Read Imbabura Highland Quichua JONÁS 2 Bible Online

JONÁS 2 - Imbabura Highland Quichua bible

JONÁS 2

¹Jonasca, chai pijipaj vijsa ucumandami, paita Mandaj Taita Diosta mañashpa,

²cashna nijurca: “Ñucaca, ninan llaquihuan cashpami, Mandaj Diostaca mañarcani, paica uyahuarcami. Seol ucupi cashpami, caparishpa mañarcani. Ñuca mañashcataca uyahuarcanguimi.

³Ñucataca, mama cucha ucu chaupimanmi shitahuarcangui. Ninanda rijuj yacumi, muyundi quilpahuarca. Cambaj tucuilla yacucunapash, caiman chaiman jatarishpami, ñuca jahuata yalinajurca.

⁴Shinamandami cashna nijurcani: ‘Cambaj ñaupajmandaca, shitai tucushcami cani. Shina cashpapash, cambajlla huasitaca ricusharami’ nijurcanimi.

⁵Yacumi, ñucataca tucuilla langahuarca. Manllanayai ucu ucu yacucunami, muyundi quilpahuarca. Yacu ucupi tiaj jihua angucunami, ñuca umapi pillurirca.

⁶Urcu callari ucucamanmi huashajurcani. Alpaca, causaita causaicaman chaipi tiachunmi, aldabacunahuan vichashpa charihuarca. Shina cajpipash, ñucata Mandaj Taita Dioslla, canmi ñuca causaitaca pambashcamanda llujchihuarcangui.

⁷Ñuca causaica, ña tucurijujpimi, can Mandaj Diostaca yarircani. Ñuca mañashcataca, cambajlla huasimandami uyahuarcangui.

⁸Imapajpash na valij yangacunata catijcunaca, can llaquijujtami cunganajun.

⁹Ashtahuangarin ñucaca, ñuca shimihuan canda alicachishpami, animalcunata cushpa huañuchisha. Imaguta carasha nishcatapash carashapachami. Quishpichinaca, Mandaj Diospajmi” nijurcami.

¹⁰Mandaj Diosllata cutin mandajpimi, Jonasta langashca chai jatun pijica, chaquishca alpaman llujshishpa lansarca.