Read Imbabura Highland Quichua ABDÍAS 1 Bible Online

ABDÍAS 1 - Imbabura Highland Quichua bible

ABDÍAS 1

¹Abdías shuti runaguca, muscuipishnami ricushca. Mandaj Jatun Diosca, Edom shuti llactapi causajcunamandaca, cashnami nirca: Mandaj Dios villashcataca uyarcanchimi. Shuj villajtami, tucui llactacunapi causajcunaman villachun cachamurca. Chai villaj runaca: “Edom llactapi causajcunahuan macanajungapaj jatarichi, tucuicuna jatarishunchi” nircami.

²“Ricui, candaca cai pachapi tiaj llacta puramandaca, ashtahuan uchilla llactatami rurarcani. Ninandapacha ñavita urai cumuchi tucushcami cangui.

³Cambaj shungupi jariyajushcashnallatami, candaca umachirca. Jaca jahuacunapi tiaj jatun rumi chaupicunapimi causangui. Shina causashpami, cambaj shungupica: ‘¿Pita caimandaca, pambaman urmachihuangayari?’ yajungui.

⁴Jatun angashna jahua huairata jatarishpa rijujpipash, luzero chaupicunapi tazinda rurajpipash, chaimandapash urmachishallami” ninmi Mandaj Diosca.

⁵“Shuhuacuna cambajman tuta shuhuangapaj shamushpaca, ¿nachu paicuna apai ushashcatalla shuhuanman? Uvasta pallajcuna pallashpapash, ¿nachu asha pallajunatallapash saquinman? (¡Llaquinayaitamari tucuchi tucushcangui!)

⁶¡Esaú imatalla charishcataca, chashnamari callarimanda mascanajushca! Pai juyailla charishcacunata pacashcatapashmi mascanajurca.

⁷Cambaj ali cumbacunallatami candaca umachirca. Candaca, shuj llacta linderocunacamanmi pusharca. Canhuan casilla aliguta causajcunallatami, candaca fiñashpa llaquichirca. Canhuan micujcunallatami can urmachun, lazuta churanajurca. Paicunaca, ima ali yuyaitapash na charinllu” ninmi.

⁸Mandaj Diosca, cashnatapashmi nin: “Chai punllapica, ¿nachu Edom llactapi causaj alipacha yachajushca runacuna chingachumbashmi saquisha? ¿Nachu Esaupaj urcupi causanajuj aligutapacha yarishpa purijcuna, huañuchumbash saquisha?

⁹Temán shuti pueblolla, cambaj shinlli soldadocunapash, manllashpa chujchunajungami. Esaupaj urcupi causanajuj runacunapash, ninanda llaquichijpimi huañunajunga.

¹⁰Cambaj huauqui Jacobota nalicachishpa, ninanda rimashcamandami, pingaichi tucushpa causaita causaicaman chingachi tucungui.

¹¹Cambaj huauquipaj ñaupajpi can shayajui punllallatami, paipaj soldadocunataca, na rijsishca runacuna prezu apanajurca. Jerusalén pueblo pungucunatapash, na rijsishca runacuna faquishpa yaicushpami, ima tiajtapash suerteta rurashpa chaupirinajurca. Cambash chai llaquichij purashnami tucurcangui.

¹²Cambaj huauquita llaquichijui punllapica, na ricujunallachu carcangui. Judá llactapi causajcuna chingajui punllapica, na cushijunachu carcangui. Paicuna jatun llaquita apajui punllapica, na cushijushpa asijunachu carcangui.

¹³Pai llaquita apajui punllapica, ñuca agllashcacunapaj pueblo pungutaca na yaicunachu carcangui. Pai llaquita apajui punllapica, chai jatun llaquicunataca napacha ricujunallachu carcangui. Paita ninanda llaquichijui punllapica, pai imatalla charishcatapash, napacha japinachu carcangui.

¹⁴Huañunamanda pacajushpa rijcunatapash, ñan cruzarijuj esquinacunapi chapashpa, na huañuchinachu carcangui. Chai jatun llaqui punllapica, pacajushpa puchushcacunatapash, na chai llaquichijcunaman cunachu carcangui.

¹⁵Mandaj Dios tucui llactacunata ninanda llaquichina punllapash ñami chayamujun. Imashnami shujcunata ninanda llaquichircangui, chashnallatami candapash llaquichinga. Can llaquichishcamandaca, cambash japinapachami cangui.

¹⁶Imashnami cangunaca, ñucapajlla urcupi ufianajurcanguichi, chashnallatami shuj llactapi causajcunapash, na samashpa ufianajunga. Shina ufiashpa ashtacata langashpapash, imapash na tiashcashnallatami tucunga.

¹⁷Ashtahuangarin Sion shuti urcupica, quishpirishpa huaquinguna puchushca tiangarami. Chai urcuca, Diospajlla shicanyachishcami canga. Jacobopaj miraicunapash, paicunapaj alpacunataca cutinmi japinga.

¹⁸Jacobopaj miraicunaca, ninashnami canga. Josepaj miraicunaca, rupajuj ninashnami canga. Esaupaj miraicunaca, jupashnami canga. Shinamandami rupachishpa tucuchinga. Esaupaj miraicunamandaca, ashagullapash na puchungachu” ninmi. Mandaj Diosmi chashna nishpa villarca.

¹⁹Neguev llactapi causajcunaca, Esaupaj miraicuna causana urcutami japinajunga. Sefela shuti pambapi causajcunaca, filisteocunapaj llactatami japinajunga. Efraín llactatapash, Samaria llactatapashmi japinajunga. Benjaminbaj miraicunaca, Galaad llactatami japinajunga.

²⁰Prezu apai tucushcamanda tigramushca Israel soldadocunaca, cananeocuna causanajuj llactamandaca, Sarepta shuti pueblocamanmi japinajunga. Jerusalenmanda prezu apajpi, Sefarad shuti pueblopi causajcunaca, Neguev pambapi tiaj pueblocunatami japinajunga.

²¹Esaupaj urcupi causajcunata llaquichingapajmi, quishpichijcunaca Sion urcuman vichai rinajunga. Chashnami mandanapash, Mandaj Diospajlla canga.