Read Imbabura Highland Quichua JOEL 2 Bible Online

JOEL 2 - Imbabura Highland Quichua bible

JOEL 2

¹Sion urcupica, trompetata tocaichiyari. Ñucapajlla urcupica, caparishpa villaichiyari. Cai pachapi tucui causajcunaca, chujchuichiyari. Mandaj Dios shamuna punllapami ña pactamujun, ñamari chayamujun.

²Chai punllapica, manllanayai yana yana tutami tucunga. Fuyu quilpashca llandu llandu punllami tucunga. Punllayangapaca, imashnami lomacunapira punchalla shitan, chashnallatami ashtaca ninan shinlli runacuna shamunga. Paicunashnaca, ima horallapash pipash na tiarcachu. Paicuna shamushca jipapipash, jipa miraicuna causai huatacunapipash, paicunashnaca pipash na tiangachu.

³Paicunapaj ñaupajmambash, ninami ninandapacha rupajunga. Paicunapaj huashamambash, ninami tucuchinga. Paicuna nara chayamujpica cai llactaca, Edén huertashnami canga. Paicuna rishca jipaca, jichushca pambashnami llaquinayaita quedanga. Paicuna puramandaca, pipash na pacajushpa calpai ushangachu.

⁴Paicunaca, caballocunashnami canga. Caballopi tiarishca calpanajuj runacunashnami calpanajunga.

⁵Paicunaca, macanajuna carretacuna culun ninshnami, urcu jahuacunapi fahuanajunga. Chaquishca fangacuna rupanshnami uyaringa. Paicunaca, jatun macanajuiman rinalla, shuyanajuj ninan shinlli soldadocunashnami canga.

⁶Paicunapaj ñaupajpica, tucui gentecuna manllashpami, ñavicunapash quillu quillu tucunajunga.

⁷Ninan shinlli soldadocunashnami calpanajunga. Macanajunata ali yachaj soldadocunashnami, pirca jahuaman vitsianajunga. Tucuicunami, paicunapaj ñanda japishpa rinajunga, na shuj ñandaca rinajungachu.

⁸Maijambash na caishuj chaishuj t'angarinajungachu, tucuicunami paicunapaj ñandalla rinajunga. Espadapi urmashpapash, na chugringachu.

⁹Pueblopica, caiman chaimanmi purinajunga. Pata jahuacunatami calpanajunga. Huasicunaman vitsiashpami, shuhuacunashna ventanacunata yaicunajunga.

¹⁰Paicunapaj ñaupajpica, cai pachapash, jahua pachapashmi chujchunga. Indipash, lunapash yanayangami, luzerocunapash na ashtahuan punchayachingachu.

¹¹Mandaj Diosca, paipaj soldadocunapaj ñaupajpimi mandanga. Paipaj soldadocunaca, ashtaca ashtacacunami. Pai mandashcata rurajcunaca, ninan shinllicunapachami. Mandaj Dios shamui punllapica, manllanayai jatun llaquimi tianga. Chai jatun llaquicunataca, ¿pita apai ushangayari?

¹²Mandaj Diosca, cashnami nin: “Shinamanda cunanga, na micushpa huacashpa, ninanda llaquirishpa, tucui shunguhuan ñucapajman tigrarichi” ninmi.

¹³Canguna churajushcataca, na liquinachu canguichi. Ashtahuangarin cangunapaj shungutara alichirichi. Cangunata Mandaj Taita Diospajman tigrarichi. Paica, llaquishpa juyajmari, na ñapash fiñarij, ninanda llaquijmari. Llaquichingapaj munashpapash, llaquishpa jarcarijmari.

¹⁴Pai shamushpaca, cangunata llaquichina cashcamanda llaquirishpa, cangunata bendiciashpa tigranatapash, ¿pita yachanguichiyari? Chaica, cangunata Mandaj Taita Diosman imatapash caranata, talina vinota carangapajmi canga.

¹⁵Sion urcupimi, trompetata huacachina canguichi. Cangunaca: “Na micunachu canguichi” nishpa villaichiyari. Tucuicunata tandanajuchun cayaichiyari.

¹⁶Gentecunata tandachishpa, Diostalla yaringapaj tandanajuita ruraichi. Mandaj rucucunata, huambracunata, chuchujuj huahuacunatapash tandachichiyari. Chairalla cazarashcacunapash, paicuna causaj ucumanda llujshichun.

¹⁷Mandaj Diospajta ruraj curacunaca, ucuman yaicuna punguhuan altarhuan chaupipi shayarishpa huacashpa, cashna ninguichi: “Mandaj Dioslla, can agllashcacuna nalita rurashcataca cungapairi. Cambajlla cachun can agllashcacunataca, nalicachishpa rimai tucunajuchunga, ama saquipaichu. Paicunataca, shuj llactapi causajcuna mandanajuchumbash, ama saquipaichu” ninguichi. Shujcunaca: “¿Maipita paicunapaj Taita Diosca?” ninajungami.

¹⁸Mandaj Diosca, paipaj llactataca napacha saquishpami, pai agllashcacuna nalita rurashcataca cunganga.

¹⁹Mandaj Diosca, pai agllashcacunamanmi cashna nishpa tigrachinga: “Ricuichi, ñucaca micunata, llullu vinota, aceitetami carasha. Chaicunatami, na munajta micunguichi. Llacta puracunapi llaquichi tucunajuchumbash, nalicachishpa rimai tucunajuchumbash, cutinga na saquishachu.

²⁰Cangunata llaquichijcuna jahua lado llactamanda shamujpica, carucamanmi cachasha. Paicunataca, chaquishca jichushca pambapimi shitasha. Ñaupashpa shamujcunataca, indi llujshimuj lado mama cuchapimi shitasha. Huashata catimujcunataca, indi huashajuj lado mama cuchapimi shitasha. Chai huañushcacunapaj aicha ismushpami, ninandapacha ashnanajunga. Jatun llaquicunata rurashcamandami, chashna rurasha” ningami.

²¹Cai llactapi causajcunalla, imatapash na manllanachu canguichi. Cangunaca, ninanda cushijuichiyari. Mandaj Diosca, jatun manllarinacunatami ruranga.

²²Pambapi causaj animalcunapash, na manllanachu canguichi. Jichushca pambapi, jihuacunapash cutinmi verdeyanga. Yuracunapica, cutinllatami fucunga, jigoscunapash, uvascunapashmi fucunga.

²³Sionbi causaj cangunapash, cangunata Mandaj Taita Dioshuan cushijuichiyari. Paimi callari tamiataca, tamiana punllapillata cangunaman caramurca. Paimi, callari tamiatapash, jipa tamiatapash callaripishnallata cangunaman cachamunga.

²⁴Trillana pambacunapash, trigohuan jundami canga. Vinota cutana pushtumandaca, vinopash, aceitepashmi jundashpa jicharijunga.

²⁵“Oruga, saltón, revoltón, langosta nishca jurucuna granocunata micushpa llaquichinajushca huatacunataca, cutinmi alichisha. Paicunataca, ñucapaj ashtaca soldadocuna cajpimi, cangunata llaquichinajuchun cachamurcani.

²⁶Cangunaca, na munajtami micunguichi. Cangunaman jatun manllarinacunata ruraj, cangunata Mandaj Taita Dios ñucapaj shutitami alicachinguichi. Ñuca agllashcacunaca, napacha cutinga pingai tucungachu.

²⁷Shina rurajpimi ñucataca, can israelcunapaj chaupipi causajujta yachanguichi. Ñucataca, cangunata Mandaj Taita Dios cajta, ñucamanda shujca pipash na tiajtami yachanguichi. Ñuca agllashcacunaca, napacha cutinga pingaichi tucungachu.

²⁸Cai tucuita rurashca jipaca, ñuca Espiritutami talinshna tucui gentecunaman cachamusha. Shina cachamujpimi, cangunapaj churicunapash, ushicunapash ñucamanda villanajunga, rucucunapash muscunajungami. Chairalla viñaicunapash, ñuca ricuchishcatami muscuipishna ricunajunga.

²⁹Chai punllacunapica, servishpa causaj jaricunamambash, huarmicunamambashmi, ñuca Espirituta talinshna cachamusha.

³⁰Jahua pachapipash, cai pachapipash jatun manllarinacunatami ricuchisha. Yahuarta, ninata, pilarshna shayajuj cushnitapashmi ricuchisha.

³¹Mandaj Dios agllashca ninan manllarina jatun punlla nara chayamujpillatami, indica yanayanga. Lunapashmi, yahuarshna tigranga.

³²Mandaj Dios ñucata tucui mañajcunallami quishpiringa. Mandaj Dios ñuca villashcashnallatami, Sion urcupipash, Jerusalenbipash quishpirina tianga. Shinallata huaquin puchushca purapipash, Mandaj Dios ñuca cayashcacunallami quishpiringa.