Read Imbabura Highland Quichua OSEAS 13 Bible Online

OSEAS 13 - Imbabura Highland Quichua bible

OSEAS 13

¹Efraín aillutaca, rimajta uyashpallatami manllanajurca. Paicunaca, Israel llactapica, alicachi tucushcami carca. Ashtahuangarin, Baal shuti diosta mañashpa, juchata rurashcamandami huañurca.

²Cunanga, paicuna yachashcashnallatami culquita yacuyachishpa, imamambash rijchaj dioscunata, yanga dioscunata rurashpa, juchata ashtahuan mirachinajurca. Chai jipami, gentecunataca cashna ninajurca: “Cai dioscunamanmi, animalcunata cushpa huañuchina canguichi. Cai shicu dioscunatami muchana canguichi” ninajurcami.

³Chaimandami, tutamanda fuyu ricurishpa chinganshna, tutamanda urmashca jamzi paramu chaquinshna, trillana pambamanda jupata acapana apajpi chinganshna, huasimanda llujshijuj cushni chinganshna chinganga.

⁴Ashtahuangarin ñucami, Egipto llactamanda llujchimushca punllamandapacha, cangunata Mandaj Taita Dios cani. Ñucamanda ashtahuan shuj diostaca, na charinachu canguichi. Shuj quishpichijtapash, na charinachu canguichi. Ashtahuangarin ñucatallami rijsina canguichi.

⁵Ñucaca, chaquishca jichushca pambapimi cangunataca rijsircani.

⁶Paicunapaj pambamanda na munajta micushpa vijsa pactashca cashpami, paicunapaj shungupica jariyashpa, ñucataca cunganajurca.

⁷Shinamandami paicunapaca, leonshna casha. Leopardoshnami, ñambi pacalla chapashpa llaquichisha.

⁸Huahuacunata chingachishpa, fiñarishca purijuj mama ososhnami, israelcunata tarishpaca, shunguta llujchishpa shitasha. Paicunataca, millai león micunshnami, chaipillata ñutushpa tucuchisha. Paicunataca, sacha animalcunami ñutunga.

⁹Israelcunalla, cangunaca chingashcamari carcanguichi. Ashtahuangarin ñucallami, cangunataca ayudai ushani.

¹⁰Cangunaca: “Jatun mandajtapash, shuj mandajcunatapash cuhuai” nishpami mañarcanguichi. Cunanga, cangunapaj pueblocunandi, cangunandi cuidangapaca, ¿canguna mañashca chai jatun mandajca maipitayari? ¿Cangunapaj juezcunapash maipitayari?

¹¹Ñuca ninandapacha fiñarishpami, jatun mandajtaca cangunaman curcani. Chai mandajtaca, cangunallata ñucata fiñachijpimi quichurcani.

¹²Efraín aillu nalita rurashcapash, huatashcami tiajun. Paicunapaj juchapash, alichishcami tiajun.

¹³Nanaicunaca, huahuata ungugrijuj huarmitashnami japinga. Unguna punlla pactajpi, maita llujshinatapash na yachaj, juizu illaj huahuashnami canga.

¹⁴Paicunataca, Seolman rinamandapash quishpichishami, huañunamandapash llujchishami. Huañui, ñucami canda huañuchij casha. Seol, ñucami canda tucuchij casha. Ñuca ñavimandaca, llaquinapash pacajungami.

¹⁵Huauqui purapi, Efrainbaj aillu ninanda mirajujpipash, Mandaj Dios cachamushca rupajlla huairami tucuchij shamunga. Jichushca pambamanda rupajlla huaira shamushpami, paicunapaj llujshijuj yacutaca chaquichinga. Paicunapaj pugyumanda yacupashmi tucuringa. Shinallata paicuna imata charishca munanayai juyaillacunatapash, paimi quichushpa apanga.

¹⁶Samaria pueblopi causajcunaca, paicunapaj Taita Diosta na cazushcamandami, llaquinayaita tucuchi tucunga. Paicunaca, espadahuanmi huañuchi tucunajunga. Paicunapaj huahuacunatapash, maipipash cachun shitashpami huañuchinajunga, vijsayu huarmicunatapash vijsatami liquinajunga.