Read Imbabura Highland Quichua OSEAS 6 Bible Online

OSEAS 6 - Imbabura Highland Quichua bible

OSEAS 6

¹Shamuichi, Mandaj Diospajman tigrashunchi. Paimi ñucanchitaca, ñutunshna tucuchirca. Paillatami jambinga. Pai chugrichishcataca, paillatami huatachishpa jambinga.

²Ishcai punlla jipaca, ñucanchiman causaita cungami. Quimsa punlla jipaca causachijpimi, paipaj ñaupajpi causashun.

³Chaipica, Mandaj Diostaca ashtahuanmi rijsishpa catishun. Paica, tutamanda ña punchalla shitagrijunshna, jipa tamia, punda tamia alpapi urmanshnami, ñucanchipajman shamunga.

⁴“Efraín aillu gentecunalla, Judá llactapi causajcunalla, ¿cangunataca imatata rurashayari? Canguna juyanaca, tutamanda fuyushna, tutamanda jamzi paramushna chinganllamari.

⁵Chaimandami, ñuca ima nishcata villajcunahuan villachishpa, paicunataca chingachircani. Ñuca shimihuan rimashpami huañuchircani. Cangunata llaquichinacunaca, micha punchapamba shitanshnami canga.

⁶Animalta ñucaman cushpa huañuchingapaj randica, shujcunata llaquij cachunmi munani. Animalta ñucaman cushpa tucuillata rupachinamanda yalica, Taita Dios ñucata rijsichunmi ashtahuan munani.

⁷Ashtahuangarin paicunaca, Adanshnallatami ari ninajushcatapash, na cazunajurca. Chaipimi, paicunaca yachashpata na cazunajurca.

⁸Galaad pueblopica, nalita rurajcunalla causanajushpami, yahuarhuan mapayashca.

⁹Shuhuajcuna shuj runata chapashpa shuhuanshnami curacunapash tandanajushpa, Siquem shuti puebloman rina ñambi chapashpa huañuchinajun. Chashnami, millanayaicunata ruranajurca.

¹⁰Israelcunapica, jatun mapatami ricushcani. Chaipimi, Efraín ailluca huainayarca. Israelcunapashmi mapayanajurca.

¹¹Judá llactapi causajcunalla, ñuca agllashcacuna prezu tiajushcamanda tigrachimui punllacunami, cangunapajpash cozechanshna llaquichingapaj alichishcalla tiajun.