Read Imbabura Highland Quichua OSEAS 14 Bible Online

OSEAS 14 - Imbabura Highland Quichua bible

OSEAS 14

¹Israelcunalla, cangunata Mandaj Taita Diospajman tigrarichiyari. Canguna juchata rurashcamandami urmashcanguichi.

²Canguna Mandaj Diospajman tigrarishpaca, cashna nishpa ninanda mañaichiyari: “Tucui nalicunata ñucanchi rurashcatapash anchuchipai, aliguta rurashcatapash chasquipai. Chashna chasquijpica, canman imagutapash caranshnami, ñucanchi shimihuambacha alicachishun.

³Asiriocunapash, ñucanchitaca na quishpichi ushangachu. Caballocunapipash, ña na tiarishunllu. Ñucanchillata rurashca dioscunataca, ima horapash na ashtahuan: ‘Caimi ñucanchi dioscuna’ nishunllu. Taita mama illaj huahuataca, canllami llaquingui” nishpa mañaichiyari.

⁴“Ñucami, paicuna na cazushpa nalita rurashcataca alichisha. Tucui juyaihuanmi juyasha. Ñuca paicunahuan fiñarishcapash anchurishcamandami, chashna rurasha.

⁵Ñucami israelcunapaca, jamzi paramushna casha. Paicunaca, lirio sisanshnami sisanajunga. Líbano shuti urcumanda quirucunashnami sapiyanajunga.

⁶Paicunaca, jatun yura malquicunashnami miranajunga. Olivos yurashnami, juyaillagu canga. Paicunaca, Líbano shuti urcushnami mishquillagu ashnanajunga.

⁷Paicuna tigramushpaca, llandujuj yura ucupimi tiarinajunga. Chaipica, trigoshnami viñanajunga, uvas yurashnami sisanajunga. Líbano urcumanda vinoshnami, mishquillagu ashnanajunga.

⁸Shinamandami Efraín ailluca, cashna nijunga: ‘Yanga dioscunahuanga, ¿imatata ashtahuan ricunata charinchi?’ nijungami. Paicuna shina ninajujtaca uyashami, ricushami. Paicunapaca, haya nishca verdella yurashnami casha. Ñucamanda fucushca granotami, paicunaca japinajunga” nircami.

⁹Cai villashcacunata yachangapaca, ¿pita alipacha yachajushca canguichiyari? Caicunata entendingapaca, ¿pita aliguta yachajushca canguichiyari? Mandaj Diospaj ñangunaca, na quinguchu. Chai ñangunataca, imatapash cashcatapacha rurajcunallami purinajunga. Ashtahuangarin ñucata na cazujcunaca, chai ñangunapillatami urmanajunga.