Read Imbabura Highland Quichua OSEAS 11 Bible Online

OSEAS 11 - Imbabura Highland Quichua bible

OSEAS 11

¹Israelcunataca, chairalla viñaicunashna cajpica ninandami juyarcani. Ñuca churitaca, Egiptomandami cayarcani.

²Shina cayajujpipash, ñucamandaca ashtahuanmi caruyanajurca. Baal shuti dioscunamanrami, animalcunata cushpa huañuchinajurca. Yanga dioscunamanmi, sahumeriocunata carashpa cushnichinajurca.

³Shina cajpipash Efraín aillutaca, paicunatapacha rigramanda aisashpami, ali ñambi purichun yachachircani. Ashtahuangarin paicunaca ñuca cuidajushcataca, na yacharcachu.

⁴Ñucaca, paicunataca huascahuan aisanshnami, juyashpa ñucapajman pushamurcani. Paicunapaca, cunga tullumanda yugota anchuchij runacunashnami anchuchircani. Micunatapash, paicunapaj ñaupajpimi churarcani.

⁵Egipto llactamanga, na tigrangachu. Ashtahuangarin Asiria llactapi causajcunami, paicunapaca jatun mandaj tucunga. Ñucapajman tigraringapaj na munashcamandami, chashna tucunga.

⁶Paicunapaj pueblocunapi causajcunatapash, paicunapaj muyundi llactacunapi causajcunatapashmi, espadahuan tucuchinajunga. Paicunallata, nalita yarishpa imatapash rurashcamandami, chashna tucuchinajunga.

⁷Ñuca agllashcacunaca, ashtahuan ashtahuan jariyashca tucushpami, ñucata na cazunajun. Jahua pachapi causajuj Dios ninajushpapash, napacha ñucataca pipash jatunyachingapaj munanllu.

⁸Efraín aillu gentecunalla, ¿cangunataca imashnata jichushpa saqui ushashayari? Israelcunalla, cangunataca ¿shujcunapaj maquipichu saquisha? Cangunataca, ¿imashnata Adma shuti pueblotashna, na cashpaca Zeboim shuti pueblotashna llaquichishayari? Ashtahuangarin cangunataca, tucui shungu nanarishpami, tucui juyaihuambacha juyani.

⁹Ñuca fiñashpa llaquichinataca, na cachamushachu. Efraín ailluta llaquichingapajpash, na tigrarishachu. Ñucaca na runachu cani, ashtahuangarin Taita Diosmi cani. Cangunapaj chaupipica, jucha illajmi causajuni. Cai pueblomanga, na yaicushachu.

¹⁰Paicunaca, Mandaj Diosta catishpami causanajunga. Paica, león huacanshnami rimanga. León huacanshna rimashcata uyashpami paipaj huahuacunaca, indi huashajun ladomandaca, chujchushpa shamunajunga.

¹¹Egiptomandaca alasyu animalshnami, ñapash ñucapajman shamunajunga. Asiria llactamandaca, palomashnami shamunajunga. Paicunataca, paicunapaj huasicunapillatami causachun saquisha” ninmi Mandaj Diosca.

¹²Efraín ailluca, llullahuanmi muyundi churahuashca. Israelcunapash, umachinahuanmi chashna churahuashca. Judá llactapi causajcunaca, Taita Dioshuan mandanajunrami. Diospajlla causajcunatapash cazunajunrami.