Read Imbabura Highland Quichua OSEAS 5 Bible Online

OSEAS 5 - Imbabura Highland Quichua bible

OSEAS 5

¹Curacuna, caita uyaichi. Israelcunapash, jatun mandaj mandajuj huasipi mandashpa tiajcunapash, rinrita mañachishpa uyahuaichi. Ninan llaquica, tucui cangunapajmi. Mizpa shuti pueblopica urmachij lazushna, Tabor shuti urcupica, mandashca tiajuj linllishnami carcanguichi.

²Gentecunata huañuchishpami, jatun utuju ucu ucuman huashajushcashna tucushca. Chaimandami, tucui paicunataca ninandapacha llaquichisha.

³Ñucaca, Efraín shuti aillutaca rijsinimi, israelcunapash na rijsishcacunaca na canllu. Efraín aillu gentecunalla, cunanga canguna huainayashcamandami, israelcunapash mapayashca.

⁴Paicunapaj Taita Diospajman tigrarinataca, napacha yarinajunllu. Huainayachij aya paicunapaj shungupi junda cajpimi, Mandaj Diostaca na rijsinajun.

⁵Israelcuna na cazushpa jariyashcataca, paicunapaj ñavillatami ricuchinga. Israelcunapash, Efraín aillupash, paicunapaj juchapillatami nitijanshna urmanajunga. Judá llactapi causajcunapash, paicunahuanllatami nitijanshna urmanajunga.

⁶Paicunaca llamacunata, huarmi huagracunata apashpami, Mandaj Diostaca mascashpa purinajunga. Mascashpapash, napacha taringachu. Diosca paicunamanda anchurircami.

⁷Yachashpata na cazushpa, shujcunapaj huahuacunata tarishpami, Mandaj Diostaca fiñachinajun. Cunanga paicunapash, paicunapaj alpacunapashmi, shuj quillapilla tucuchi tucunga.

⁸Gabaa shuti pueblopica, bocinata huacachinguichiyari. Ramá shuti pueblopica, trompetata huacachinguichiyari. Bet-avén shuti pueblopica caparichiyari. Benjamín aillu gentecunalla, chujchuichiyari.

⁹Llaquichijui punllapica, Efraín ailluca, llaquinayaitami tucuringa. Israel aillucunamanmi, na llullashpa villarcani.

¹⁰Judá llactata mandajcunaca, linderocunata yalinshnami na cazunajurca. Ninanda ñuca fiñarishcataca, yacuta talinshnami paicunapaj jahuapi cachamusha.

¹¹Efraín ailluca, faquirinshna ninanda llaquichi tucunallami. Paicunaca, yanga dioscunatallami catishpa puringapaj munarca.

¹²Ñucaca, Efraín aillupaca, polilla jurushnami casha. Judá llactapi causajcunapaca, ismuchij carachashnami casha.

¹³Efraín ailluca, ung:uihuanmi llaquichi tucunga. Judá llactapi causajcunaca, carachahuanmi ismunajunga. Chaimandami Efraín ailluca, Asiria llactata jatun mandaj Jareb shuti runaman villachun cachanga. Ashtahuangarin paipash, chai ung:uita alichitaca na ushangachu, carachata jambitapash na ushangachu.

¹⁴Ñucaca, Efraín aillupaca, leonshnami casha. Judá llactapi causajcunapaca, huahua leonshnami casha. Ñuca, ñucapachami paicunata japishpa apashpa risha. Ñuca maquimanda quichungapaca, pipash na tiangachu.

¹⁵Paicuna juchata rurashcata yarishpa, ñucapajman tigraringacamanmi, ñuca causajushcamanllata tigrashpa risha. Paicunaca llaquihuan cashpami, ñucataca mascanajunga” nijurcami.