Read Imbabura Highland Quichua OSEAS 9 Bible Online

OSEAS 9 - Imbabura Highland Quichua bible

OSEAS 9

¹Israelcunalla, shuj llactacunapi causanajuj gentecuna ninanda fahuashpa cushijunshnaca, na cushijunachu canguichi. Cangunapaj Taita Diosmanda anchurishpami huainayarcanguichi. Trigota trillana tucui pambacunapi, huainayashpa japinajushca culquitami juyarcanguichi.

²Chaimandami trillana pambapica, ima granopash illanga. Uvasta cutana pushtumandaca, llullu vinopash na llujshingachu.

³Efraín ailluca, Mandaj Dios carashca llactapica, na quedangachu. Ashtahuangarin Egiptoman, Asiria llactamanmi tigranga. Chaipimi, Dios ama micunguichu nishca micunata micunajunga.

⁴Mandaj Diosman carashpa talina vinocunapash na tiangachu. Animalcunata Diosman cushpa huañuchishcatapash, na chasquingachu. Paicunapaca, huañui huasipi micunashnami canga. Chai micunata tucui micujcunami mapa canga. Chai micunaca, paicuna micungapajllami canga. Chai micunaca, napacha Mandaj Diospaj huasiman yaicungachu.

⁵Mandaj Diosman jatun fiestata rurana punllapica, ¿imatashi cangunaca ruranguichi?

⁶Ricuichi, paicunata llaquichishpa tucuchigrijujpimi rinajurca. Ashtahuangarin Egiptopi causajcunami, paicunataca tandachinga. Menfis pueblopi causajcunami pambanajunga. Paicunapaj munanayai culquita tandachishcacunapica, tsinicunarami jundanga. Paicunapaj huasicunapica, cashacunami jundanga.

⁷Llaquichina punllacunapash chayamurcami, paicuna japinatallata cuna punllacunapash pactamurcami. Chaitaca israelcunami ricunga. Cangunallata, ninandapacha nalicunata rurashpa, yapata millanayachishcamandami, profeta runaca shinlli shungu tucushca. Diospaj Espirituta charij runapash, juizu illajmi tucushca.

⁸Efraín ailluca, ñuca Taita Diospaca chapariashpa cuidaj runacunami. Profeta runapaj tucui causaica, animalta japina lazushnamari. Chaimandami, paipaj Taita Diospaj huasipica millanayachin.

⁹Gabaa shuti pueblopi causanajui punllacunashnallatami, yapatapacha huaglinajurca. Cunanga, chashna nalicunata rurashcata yarishpami, paicunapaj juchamandaca llaquichinga.

¹⁰Jichushca pambapi uvasta tarinshnami, israelcunataca tarircani. Callaripica, cangunapaj ñaupa taitacunataca, punda fucushca jigostashnami ricurcani. Paicuna pingai tucungapajllatami ñucamanda anchurishpa, Baal-peor shuti diosta mañanajurca. Chai diosta paicuna juyashcamandami, millanayachi tucunajurca.

¹¹Efraín aillu juyailla cashcapash, alasyu animalshnami calpanga. Chaimandami huahuacunata ungunapash, na tianga. Vijsayu tucushpa huahuata ungunapash, na tiangachu.

¹²Paicunapaj huahuacuna jatunyajpipash, paicuna puramandaca anchuchishami. Shinallata paicunamanda ñuca anchurijpica, ¡aij imachari tucunga!

¹³Ñuca ricuipica, Efraín ailluca, Tiro shuti pueblopi causajcunashnami juyailla llactapi causanajurca. Shina cashpapash Efraín ailluca, paicunapaj churicunataca huañuchi tucuchunmi llujchinga.

¹⁴Mandaj Dioslla, paicunaman imata cuna cashpapash cupailla. Paicunataca, huahuata urmachijlla vijsa cachumbash, lecheta na charij huarmicuna cachumbash rurapailla.

¹⁵Paicunaca, Gilgal pueblopimi, tucui nalita ruranajurca. Chaipimi, paicunataca, millanayachi callarircani. Paicuna jatun nalicunata rurashcamandami, ñuca huasimanda llujchishpa cachasha. Paicunataca, na ashtahuan juyashachu. Paicunata tucui mandajcunapash na cazujcunami.

¹⁶Efraín aillu chugrichi tucushcamandami, sapipash chaquishca. Chaimandami, ima granopash ña na fucunga. Huahuacunata paicuna tarijpipash, chai juyashca huahuacunataca, ñucami causaita quichusha.

¹⁷Paicunallata na cazushcamandami, ñuca Taita Diosca llujchishpa shitanga. Chaimandami shuj llacta puracunapica, chingashca purinajunga.