juchata ruranapash tucuringami. Chai altar jahuacunapica cashacuna, tsinicunami viñanga. Chaimandami urcucunatapash, lomacunatapash: “Ñucanchita llapishpa quilpahuaichiyari” nishpa caparinajunga.

⁹“Israelcunalla, Gabaa shuti pueblopi causanajui punllamandapachami juchata ruranajunguichi. Chaipimi quedanajurca. Gabaa pueblopica, nalita rurajcunataca, macanajuica na japircachu.

¹⁰Paicunataca, ñuca munashca horasmi llaquichisha. Paicuna yapa nalita rurashcahuan huatarishcashna causanajujpipash, shuj gentecuna tandanajushpami llaquichij shamunga.

¹¹Efraín ailluca, trillanatalla munaj, mansayachishca malta shicushnami. Ashtahuangarin paicunapaj juyailla cunga tullupica, ñucami sarushpa yalisha. Efraín aillumanllatami, yugota apachisha. Judá shuti runapaj miraicunami yapunga, Jacobopaj miraicunaca curpacunatami ñutunga.

¹²Cangunaca, tarpunshna imatapash cashcatapacha ruraichi. Dios llaquinataca, cozechanshna japichi. Tarpungapaj alpata alichinshnami, alichirina canguichi. Cunanga, Mandaj Dios shamushpa imatapash cashcatapacha ruranata cangunata yachachina punllacaman, paita mascana punllacunami chayamushca.

¹³Cangunaca, yapunshna nalita rurashpa Diosta na manllashcamandami, cozechanshna nalitallata japircanguichi. Llulla shimicunatami, imapash fucushcata micunshna chasquinguichi. Canguna nalita rurashpa causashcata, ninan shinlli ashtaca runacunata yariashpa causashcamandami, chashna tucunguichi.

¹⁴Chaimandami, cangunapaj gente purapica, ninanda caparinajui jataringa. Shinlli torrecunatapashmi, tucuilla urmachishpa tucuchinga. Bet-arbel shuti pueblopi causajcunahuan macanajui punllapi, Salmán shuti jatun mandaj tucuchishcashnami tucuchinga. Chaipimi mamaca, paipaj huahuacunandi tucuchi tucurca.

¹⁵Bet-el shuti pueblopi causajcunalla, canguna yapa nalita rurashcamandaca, chashnallatami llaquichinga. Israelcunata jatun mandajpash, narapash ali pacarijpillatami huañuchi tucunga.