Read Imbabura Highland Quichua AMÓS 7 Bible Online

AMÓS 7 - Imbabura Highland Quichua bible

AMÓS 7

¹Mandaj Jatun Diosca, cashnatami ricuchihuarca: Jatun mandaj ña tucuilla cozechashca jipa, jipalla tarpushca grano ña viñajujpimi, paica ashtaca langosta jurucunata churai callarirca.

²Chai jurucuna tucuilla llactapi jihuacunata micushpa tucuchijpimi, cashna tucurca: Ñucaca cashnami nircani: —Mandaj Jatun Dioslla, cunanga paicuna nalita rurashcata cungapairi. Jacobopaj miraicunataca, ¿pita ayudai ushangayari? Paicunaca huaquinllamari— nircanimi.

³Mandaj Diosca chashna llaquichijushcamanda, ninanda llaquirishpami: —Shina cashpaca na llaquichishachu— nirca.

⁴Mandaj Jatun Diosca, cashnatapashmi ricuchihuarca: Mandaj Jatun Diosca, ninahuan llaquichingapajmi cayajurca. Chai ninami, manllanayai ucu ucu jatun utujutapash rupachijurca. Shinallata llactapi tiaj ashtaca alpatapashmi rupachijurca.

⁵Chaimandami ñucaca, cashna nircani: —Mandaj Jatun Dioslla, cai ninataca cunanda huañuchipailla. Jacobopaj miraicunataca, ¿pita ayudai ushangayari? Paicunaca huaquinllamari— nircanimi.

⁶Mandaj Diosca chashna llaquichijushcamandaca, ninandami llaquirirca. Shinamandami, Mandaj Jatun Diosca: —Shina cashpaca cai llaquihuambash na llaquichishachu— nirca.

⁷Cashnatapashmi ricuchihuarca: Jatun Diosca, plomadahuan pircashca pata jahuapimi shayarirca. Paica, pircata ruraj runapaj plomadata chaririajmi shayarirca.

⁸Shinamandami Mandaj Diosca, cashna nihuarca: —Amós, ¿imatata ricujungui?— nijpi ñucaca: —Pircata ruraj runapaj plomadatami ricujuni— nircani. Shina nijpimi Mandaj Diosca, cashna nihuarca: —Ricui, pircata ruraj runapaj cai plomadahuanmi, ñuca agllashca israelcunapaj chaupipica ricugrini. Paicunata llaquichinataca, na ashtahuan saquijushallachu.

⁹Isaac runapaj mirai israelcunapaj, lomacunapi tiaj altarcunaca tucuchi tucungami. Paicunapaj dioscunapaj huasicunapash, llaquinayaitami tucuchi tucunga. Jeroboam runapaj huasi ucu purataca, espadahuanmi huañuchishpa tucuchisha— nihuarcami.

¹⁰Bet-el shuti pueblopi causajuj cura Amasías runaca, israelcunata jatun mandaj Jeroboam shuti runaman, cashna nishpa villachunmi cacharca: “Amós shuti runami canda fiñashpa, israelcunapaj chaupipi jatarishca. Cai llactapi causajcunataca, tucui pai villashca shimicunata uyashpa ashtahuan llaquirinajuchunga, na saquinachu canchi.

¹¹Chai Amós runaca, cashna nishpami villajun: ‘Jeroboam runaca, espadahuanmi huañuchi tucunga. Israelcunapash, paicunapaj llactamandaca prezumi apai tucunajunga’ nishpami villajun” nichunmi cacharca.

¹²Shina villashca jipami Amasías runaca, Amós runataca cashna nirca: —Dios ricuchishcata villaj runa, caimanda llujshishpa, Judá llactamanllata ri. Chaipi cambaj micunata micugri. Dios villashcataca, chaipillata villagri.

¹³Bet-el shuti pueblopica, ama ashtahuan villajuichu. Cai pueblopimi jatun mandajca, Diosta mañan. Cai puebloca, llactata mandana jatun pueblomi— nircami.

¹⁴Shina rimajpimi Amós runaca, Amasías runataca cashna nishpa tigrachirca: —Ñucaca, profeta runaca na canichu. Profetapaj churipash na canichu. Ashtahuangarin huagracunata michishpa, sacha jigoscunata pallashpa purijllami cani.

¹⁵Mandaj Diosmi ñucataca, huagrata michijujta japishpa: ‘Ñuca ima nishcata, ñuca agllashca israelcunaman villagri’ nihuarca.

¹⁶Cunanga, Mandaj Dios ima nishcata uyai. Canga, ñucataca cashnami nihuangui: ‘Israelcunata llaquichinataca ama villaichu. Isaac runapaj miraicuna llaquichi tucunataca ama parlaichu’ nihuanguimi.

¹⁷Shinamandami Mandaj Diosca, cashna nirca: ‘Cambaj huarmica, cai pueblo chaupipimi, culquimanda huainayashpa causanga. Cambaj churicunapash, ushicunapash espadahuanmi huañuchi tucunajunga. Cambaj alpacunatapash, suerteta rurashpami chaupirinajunga. Canga, juchahuan mapayashca llactapimi huañungui. Israelcunapash, paicunapaj llactamandaca carumanmi prezu apai tucunga’ ninmi— nircami.