Read Imbabura Highland Quichua OSEAS 8 Bible Online

OSEAS 8 - Imbabura Highland Quichua bible

OSEAS 8

¹Mandaj Diospaj huasita, jatun angashna llaquichingapaj shamunajujtaca, trompetata huacachishpa villayari. Ñucahuan ari ninajushcata saquishpami, ñuca mandashcataca na cazunajurca.

²Israelcunaca, ñucatami: ‘Ñucanchi Taita Dioslla, candaca rijsipanchimari’ nishpa mañanajunga.

³Israelcunaca, alita ruranataca saquircami. Paicunataca, fiñajcunami catiriashpa llaquichinajunga.

⁴Paicunaca, napash ñuca agllashca jatun mandajcunatami churanajurca. Shuj mandajcunata churanajushcatapash, ñucaca na yachashcanichu. Paicunapaj culquita, orota japishpami paicunapaj yanga dioscunata ruranajurca. Paicunallata tucuchi tucungapajmi, chashna ruranajurca.

⁵Samaria pueblopi causajcunalla, cangunapaj shicu diosmari, cangunataca ñucamanda anchuchirca. Chaimandami chai pueblopi causajcunahuanga, nina japirinshna fiñarircani. Paicunapaj juchataca, na anchuchi ushanallachu carca.

⁶Cai shicu diostapash, israelcunallatami rurarca. Caitaca, chashna ruranata yachaj runa rurashcallami, chaica na Taita Dioschu. Shina cashcamandami, Samaria pueblopi tiajuj shicu diosca, ñutui tucunga.

⁷Paicunaca, huairatalla tarpushcamandami, acapanata cozechanga. Ima granota cozechanapash, na tiangachu. Trigo viñashpapash, na jacu tucungachu. Jacu tucujpipash, na rijsishcacunami micunajunga.

⁸Israelcunaca, langajpishnami tucuchi tucunga. Ñallami shuj llacta puracunapica, na munanayai mangashna tucunga.

⁹Israelcunaca, paicunallatami Asiria llactaman rinajurca. Sacha burroshnami, paicunallata rinajurca. Efraín ailluca, paicunata juyajcunataca culquipajmi alquilarca.

¹⁰Llacta puracuna ashtaca culquipaj alquilachishpa apashca cajpipash, cunanga ñucami tandachisha. Jatun mandajpash, cati mandajcunapash llaquichijpica, asha huatacunatallami llashachinshna llaquita apanajunga.

¹¹Efraín aillu juchata rurangapaca, tauca altarcunatami rurarca. Chai altarcunataca, juchata rurangapajllami charirca.

¹²Ñucaca, juyailla mandashcacunatami escribichircani. Chaitaca, na rijsishcatashnami charirca.

¹³Ñucaman cushpa huañuchina animalcunata, huañuchishca aichatapash paicunallatami micunajurca. Shina rurachunga Mandaj Dios ñucaca, na munarcanichu. Cunanga, chashna nalita rurashcacunata yarishpami, paicunapaj juchamanda llaquichigrini. Paicunaca, Egiptomanmi tigranga.

¹⁴Israelcunaca, paicunata Ruraj Diostaca cungashpami, shuj dioscunapaj huasicunatara ruranajurca. Judá llactapi causajcunaca, muyundi jatun pircahuan pueblocunatami mirachinajurca. Ashtahuangarin chai pueblocunapica, ninata ñuca japichijpimi, mandana huasicunatapash, tucuillata rupachishpa tucuchinga” nircami.