Read Imbabura Highland Quichua JOEL 3 Bible Online

JOEL 3 - Imbabura Highland Quichua bible

JOEL 3

¹Ricuichi, chai punllacunapi, chai huatacunapica, Judá llactamanda, Jerusalenmanda prezu apai tucushcacunatami tigrachimusha.

²Tucui shuj llactacunapi causajcunata tandachishpami, Josafat shuti pugru pambaman cachasha. Chaipimi, ñuca agllashcacunata llaquichijcunataca, ñucapash llaquichisha. Paicunami, ñucapajlla cachun agllashca israelcunataca, shuj llacta puracunaman caiman chaiman cachashpa, ñuca llactataca chaupirinajurca.

³Ñuca agllashcacunataca suerteta rurashpami, caishuj chaishuj chaupirinajurca. Ñuca agllashcacunapaj churicunataca, culquimanda huainayaj huarmimandallami cunajurca. Ushicunataca, vinomandallami jatunajurca, chaitami ufianajurca.

⁴Shinallata Tiro shuti, Sidón shuti pueblocunapi, tucui Filistea llactapi causajcunalla, cangunahuanga ¿imatata ricunata charini? ¿Cangunaca, ñuca imashna llaquichishcashnallata, ñucatapash llaquichingapajchu munanguichi? Chashna rurajpica, canguna japinatallatami ñapash cachamusha.

⁵Cangunaca, ñuca culquita, ñuca orota, juyailla ñuca charishcacunata quichushpami, cangunapaj dioscunapaj huasicunaman aparcanguichi.

⁶Cangunaca, Judá llactapi causajcunapaj, Jerusalenbi causajcunapaj churicunataca, paicunapaj llactamanda caruman cachangapajmi, griegocunapaj miraicunaman jaturcanguichi.

⁷Ricuichi, paicunataca maiman jatushpa cachashcatapash tigrachimushallami. Chai jipami, canguna japinataca cangunapaj jahuapillata cachamusha.

⁸Cangunapaj churicunata, ushicunataca, Judá llactapi causajcunamanmi jatusha. Paicunami, caru llactapi causanajuj sabeo nishca runacunaman jatushpa cachanajunga. Mandaj Dios ñucami, chashna villani.

⁹Caitaca, tucui llacta puracunapi villaichiyari, macanajui tianatapash villaichiyari. Ninan shinlli runacunapash alichirishcalla cachun villaichiyari. Quimirimuichiyari, macanajuj tucui soldadocunapash, shamuichiyari.

¹⁰Cangunapaj azadongunataca, espadata ruraichiyari. Hocescunataca, lanzacunata ruraichiyari. Ushaita na charijcunapash: ‘Ushaita charinimi’ nishpa caparichiyari.

¹¹Ladolla llactacunapi causajcuna, tucuicuna tandanajushpa shamuichiyari” ninmi. Mandaj Dioslla, ninan shinlli cambaj runacunata paicunapajman cachamupairi.

¹²Tucui llactacunapi causajcuna, rijcharichiyari. Josafat shuti pugru pambaman vichai richiyari. Chaipimi, muyundi llactacunapi causajcuna imata rurashcataca ricuchingapaj tiarisha.

¹³Granocunaca ñami fucushca, chaitaca hoceshuan tandachichiyari. Uvasta cutana pushtupica, uvaspash jundami tiajun, cutangapaj urai shamuichiyari. Paicuna nalita rurashcacunaca, ashtacapachami.

¹⁴Imata rurashcatapash ricuchina pugru pambapica, ashtaca llactacunami tandanajurca. Paicuna imata rurashcatapash ricuchina pugru pambapi, Mandaj Dios ricuchina punllami ña chayamujun.

¹⁵Chai punllapica indipash, lunapash yanayangami, luzerocunapash na punchayachingachu.

¹⁶Mandaj Diosca, Sion shuti urcumandami león huacanshna caparinga. Pai rimajpash, Jerusalenmandami uyaringa. Jahua pachapash, cai pachapash chujchungami. Shina cajpipash pai agllashcacunaca, Mandaj Diostallami shuyanajunga. Paica israelcunapaca, shinlli torreshnami canga.

¹⁷“Shina rurajpimi ñucataca, cangunata Mandaj Taita Dios cajta rijsihuanguichi. Ñucapajlla Sion urcupi causajujtami rijsihuanguichi, Jerusalenbash ñucapajlla tucujpimi shuj gentecunaca, cutinga chaitaca na ashtahuan yalinajunga.

¹⁸Chai punllacunapimi, urcucunamandaca llullu vino talirijunga, lomacunamandaca lechemi talirijunga. Judá llactapi tiaj tucui jatun larcacunataca, ashtaca yacumi calpajunga. Mandaj Diospaj huasimandapash, shuj pugyumanda yacu llujshishpami, Sitim shuti pugru pambaman jicharinga.

¹⁹Egipto llactaca, tucuchi tucungami. Edom llactapash, llaquinayaita jichushca pambamanmi tigranga. Judá llactapi causajcunata nalicachishpa rimashcamanda, ima nalitapash na rurajcunata huañuchishpa yahuarta jichashcamandami, chashna tucunga.

²⁰Ashtahuangarin Judá llactaca, causaita causaicamanmi gentecunahuan junda canga. Mirai mirai huahuacunami, Jerusalenbica causanajunga.

²¹Yahuarlla cajpi nara fichashcataca, ñucami fichasha. Mandaj Dios ñucami, Sion urcupi causasha” ninmi.