Read Imbabura Highland Quichua OSEAS 4 Bible Online

OSEAS 4 - Imbabura Highland Quichua bible

OSEAS 4

¹Israelcunalla, Mandaj Dios rimashca shimicunata uyaichi. Mandaj Diosca, cai llactapi causajcunataca fiñashpami rimarca. Cai llactapica, na llullaj canapash, llaquij canapash, Diosta rijsij canapash na tianllu.

²Ashtahuangarin umashpalla ari nina, llullana, huañuchina, shuhuana, huainayanallami jundashca. Cati cati huañuchishpa causanallami tian.

³Chaimandami cai llactaca, yana churajunata churajushcashna quedanga. Cai llactapi tucui causajcunapash, sacha animalcunapash, jahuata rij alasyu animalcunapash chaquinshnami tucuringa. Mama cuchapi causaj pijicunapashmi huañunajunga.

⁴“Runaca shuj runataca, napacha juchachishpa jarcashpa rimanachu. Cambaj llacta puracunaca, curata na cazungapaj munajcunashnallatami.

⁵Shina cashcamanda canga, punllami llaquichi tucungui. Profetapash, tutami canhuanllata llaquichi tucunga. Cambaj mamatapashmi causaita quichusha.

⁶Ñuca agllashca gentecunaca, na yachaimandami tucuchi tucurca. Ñuca mandashcata yachashpapash yangapi churashcamandami, candaca cura canamanda anchuchisha. Cambaj Taita Dios mandashcata cungashcamandami, cambaj huahuacunataca ñucapash cungasha.

⁷Paicunaca, imashna mirashcashnallatami, ñucata fiñashpa juchata ruranajurca. Chaimandami ñucapash, paicuna alicachi tucushcataca, rimajpi pingai tucunaman tigrachisha.

⁸Curacunaca, ñuca agllashca gentecuna, juchamanda cushcacunatami micushpa causan. Chaimandami, ashtahuan juchata rurachumbash, tucui shunguhuan munanajun.

⁹Gentecunata llaquichinshnallatami, curacunatapash llaquichisha. Paicuna imashna causashcashnallatami llaquichisha. Paicuna imatalla rurashcashnallatami cusha.

¹⁰Mandaj Diosta servinata saquishcamandami, micushpapash na vijsa pactanga. Huainayashpa causashpapash, na ashtahuan miranajungachu.

¹¹Huainayana, vinota ufiana, llullu vinota ufianami, ali yuyaihuan causanataca chingachin.

¹²Ñuca agllashcacunaca, paicunapaj yanga diostami, imata cashpapash tapunajun. Chai yamda caspimi, tapushcataca tigrachin. Paicunataca, huainayachij ayami pandachirca. Huainayangapajmi, paicunapaj Taita Diostaca saquinajurca.

¹³Urcu jahuacunapimi, animalta cushpa huañuchinajurca. Inciensotapash loma jahuacunapi, encina nishca, álamo nishca, olmo nishca ali llanduj quiru ucucunapimi cushnichinajurca. Shinamandami cangunapaj ushicunaca huainayanajunga. Cangunapaj jachungunapash, cazarashca jahuami shujcunahuan causanajunga.

¹⁴Chashna huainayajpica cambaj ushicunataca, na llaquichishachu. Cambaj jachungunatapash, cazarashca jahua shujcunahuan causajushcamandaca, na llaquichishachu. Curacunallatami, culquimanda huainayaj huarmicunahuan, nali huarmicunahuan rishpa, animalcunata cushpa huañuchinajun. Shinamandami gentecunaca, na yachashpallata chinganajunga.

¹⁵Israelcunalla, canguna huainayanajujpipash Judá llactapi causajcunallapash, na juchata rurashpami ali canman. Gilgal shuti pueblomambash, na yaicunachu canguichi. Bet-avén shuti pueblomambash, na vichai rinachu canguichi. ‘Mandaj Diosca causajumbachami’ nishpapash, na juramentunachu canguichi.

¹⁶Israelcunaca, millai malta shicushnami ñucamandaca anchurinajurca. ¿Mandaj Diosca cunanga, maltun llamacunatashnachu, jatun pambapi michinga?

¹⁷Efraín shuti ailluca, yanga dioscunatallami mañanajun, saquilla.

¹⁸Paicunapaj ufianaca huaglircami. Paicunaca, huainayanatapash napacha shaijunajurcachu. Paicunata mandajcunapash, pinganayaita ruranatallami munanajurca.

¹⁹Chaimandami paicunaca, huaira apashcashna tucunajurca. Animalcunata dioscunaman cushpa huañuchishcamandami, pingai tucunajunga.