Read Imbabura Highland Quichua AMÓS 3 Bible Online

AMÓS 3 - Imbabura Highland Quichua bible

AMÓS 3

¹Israelcunalla, cangunatapash, Egipto llactamanda vichai pushamushca tucui cangunapaj familiacunatapash, Mandaj Dios fiñashpa rimashcata uyaichi. Paica cashnami nin:

²“Cai pachapi causaj tucui familia puramandaca, cangunatallami ñucapajlla causanajuchun agllarcani. Shina cashcamandami, tucui nalita canguna rurashcamandaca llaquichisha.

³Napash shujlla yuyai cashpata, ¿ishcandi tandanajushpa purinmanllachu?

⁴Sachapi leonga, ¿napash micuna tiajpita huacanmanllachu? Maltun leonbash, ¿utujupi napash ima aichata micujushpata huacanmanllachu?

⁵¿Alasyu animalcunaca, pipash na tugllata churajpita, japi tucungallachu? Pambapi tiajuj tugllapash, ¿na imapash yaicujpita, japingallachu?

⁶Pueblopi trompetata huacachijpica, ¿nachu gentecunaca manllarishpa caparinajunman? ¿Mandaj Dios na llaquichijpita, pueblopica ima llaquipash tiangallachu?

⁷Mandaj Jatun Diosca, pai ima nishcata villashpa paita servijcunaman, ima tucunatapash nara villashpaca, na llaquichingallachu.

⁸León huacajujta uyashpaca, ¿pita na manllangayari? Mandaj Jatun Dios rimajpica, ¿pita na villangayari?

⁹Asdod shuti pueblopi mandashpa tiajuna huasicunapi, Egipto llactapi mandashpa tiajuna huasicunapica, cashna nishpa villagrichi: ‘Samaria urcu jahuapi tandanajushpa, chai llactapi causajcuna yapa nalita ruranajujta ninanda llaquichishpa causanajujta ricugrichi’ ninmi.

¹⁰Paicunaca, imatapash alita ruranataca napacha yachanllu. Shujcunata macashpa imatapash quichushcacunatallami, mandashpa tiajuna paicunapaj huasicunapipash jundachinajun” ninmi Mandaj Diosca.

¹¹Shina cashcamandami Mandaj Jatun Diosca, paicunataca cashna nirca: “Cangunata fiñajcunaca, cai llacta muyundi ladocunatami shamunajunga. Paicunaca, cambaj shinlli torretapash urmachishpami, mandashpa tiajuna cambaj huasicunamandapash, tucuita shuhuashpa apanga” ninmi.

¹²Mandaj Diosca, cashnatapashmi nirca: “Samaria pueblopi causaj israelcunaca, ñutulla tiarinacunapi, camacunapimi sirishpa chishanajun. Paicunaca, shuj michij llamata leonbaj shimimanda quichungapaj rishpa, ishcai chaquita, na cashpaca rinri pundatalla quichushcashnami quishpiringa” nircami.

¹³Tucuita Mandaj Diosca, cashnatapashmi nirca: “Uyaichi, Jacobopaj miraicunata llaquichinata villagrichi.

¹⁴Israelcuna ñucata na cazushcamanda llaquichijui punllapica, Bet-el shuti pueblopi tiaj altarcunatapashmi tucuchisha. Chai altar esquinacunapi tiaj cachucunatapash faquijpimi, alpaman urmanajunga.

¹⁵Shinallata tamia punllacunapi, rupai punllacunapi tiana huasicunatapashmi huaglichisha. Marfilta churashpa rurashca huasicunapashmi tucuringa. Ashtaca huasicunami, llaquinayaita tucuringa” nircami Mandaj Diosca.