Read Imbabura Highland Quichua OSEAS 2 Bible Online

OSEAS 2 - Imbabura Highland Quichua bible

OSEAS 2

¹“Cangunapaj huauquicunataca: ‘Ammi’[3] nichi. Cangunapaj panicunataca: ‘Ruhama’[4] nichi.

²Cangunapaj mamataca, fiñashpa rimaichiyari, rimaichiyari. Paica, na ñuca huarmichu, ñucapash na paipaj cusachu cani. Huainayanapilla ñavita churanataca anchuchijuchun. Cazarashca jahua shujcunahuan causajushcata ricuchijujtapash, chuchu chaupimanda anchuchijuchun.

³Na chashna rurajpica, churajushcata quichushpara huacharishca punllapishnallata lluchullata saquiman. Jichushca pambatashnara ruraiman. Chaquishca pambatashnara saquiman. Yacunayaimanda huañuchunra saquiman.

⁴Paicunapaj huahuacunataca, huainayashpa charishca huahuacuna cashcamandami, napacha llaquisha.

⁵Paicunapaj mamami huainayarca. Paicunata ungujca, alicachi tucushcatapash huaglichircami. Paica, cashna nijushcamandami, chashna tucurca: ‘Ñucata juyajcunata catishpami risha. Paicunami micunata, yacuta, milmata, linota, aceiteta, ima ufianacunatapash carahuan’ nijurcami.

⁶Ricuichi, shina cashcamandami, pai purina ñandaca, cashacunata muyundi churashpa, caspicunahuan zanjata rurashpa jarcasha. Shina rurajpimi, pai rina ñangunataca na taringa.

⁷Paita juyajcunataca catishpapash, na japigringachu, mascashpapash na taringachu. Shinamandami paica, cashna ninga: ‘Ñuca punda cusapajmanllata tigrashalla. Cunambihuan ricujpica, paihuanga imapash na illaj aligutami causarcani’ ningami.

⁸Chai huarmica trigota, vinota, aceiteta ñuca carajushcataca, yaritapash na yarircachu. Ashtahuangarin ñuca carashpa mirachishca culquita, orotaca, Baal shuti diosmanrami cararca.

⁹Shinamandami cozechana punlla pactajpica, ñuca trigotapash, ñuca uvastapash, ñucallata tandachingapaj tigramusha. Shinallata pai lluchulla cajpi quilparichun, ñuca carashca milmatapash, linotapashmi quichusha.

¹⁰Cunanga, locashna pai purijushcataca, paita juyajcunapaj ñaupajpimi ricuchisha. Paitaca, ñuca maquimandaca, pipash na cachari ushangachu.

¹¹Tucui pai cushijunacunata, fiesta punllacunata, luna llullu punllacunata, samana punllacunata, tucui fiesta punllacunatapashmi tucuchisha.

¹²Paicunapaj uvascunata, paicunapaj jigoscunatapashmi chingachisha. Chaicunataca: ‘Ñuca juyashcacuna ñucaman cunatallata cushcami’ nijurcami. Nali jihuacunatalla jundachishpami, sacha animalcuna micuchun saquisha.

¹³Baal shuti dioscunaman inciensota cushnichishcamanda, aligu ricuringapaj zarcillocunata, juyailla ima huatarinacunata huatarishpa, paita juyajcunata catishpa, ñucata cungashcamandami chashna llaquichisha” ninmi Mandaj Diosca.

¹⁴“Ricuichi, ashtahuangarin paitaca, jichushca pambaman jacu nishpa pushashpami, shungupi tiarijta rimasha.

¹⁵Chai pambamandapachami, paicunapaj uvas chagracunata carasha. Acor shuti pugru pambataca, imagutapash shuyana yuyaihuan yaicuna pungutami rurasha. Chaipimi paica, chairalla viñai cashpa candashca huatapishna, Egipto llactamanda vichai shamujushca punllapishna candanga” ninmi.

¹⁶Mandaj Diosca, cashnatapashmi nin: “Chai huatacunapica, ñucataca Ishi nihuangami. Ima horapash na ashtahuan Baali nihuangachu.

¹⁷Baal shuti dioscunapaj shuticunata rimanatapash cungachishami. Chai dioscunapaj shuticunataca, ima horapash na ashtahuan rimangachu.

¹⁸Chai huatacunapica, cambaj ali cachunmi, sacha animalcunahuan, jahuata rij alasyu animalcunahuan, alpata llucashpa purij animalcunahuan ari ninajushun. Cai llactamandaca arcota, espadata, jatun macanajuitaca anchuchishami. Chaimi canga, imatapash na manllashpa aliguta puñungui.

¹⁹Shina rurashpami cunanga, imatapash cashcatapacha rurangapaj, aliguta ricushpa mandangapaj, juyaj cangapaj, llaquij cangapaj, causaita causaipaj cazarasha.

²⁰Tucuita pactachingapajmi, canhuanga cazarasha. Shina rurajpimi, Mandaj Dios cajtaca rijsihuangui” ninmi.

²¹Mandaj Diosca, cashnami nin: “Chai huatacunapica, ñucami jahua pacha imatalla mañashcataca tigrachisha. Cai pacha mañashcatapash, jahua pachami tigrachinga.

²²Shinamandami alpapica trigopash, uvaspash, olivospash fucunga. Tucui chai granocunaca, Jezreelpajmi canga.

²³Israelcunataca, ñucapaj cachunmi tarpunshna, cai llactapi churasha. Shina churashpami, Lo-ruhamataca llaquisha. Lo-ammitaca: ‘Canga, ñuca agllashcami cangui’ nishami. Paica: ‘Ñuca Taita Diosmi cangui’ nihuangami ninmi” nircami.