Read Imbabura Highland Quichua OSEAS 7 Bible Online

OSEAS 7 - Imbabura Highland Quichua bible

OSEAS 7

¹Israelcunapaj juchata ñuca jambijujpica, Efraín aillu nalita rurashcapash, Samaria pueblopi causajcuna juchacunata rurashcapashmi ricurirca. Paicunaca umachishpa, huasiman yaicushpa shuhuashpa, ñanda yalijcunata macashpa quichushpami causanajun.

²Tucui nalita paicuna rurashcata, ñuca yuyaipi charijtaca, paicunapaj shungupica yaritapash na yarinllu. Cunanga, paicuna nalita rurashcacunallatami, muyundi shayarinshna ricuringa. Chai rurashcacunaca, ñuca ñaupajpimi.

³Paicunaca llullashpa, nalita rurashpami, jatun mandajtapash, caishuj mandajcunatapash cushichinajun.

⁴Tandata rurangapaj chapushca jipaca, chai chapushca punguingacamanmi, jorno ama chiriyachun ninanda rupajyachin. Chashnallatami tucui paicunapash, cazarashca jahua shujcunahuan causanataca, napacha saquinajun.

⁵Ñucanchi jatun mandajta cushichina punllapica, pai churashca mandajcunaca ninanda machangacamanmi vinota ufiachinajurca. Paica, na cazushpa asijcunahuanmi maqui japirijurca.

⁶Jornota rupachij runaca, tucui tutapajmi yamdata churashpa, puñungapaj siririn. Jornoca, cayandi tutamandapaca, alipacha rupajyashcami pacarin. Chashnallatami paicunapash, paicuna rurangapaj munashcata yariashpa pacarinajun.

⁷Tucui paicunaca, rupajuj jornoshna cashpami, paicunapaj juezcunatapash langashna tucuchirca. Jatun mandajcunapash, tucuicunami huañurca. Pai puracunapica ñucata mañajca, maijanllapash na tianllu.

⁸Efraín shuti ailluca, shuj llactacunapi causajcunahuanmi chapurishca. Efraín ailluca, shuj ladotalla cusashca mishqui tandashnami tucushca.

⁹Paicuna imata charishcacunataca, shuj llactamanda runacunami langashna tucuchinajurca. Chaitaca, paicunaca na yacharcachu. Paicunaca, yuraj uma tucushcatapash na yacharcachu.

¹⁰Israelcuna jariyashpa jatun tucushcallatami, paicunata llaquichijuchunga, paicunapaj ñaupajpi ricuchinga. Shina cajpipash, paicunata Mandaj Taita Diospajman tigraringapaca, na munarcachu. Paitaca, napacha mascarcachu.

¹¹Efraín ailluca, imatapash na yachaj, yuyai illaj palomashnami carca. Shinamandami, Egiptopi causajcunata cayashca jahuapash, Asiria llactapi causajcunahuan tandanajunga.

¹²Paicuna chaiman rinajujpimi, paicunapaj jahuapica ñuca linllita shitasha. Jahua huairata rij alasyu animalcunatashnami, paicunataca urmachisha. Paicunapaj tandanajuicunapi villashcashnallatami llaquichisha.

¹³Ñucamanda anchurishcamandaca, ¡aij paicunaca imachari tucunga! Ñucata fiñashpa na cazushcamandami, paicunataca tucuchij llaqui japinga. Ñucami, paicunataca quishpichircani, ashtahuangarin ñucata fiñashpami, llullashpa villanajurca.

¹⁴Camapi caparishpa sirinajushpapash, na tucui shunguhuan caparishpa mañanajurcachu. Trigota, llullu vinota tandachingapaj tandanajushpapash, ñucata na cazushpa fiñachingapajllami tandanajurca.

¹⁵Ñuca yachachishpa, paicunapaj rigracunata shinllichijpipash, ñucata fiñashpami nalita yarinajurca.

¹⁶Tigrarinchi nishpapash, na jahua pachapi causajuj Diospajman tigrarinajurcachu. Ashtahuangarin arcoshnami umachinajurca. Paicunapaj shimihuan jariyashpa rimashcamandami, mandajcunapash espadahuan huañuchi tucunajurca. Chashna nalicuna cashcamandami, Egipto llactapi causajcunaca, paicunata asishpa ricunajunga.