Read Imbabura Highland Quichua AMÓS 5 Bible Online

AMÓS 5 - Imbabura Highland Quichua bible

AMÓS 5

¹Israelcunalla, cangunamanda huacangapaj ñuca rimashca cai shimicunata uyaichi.

²Israelcunaca, jarihuan nara tacarishca cuitsashna cashpapash urmarcamari. Paicunaca, na cutin jatari ushangachu. Paipaj alpapillatami, urmashpa quedarca. Paita jatarichingapaca, pipash na tianllu.

³Mandaj Jatun Diosca, cashnami nin: “Israelcunaca, huaranga runacunahuan llujshishpapash, patsajhuanllami tigramunga. Patsaj runacunahuan pueblomanda macanajungapaj llujshishpapash, chungahuanllami tigramunga” ninmi.

⁴Chashna cajpipash Mandaj Diosca, israelcunataca cashnami nin: “Ñucata mascahuaichi, causanguichimi.

⁵Bet-el shuti pueblotaca, na mascanachu canguichi. Gilgal shuti pueblomambash, na yaicunachu canguichi. Beerseba shuti pueblomambash, na yalinachu canguichi. Gilgal shuti pueblopi causajcunaca, prezu apai tucungami. Bet-el pueblopash, yangami tucunga” ninmi.

⁶Mandaj Diosta mascaichi, causanguichimi. Pactarallapash Josepaj miraicunataca, ninahuan rupachishpa tucuillata chingachiman. Bet-el shuti pueblopi rupajuj ninataca, pipash na huañuchi ushangachu.

⁷Aliguta ricushpa mandanatapash, ajenjotashna jayajman tigrachijcunaca, imatapash cashcatapacha ruranatapash, alpapimi shitanguichi.

⁸Pléyades shuti, Orión shuti luzerocunatapash ruraj Diosta mascaichi. Paica, yana yana tutatapash punchayachinmi, punllatapash tutatashna amsayachinllami. Paica, mama cucha yacucunata cayashpami, alpa jahuapi jichamujun. Paica, Mandaj Dios shutimi.

⁹Paica, ninan shinlli runata quichugrichunmi, imatapash quichuj runaman ushaita cun. Chai quichujtaca, paimi shinlli torreta urmachij shamuchun cachamun.

¹⁰Paicunaca, ali tucuchun pueblo pungupi rimajtapash millanayachircami. Aliguta rimajtapash, na ricunayachircachu.

¹¹Shinamandami imagutapash na charij runagutaca, sarushpa macashpa impuestomandaca, aparishca trigota quichurcanguichi. Chashna llaquichishpami, labrashca rumicunahuan huasichircanguichi. Ashtahuangarin chai huasicunapica, napacha causai ushashpami puringuichi. Juyailla uvas chagracunata tarpushpapash, chai uvasmanda vinotaca na ufiai ushashpami causanguichi.

¹²Canguna yapata na cazushcatapash, cangunapaj jatun juchacunatapash yachanimi. Imatapash cashcatapacha ruraj runata llaquichijtapash, imata pacalla cujpi japijtapash yachanimi. Juezcunapash, imagutapash na charijcunatallami llaquipi churanguichi.

¹³Shinamandami, aligutapacha yarishpa purij runapash chai punllacunapica, imatapash na nishpa upalla saquin. Llaqui punllacunapi cashcamandami, imatapash na ni ushan.

¹⁴Canguna causangapaj munashpaca, alita ruranata mascaichi, nalita ruranataca saquichi. Chashna rurajpica, canguna imashna nishcashnallatami tucuita Mandaj Taita Diosca, cangunahuan canga.

¹⁵Nalita ruranata millanayachishpami, alita ruranata juyana canguichi. Imatapash cashcatapacha rurashpami, aliguta ricushpa mandana canguichi. Canguna chashna rurajpica, tucuita Mandaj Taita Diosca, Josepaj miraicuna huaquin puchushcacunataca llaquingapashchari.

¹⁶Tucuita Mandaj Taita Diosca, cashnatapashmi nin: “Tucui plazacunapimi, huacai tianga. Tucui ñangunapimi aij, aij nishpa huacanajunga. Tarpuj runatapash, huacachunmi cayanajunga. Yarishpa yarishpa huacanata yachajcunatapash, yarishpa yarishpa huacachunmi cayanajunga.

¹⁷Cangunapaj chaupita ñuca yalijujpimi, tucui uvas chagracunapi huacai tianga” ninmi Mandaj Diosca.

¹⁸Mandaj Dios shamuna punlla chayamuchun munajcunalla, ¡aij imachari tucunguichi! Mandaj Dios shamuna punllataca, ¿imapajta shuyanguichi? Pai shamui punllapica, punchalla cangapaj randica, yana yana tutami canga.

¹⁹Chai llaqui punllapica, leonda pacajungapaj calpajushpapash, osohuan tuparinshnami canga. Na cashpaca, huasiman yaicushpa patapi taunarijpi, culebra ñapash caninshnami canga.

²⁰Mandaj Dios shamui punllapica, ¿nachu yana yana tuta tucunga? ¿Nachu ima punchayachijpash illaj yana tuta canga?

²¹“Jatun fiestacunata canguna rurashcata millanayachishpami, na ricunayachircani. Cangunapaj jatun tandanajuicunahuanga, na cushijushachu.

²²Ñucaman animalcunata cushpa tucuillata rupachijpipash, imata cunatallata cujpipash, na chasquishachu. Ñucahuan ali cangapaj, virayashca animalcunata ñucaman carajpipash, ricuitallapash na ricushachu.

²³Ñuca ladomandaca, ashtaca candajcuna candashcatapash anchuchichi. Tocanacunahuan tocashcatapash, na uyashachu.

²⁴Ashtahuangarin aliguta ricushpa mandanaca, yacushna calpajuchun. Imatapash cashcatapacha ruranapash, jatun larca yacu ninanda rijunshna cachun.

²⁵Israelcunalla, cangunaca jichushca pambapi chuscu chunga huatata purinajushpaca, ¿ñucamanllu animalcunata cushpa huañuchircanguichi? ¿Imata carana cashcatapashchu carahuarcanguichi?

²⁶Ashtahuangarin Moloc shuti, Quiún shuti dioscunapaj, cangunapaj yanga dioscunapaj carpatami apashpa purircanguichi. Canguna rurashca dioscunapaj luzerotami, apashpa purircanguichi.

²⁷Chaimandami cangunataca, Damasco pueblota yalishpa apachun saquisha” ninmi Mandaj Diosca. Paica, tucuita Mandaj Taita Dios shutimi.