Read Imbabura Highland Quichua AMÓS 8 Bible Online

AMÓS 8 - Imbabura Highland Quichua bible

AMÓS 8

¹Mandaj Jatun Diosca, cashnatami ricuchihuarca: Ricuichi, rupai punllacunapi fucushca frutahuan canastatami ricuchihuarca.

²Shina ricuchishpaca: —Amós, ¿imatata ricujungui?— nijpimi ñucaca: —Rupai punllacunapi fucushca, frutahuan canasta tiajujtami ricujuni— nishpa tigrachircani. Shina nijpimi Mandaj Diosca, cashna nihuarca: —Ñuca agllashca israelcunata tucuchinami ña chayamushca. Paicunataca, na ashtahuan saquijushallachu.

³Chai jatun llaqui punllapica, ñuca huasipi candajcunapashmi huacanajunga. Huañushcacunapash, ashtacapachami sirinajunga. Chai huañushcacunataca, chulunlla tucui ladocunapimi shitanajunga— ninmi Mandaj Jatun Diosca.

⁴Imagupash illajcunata quichushpa causajcuna, cai llactapi causaj imagutapash na charijcunata ninanda llaquichijcuna, caita uyahuaichi.

⁵Cangunaca, cashnami ninguichi: “Trigota ucha jatungapaca, ima horata quilla tucuringayari. Samana punllapash yalijpichari, granocunata alichishca ucumandaca, pascashpa jatushun. Medidacunatapash uchillayachishpa, balanzapipash napash cashcata pezashpami, umashpa ashtaca culquipi jatushun.

⁶Imagutapash na charijcuna culquita na cui ushashpaca, ñucanchita servijcunami tucunga. Imagupash illajcunapash, ishcai pargatemandallapash ñucanchita servijcunami tucunga. Lanchashca trigotapashmi jatushun” ninguichimi.

⁷Jacobopaj miraicunata juyaillata ruraj Mandaj Diosca, cashna nishpami juramenturca: “Chai tucui nalita rurashcacunataca, napacha cungashachu.

⁸Ñuca llaquichijui punllapica, alpaca ¿nachu chujchunga? Cai llactapi tucui causajcunapash, ¿nachu huacanajunga? Tucui cai pachaca, jatun yacushnami miranga. Shina mirashpapash, Egiptopi jatun yacushnami cutin ashalla tucunga” nircami.

⁹Mandaj Jatun Diosca, cashnatapashmi nin: “Ñuca llaquichijui punllapica, cashnami tucunga: Inditapash, chaupi punllapilla huashajuchunmi saquisha. Cai pachatapash punchapamba punllapimi, yana tutahuan quilpasha.

¹⁰Cangunapaj cushijuna fiestacunatapash, huacana punllacunamanmi tigrachisha. Canguna candanacunatapash, huacanamanmi tigrachisha. Cañamutami cangunamambash churachisha, ajchatapash tucuillami rutuchisha. Chaipica, shujlla churi huañushcamandashna huacanamanmi tigrachisha. Paicunapaj tucurimui punllapica, ninan llaqui punllashnami canga” ninmi.

¹¹Mandaj Jatun Diosca, cashnatapashmi nin: “Uyaichi, ninan llaqui punllacunami chayamujun. Chai punllacunapica, yarjaitami cai pachaman cachamugrini. Micuna yarjaitaca, na cachamushachu. Yacuta yacunayachinatapash, na cachamushachu. Ashtahuangarin Mandaj Dios ñuca villashca shimita uyanayachishpa yarjaihuanshna, yacunaihuanshna purinajuchunmi cachamusha.

¹²Ñuca shimita uyanayachishpami, shuj mama cuchamandaca caishuj mama cuchacaman, urai ladomandaca indi huashajuj ladocaman mascashpa purinajunga. Shina mascashpapash, napacha tarinajungachu.

¹³Chai huatacunapica, jarihuan nara tacarishca juyailla cuitsacunapash, chairalla viñai jaricunapash yacunayaihuan na ushashpami, huañunalla tucunajunga.

¹⁴Samaria pueblopaj juchamanda juramentujcunaca, cashnami ninajun: ‘Dan shuti aillu runacunalla, cangunapaj Diosmanda’ ninajunmi. Shinallata: ‘Beerseba puebloman rina ñanmandapash’ ninajunmi. Paicuna urmashpaca, napacha cutinga jataringachu” ninmi.