Read Imbabura Highland Quichua AMÓS 2 Bible Online

AMÓS 2 - Imbabura Highland Quichua bible

AMÓS 2

¹Mandaj Diosca, cashnatapashmi nijurca: “Moab llactapi causajcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunaca, Edom llactata jatun mandajpaj tullucunataca, uchufa tucungacamanmi rupachinajurca.

²Shinamandami Moab llactapica, ninata japichisha. Chai ninami, Queriot shuti pueblopi mandashpa tiajuna huasicunatapash, tucuillata rupachinga. Moab llactapi causajcunaca, trompetata huacachishpa ninanda caparinajujpimi, tucuicuna huañunajunga.

³Paicunapaj jueztaca, paicunapaj chaupimanda anchuchishpami, pai churashca tucui mandajcunandi huañuchisha” nijurcami Mandaj Diosca.

⁴Mandaj Diosca, cashnatapashmi nijurca: “Judá llactapi causajcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunaca, Mandaj Dios mandashcatapash, yangapimi churanajurca. Pai yachachishcacunatapash, na pactachircachu. Paicunataca, paicuna llullashcallatami pandachirca. Chai llullatallatami, paicunapaj ñaupa taitacunapash catishpa causarca.

⁵Shinamandami Judá llactapica, ninata japichisha. Chai ninallatami, Jerusalenbi mandashpa tiajuna huasicunatapash, tucuillata rupachinga” nijurcami.

⁶Mandaj Diosca, cashnatapashmi nijurca: “Israelcunataca, quimsa juchacunata rurashpapash, chuscu juchata rurashcamanda llaquichinataca, napacha saquishachu. Paicunaca, imatapash cashcatapacha ruraj runataca, culquipajmi jatunajurca. Imagutapash na charij runagutaca, ishcai pargatepajmi cunajurca.

⁷Imaguta ruraitapash na ushajcunataca, ñutu alpapi urmachishpami, umapi sarunajun. Ali shungu runacunatapashmi pandachinajun. Taitapash, churipash, chairalla viñai chai cuitsapillatami chayanajun. Chashna rurashpami, jucha illaj ñuca shutitaca mapayachinajun.

⁸Culquita mañachijpi paicunaman cushca churajunacunata mandashpami, maijan altar ladopi cashpapash siririnajun. Paicunapaj dioscunapaj huasipica, multashca vinotami ufianajun.

⁹Ñucami, amorreocunataca, paicunapaj ñaupajpi tucuchircani. Cedro quirushna jatun cajpipash, encina quirushna shinlli cajpipash, ñucami tucuchircani. Jahuapi fucushca paicunapaj muyucunatapash, ucuman viñashca paicunapaj sapicunatapashmi tucuchircani.

¹⁰Cangunatapash, ñucami Egipto llactamanda vichai llujchimurcani. Amorreocuna causanajuj llactata japinajuchunga, ñucami jichushca pambata chuscu chunga huatacunata pushamurcani.

¹¹Cangunapaj churi puramandaca, ñuca ima nishcata villajcuna cachunmi agllarcani. Cangunapaj chairalla viñai puramandaca, nazareo nishca runacuna cachunmi agllarcani. Israelcunalla, ¿nachu caica chashna?” nijurcami Mandaj Diosca.

¹²“Ashtahuangarin cangunaca, vinota na ufiaj nazareo nishca runacunatapashmi ufiachircanguichi. Ñuca ima nishcata villajcunatapash, na villanachu canguichi nishpami jarcarcanguichi.

¹³Ricuichi, chashna cashcamandami cangunataca, gavillahuan junda carreta llapinshna, chai pushtupillata llapisha.

¹⁴Shina rurajujpica, ali calpajpash napacha calpai ushangachu, ninan shinlli runapash, na shinlli tucui ushangachu. Ninan ushaita charij runapash, paipaj causaitaca napacha quishpichi ushangachu.

¹⁵Flechacunata arcohuan cacharijpash, na cachari ushangachu. Ali calpaj runapash, na pacajushpa calpai ushangachu. Caballopi tiarishpa calpaj runapash, paipaj causaitaca, napacha quishpichi ushangachu.

¹⁶Chai llaqui punllapica, tucuicunata yali ninan shinlli soldadopash, lluchullami calpanga” ninmi Mandaj Diosca.